Outumini Wouhamba Momanima 100 Oñgeni Ukukalesa?

1, 2. Oityi Ouhamba wa Huku maukalinga, iya oñgeni tutyii okuti mauya?

POPEPI nomphunda yo Kafarnau pondyovo mo 31 P.K., Jesus Kristu walongesile ovalanduli vae velikuambele okuti: “Ouhamba wove uye.” (Mat. 6:10) Hono, ovanyingi kavetyii inkha Ouhamba mauya umwe. Mahi, tuna onthumbi yokuti Jeova makumbulula omalikuambelo etu okuita Ouhamba uye.

² Jeova maundapesa Ouhamba opo awaneke ombunga yae keulu no pohi. Evangelo olio lia Huku malifuisuapo. (Isa. 55:10, 11) Ovipuka oviwa viamoneka momanima 100 okualamba, vilekesa okuti Jeova wakalale Ohamba iya ukahi nokulinga ovipuka oviwa pala ovaumbili vae ovanyingi. (Zac. 14:9; Rev. 15:3) Mahi, Jeova okukala Ohamba tyelikalela nokuya Kuouhamba wa Huku Jesus etulongesile okuita melikuambelo. Oñgeni ovipuka ovio vivali vielikalela iya oñgeni vitukalesa?

OHAMBA JEOVA AHOLOVONA IHIMBIKA OKUTUMINA

3. (a) Onalupi Jesus avialekwa Kouhamba, iya opi avialekelwa? (b) Oñgeni molekesa okuti Jesus wahimbika okutumina mo 1914? (Tala onondaka pokatoi.)

³ Konthyulilo yotyita 19, ovaumbili va Huku vahimbikile okunoñgonoka eulo liahonekelwe na Daniele omanima 2.500 konyima, liati: “Kononthiki mbovatumini vatyo ovo, Huku yo keulu makavialeka ouhamba umwe uhakahanyuako nalumwe.” (Dan. 2:44) Ovalilongesi Vombimbiliya mokueenda kuomanima omanyingi ankho vapopia okuti Ouhamba wa Huku mauhimbika okutumina keulu mo 1914. Ovanthu ovanyingi pomuvo opo ankho vena onthumbi onene yetyi matyiya komutwe. Omuhoneki umwe wati: “Mo 1914, ouye ankho weyula omakevelelo nomilao.” Mahi, kapakalele ehimbwe menima olio, kuahimbika Ovita Viotete Viouye Auho, iya otyo tyafuisapo eulo Liombimbiliya. Ondyala, novinimawe, nomauvela, nomaulo omakuavo afuiswapo, vialekesile okuti Jesus Kristu wahimbika okutumina keulu Ngohamba Youhamba wa Huku mo 1914.a Mokuvialeka Omona wae akale Mesiya Ohamba, Jeova wakala Ohamba monkhalelo imwe omphe.

4. Otyipuka patyi tyotete Jesus alinga etyi akala Ohamba? Oityi vali alingile?

⁴ Otyipuka tyotete alinga etyi avialekwa na Huku Kouhamba okulwisa Satanasi, Ondyale onene ya Tate yae. Jesus no noandyu mbae vataata Eliapu novilulu vialio aviho keulu. Otyo tyaeta ehambu enene keulu, mahi atyieta ononkhumbi ononene kombanda yohi. (Tanga Revelação 12:7-9, 12.) Konyima yotyo, Ohamba yahimbika okuviukisa, nokulongesa, nokuonganeka ovaumbili vae pano pohi opo valinge ehando lia Huku. Tutalei oñgeni etyi vetavela ehongolelo lia Jesus tyaava ongeleka ongwa pala onthwe hono.

OHAMBA MESIYA UTALA NAWA OVAUMBILI VAE OVAKUATYILI

5. Oityi tyaendapo okuhimbikila mo 1914 alo konthyimbi yo 1919?

⁵ Etyi Jesus apola ehongiliyo evi lia Satanasi novilulu vialio keulu, Jeova wahongolela Jesus opo vatale nawa nokuviukisa ovalanduli vae pano pohi. Omuuli Malakia otyo wetyiihana okuti okusukula. (Mal. 3:1-3) Ehipululo lilekesa okuti otyo tyalingwa okuhimbikila mo 1914 alo konthyimbi yo 1919.b Inkha tuhanda okukala mombunga ya Jeova, tuna okukala tyasukuka. (1 Ped. 1:15, 16) Efendelo lietu lina okuyapuka konongeleya mbomatutu ine o kopulitika.

6. Oñgeni okulia kuopaspilitu kukahi nokuawa, iya omokonda yatyi okulia oko kuakolela unene?

⁶ Mokonda Jesus Ohamba, waundapesa outumini wae opo aholovone “omupika wekolelo nokualunguka.” Omupika oo, ankho apeho maavela okulia okuwa kuopaspilitu pala aveho vekahi “motyunda tyike vala” tya Jesus. (Mat. 24:45-47; João 10:16) Tunde mo 1919, otyikundyi otyitutu tyovakuatate ovalembulwa vekahi nokufuisapo noukuatyili otyilinga tyakolela tyokuavela okulia “vomeumbo.” Omupika wekolelo nokualunguka, utuavela okulia okunyingi kuopaspilitu opo tupameke ekolelo lietu. Otyo tyitukuatesako okutualako okusukukisa efendelo lietu, nevi tulinga, nomalusoke etu, nolutu luetu novipuka aviho tuna, ngetyi tyipopia ovitumino via Huku. Okulia oko tupu kutulongesa nokutukalesa tyafuapo opo tuundape unene movilinga viakolela vali pano pohi, ovilinga viokuivisa. Okuti ukahi apeho nokulitekula nawa nokulia oko?

OHAMBA ILONGESA OVALANDULI VAYO OPO VAIVISE OUYE AUHO

7. Ovilinga patyi viakolela Jesus ahimbika etyi ankho ekahi pano pohi, iya mavitualako alo pi?

⁷ Etyi Jesus ahimbika ovilinga viae viokuivisa pano pohi, wati: “Tupu ndyina okukaivisa onondaka onongwa Mbouhamba wa Huku komapundaumbo omakuavo, mokonda etyi, otyo neila.” (Luc. 4:43) Momanima etatu notyihupe, ovilinga ovio ankho viakolela unene ku Jesus. Walongesile ovalongwa vae okuti: “Tyina muenda, ivisei okuti: ‘Ouhamba wo keulu ukahi popepi.’” (Mat. 10:7) Etyi atutiliswa, Jesus wapopile okuti ovalanduli vae mavaivisa onondaka ombo “alo kononthele mbokokule-kule mbo ohi.” (Atos 1:8) Wevelaele okuti mevekuatesako movilinga ovio viakolela alo konthyulilo youye uno.​—Mat. 28:19, 20.

8. Oñgeni Ohamba yalundile ovalanduli vayo pano pohi opo vaivise?

⁸ Mo 1919, “onondaka onongwa Mbouhamba” ankho mbuhangununa otyipuka otyikuavo. (Mat. 24:14) Ohamba ikahi nokutumina keulu, iya yaonganeka otyikundyi otyitutu tyovalanduli vasukuka pano pohi. Ovo, vetavela nomutima auho otyitumino tyayandyuluka tya Jesus tyokuivisa ohi aiho onondaka onongwa mbokuti Ouhamba wa Huku ukahi nokutumina keulu! (Atos 10:42) Mongeleka, mu Tungonkhe yo 1922, ovanthu vehungi po 20.000 vaama Kouhamba, ankho vekahi motyionge tyovilongo ovinyingi ko Cedar Point, Ohio, mo America. Soka kehambu vakalele nalio etyi Omukuatate Rutherford alinga elongomona liati, “Ouhamba,” ati: “Talei outumini Wohamba! Onwe muvaivisi vae. Moluotyo, ivisei, ivisei, ivisei, Ohamba nouhamba wayo.” Ovanthu 2.000 ankho vekahi motyonge otyo, vaile movilinga viokuivisa, vamwe alo umwe vaendele onokilometu 72 okutunda mepundaumbo liotyonge opo vakaivise. Omphange umwe wati: “Himalimbui onthiki oyo tuakongwa opo tuivise Ouhamba, nombili yovanthu ankho vekahi potyonge otyo!” Mahi, haeko vala welitehelelele ngotyo.

9, 10. (a) Onosikola patyi mbutulongesa pala okuivisa? (b) Oñgeni ove wapolako ouwa kelongeso olio?

⁹ Mo 1922, ovaivisi Vouhamba valamba po 17.000 ankho vaundapa nombili movilongo 58 mouye auho. Mahi ankho vesukisa okulongeswa. Motyita tyotete, Ohamba yaholovonwa yaavelele ovalongwa vayo onondonga mbayandyuluka konthele yetyi vena okuivisa, nopi, noñgeni mavaivisa. (Mat. 10:5-7; Luc. 9:1-6; 10:1-11) Tupu hono, Jesus utala nawa opo aveho vaundapa movilinga viokuivisa Ouhamba vapewe onondonga, noviti viesukisa opo vaivise nounongo. (2 Tim. 3:17) Jesus ukahi nokuundapesa ewaneno Liovakristau opo alongese ovalanduli vae okuivisa. Onkhalelo imwe evelongesa Osikola Yovilinga via Huku ilingwa momawaneno alamba po 111.000 mouye auho. Osikola oyo ikahi nokulongesa ovaivisi valamba po nomiliau epanduvali oñgeni vena okuivisa, nokulongesa monkhalelo maikuatesako “ovanthu aveho.”​—Tanga 1 Coríntios 9:20-23.

¹⁰ Tupu kuna onosikola ononkhuavo pala okulongesa ovakulu vewaneno, novakokoli-ndyila, novakuatate vahanepele, Novakristau ovalinepi, novakulu vo Komisau yo Filiyale novakai vavo, novatalelipo vomawaneno novakai vavo, no Momisionaliu.c Ovakuatate vamwe vapita mosikola Yovakristau Ovalinepi vapandula nonondaka ombu: “Elongeso liavilapo tuapewa, liayawisa ohole yetu ku Jeova nokutukalesa tyafuapo nawa opo tukuateseko vakuetu.”

11. Oñgeni ovalanduli va Jesus vekahi nokutualako okuivisa namphila Satanasi evelwisa?

¹¹ Ondyale Satanasi iluete ononkhono ombo ambuho mbokuivisa nokulongesa onondaka onongwa. Ihanda okutalameka ovilinga viokuivisa iya mailingi atyiho ivila opo ilwise onondaka Mbouhamba navana vembuivisa. Mahi Satanasi kekahi nokutyivila. Jeova wapaka Omona wae “kombanda yomautumini aeho, nomauhamba, nounene.” (Efé. 1:20-22) Mokonda Jesus Ohamba, uundapesa outumini wae opo ayakulile nokuhongolela ovalongwa vae opo akale nonthumbi yokuti ehando lia Tate yae likahi nokulingwa.d Onondaka onongwa mbutualako nokuiviswa iya ovanthu ovanyingi ovakuatyili vekahi nokulongeswa onondyila mba Jeova. Tyotyili, tuna elao enene liokuundapa movilinga ovio oviwa!

OHAMBA YONGANEKA OVALANDULI VAYO OPO VAUNDAPE UNENE

12. Okupolelela mo 1914, oñgeni ovaumbili va Huku vaonganekwa nawa?

¹² Etyi Jesus ahimbika okutumina mo 1914, wakuatesako ovaumbili va Huku opo valinge ehando lia Tate yae monkhalelo yaongana nawa. (Tanga Isaías 60:17.) Mo 1919, kese ewaneno ankho muholovonwa onkhalamutwe yovilinga opo ahongolele ovilinga viokuivisa. Mo 1927, omawaneno ahimbika okuivisa apeho Movityalumingu. Mo 1931, ovaumbili va Jeova vahimbika okuihanwa okuti Onombangi mba Jeova, otyo atyiveavela ondundo yokuundapa vali movilinga Viouhamba. (Isa. 43:10-12) Okupolelela mo 1938, vana ankho vekahi komutwe mewaneno kavaholovonwa vali novakuatate mewaneno. Mahi opo vapewe otyilinga otyo, ankho vena ovitumino vesukisa okufuisapo. Okupolelela mo 1972, ovilinga viokuhongolela ewaneno ankho kavipewa vali omukuatate wike, mahi vipewa ovakulu aveho vewaneno. Ovakulu aveho vewaneno novakuatesiko vavo vapewa ondundo opo vakuateseko okunthita ewaneno. (1 Ped. 5:2) Mo 1976, ononkhalamutwe mbo Nombangi mba Jeova vaonganekwa mono komisau epandu opo vahongolele ovilinga Viouhamba ouye auho. Tunde opo, Jesus ukahi nokutualako okuonganeka ovalanduli vae vatualeko okulinga ovipuka monkhalelo Huku ahanda.

13. Etyi Ohamba Mesiya ekahi nokulinga mokueenda kuoutumini wae tyitukalesa ñgeni?

¹³ Tala ovipuka ovinyingi Ohamba Mesiya alinga mokueenda kuoutumini wae womanima 100. Ukahi nokusukukisa ovanthu pala enyina lia Jeova, nokuhongolela ovilinga viokuivisa onondaka onongwa movilongo 239, nokulongesa ovanthu ovanyingi opo vafende Jeova. Tupu ukahi nokuwaneka ovanthu ovakuatyili valamba ponomiliau epanduvali veliava nehambu pala okulinga ehando lia Tate yae. (Sal. 110:3) Tyotyili, Jeova ukahi nokuundapesa Ouhamba wa Mesiya opo alinge ovipuka oviwa. Mahi nkhele kuna vali ovipuka oviwa mavikamoneka komutwe!

ONONKHANO ONONGWA MOUHAMBA WA MESIYA KOMUTWE

14. (a) Oityi tukahi nokuita Huku alinge tyina tulikuambela okuti: “Ouhamba wove uye”? (b) Oipi otestu yetu yenima 2014, iya omokonda yatyi yaviukila?

¹⁴ Namphila Jeova avialeka Kouhamba Omona wae Jesus Kristu mo 1914, olio halioko ekumbululo liafuapo pala elikuambelo lietu, “Ouhamba wove uye.” (Mat. 6:10) Ombimbiliya yaulile okuti Jesus “makatumina pokati konondyale [mbae].” (Sal. 110:2) Ovatumini vovanthu vekahi nokuhongiliyua na Satanasi opo vayale Ouhamba. Tyina tulikuambela opo Ouhamba uye, tukahi nokuita Huku atume Ohamba Mesiya no nohamba 144.000 vapole kombanda yohi ovatumini vovanthu navana veyele Ouhamba. Otyo matyikafuisapo onondaka mba Daniel 2:44 mbati, Ouhamba wa Huku “maukahanyako omautumini atyo aeho nokuenyimako.” Maukahanyako ovatumini veyele Ouhamba. (Rev. 6:1, 2; 13:1-18; 19:11-21) Mokonda otyo matyimoneka apa katutu, tyaviuka otestu yetu yenima 2014 ikale Mateus 6:10 yati: “Ouhamba wove uye.” Palambale omanima 100 tunde etyi Jesus ahimbika okutumina keulu!

15, 16. (a) Ovipuka patyi oviwa mavikamoneka moutumini wa Kristu womanima ovityita ekwi? (b) Otyipuka patyi tyahulililako Jesus makalinga Mouhamba wae? Otyo matyihangununa tyi mevangelo lia Jeova?

¹⁵ Tyina Ohamba Mesiya amahanyeko onondyale mba Huku, makapaka Satanasi novilulu viae mokaleya avakalamo omanima ovityita ekwi. (Rev. 20:1-3) Mokonda kutupu vali una uhongiliya okulinga ovivi, Ouhamba maukakuatesako ovanthu opo vapole ouwa kotyilikutila tya Jesus, nokumanako ovivi viatuka konkhali ya Andau. Ohamba maikatutilisa ovanthu ovanyingi nokuonganeka ovilinga viokulongesa ovanthu ovo mouye auho onondyila mba Jeova. (Rev. 20:12, 13) Ohi aiho maikakala omphangu yombembwa ngetyi ankho tyikahi otyikunino otyo Endene, ovanthu aveho vekolelo mavakakala tyihena vali onkhali.

¹⁶ Konyima youtumini wa Kristu Womanima Ovityita Ekwi, ehando lia Jeova malikafuiswapo ohi aiho. Iya Jesus akakondola Ouhamba ku Tate yae. (Tanga 1 Coríntios 15:24-28.) Nawike vali makakala onkhalakati pokati ketu na Jeova. Ovana aveho va Huku keulu novo pohi mavakawanekua na Tate yavo wo keulu ngatyina ombunga yae.

17. Oityi ove watokola okulinga konthele Youhamba?

¹⁷ Ovipuka vihambukiswa vialingwa momanina 100 outumini Wouhamba vitulekesa okuti Jeova ukahi nokutumina, iya ehando liae pano pohi malifuiswapo. Tutualeiko okukala ovaumbili vae ovakuatyili nokuivisa Ohamba, Nouhamba wayo. Tuna onthumbi yokuti apa katutu Jeova makumbulula elikuambelo lietu: “Ouhamba wove uye”!