Okulikuambela

5 Opi iya Onalupi?

TYOTYILI ove uhole okumona okuti omaongano omanyingi onongeleya, ankhimaneka onondyuo valingila omalikuambelo, nokuholovona oola velikuambela kese nthiki. Okuti Ombimbiliya ipopia omphangu noola yokulinga omalikuambelo?

Otyili Ombimbiliya ilekesa okuti kuna omuvo waviuka pala okulikuambela. Mongeleka, etyi Jesus novalanduli vae vehenelie, oe wapandulile ku Huku melikuambelo. (Lucas 22:17) Etyi ovalongwa vae veliongiya pala okufenda, velikuambelele aveho kumwe. Ankho vatualako notyituwa tyilingwa monondyuo mbokufendela mbo va Judeu no mondyuo ya Huku mo Jelusalei. Huku wahandele ondyuo yae ikale “ondyuo yomalikuambelo pala omalongo aeho.”—Marcos 11:17.

Tyina ovaumbili va Huku veliongiya avelikuambela kumwe, Huku upondola okuvetehelela. Inkha vawaneka omalusoke avo aveho, nokulinga omalikuambelo elikuata Novihonekwa, Huku mevetehelela. Elikuambelo lipondola alo umwe okuavela Huku ondundo yokulinga etyi ankho ñgeno ahalingile. (Hebreus 13:18, 19) Onombangi mba Jeova velikuambela apeho momaliongiyo avo. Ove ukahi nokukongwa opo wende Kondyuo Yomaliongiyo yekukalela popepi, opo ukatehelele ove muene omalikuambelo oo.

Anthi, Ombimbiliya kaipopi okuti elikuambelo lina okulingilwa vala pomphangu ike ine omoola ike. Mombimbiliya, tuvasamo ehipululo liovaumbili va Huku velikuambelele kese muvo, no ponomphangu mbelikalaila. Jesus wati: “Tyina ulikuambela, nyingila mondyuo yove oiki epito liove, olikuambela ku Tate yove uhamonwa. Iya Tate yove utalela pokamphengi, mekufete.”—Mateus 6:6.

Okukongwa ngotyo katyihambukiswa? Ove tyotyili upondola okufuena Kohamba youye auho kese muvo, tyina ukahi awike. Iya kala nonthumbi yokuti mekutehelela. Otyo, tyilekesa nawa omokonda yatyi Jesus ankho aovolela okukala aike opo elikuambele! Nthiki imwe, welikuambelele otyinthiki atyiho ku Huku, okuovola ehongolelo pokulinga etokolo limwe liakolela unene.—Lucas 6:12, 13.

Ovalume vamwe novakai vapopiwa Mombimbiliya, velikuambelele, pokulinga omatokolo epuiya, ine opovitateka ovinene. Pamwe ankho velikuambela momutima ine okupopila peulu. Ankho velikuambela aveho kumwe na tyina vekahi aveke. Otyipuka tyakolela kuvo, ankho okulikuambela apeho. Huku alo umwe ukonga ovaumbili vae okuti: “Likuambelei apeho.” (1 Tessalonicenses 5:17) Oe uhanda okutualako okutehelela vana valinga ehando liae. Otyo katyilekesa okuti una oluembia?

Tyotyili, mouye uno wovanthu vehesukile na Huku, ovanyingi velipula inkha elikuambelo liakolela umwe. Ove upondola okupula okuti, ‘Elikuambelo tyotyili malimbatela umwe?

[Onondaka Mbavilapo pefo 9]

Tupondola okulikuambela kese muvo kese pamwe