Onthele Yokulilongeswa 14
Okuti Ukahi Nokufuisapo Nawa Ovilinga Viokuivisa?
‘Tualako okuivisa onondaka onongwa, iya uundapela nawa Huku.’ — 2 TIM. 4:5, okatoi.
OTYIIMBO 57 Ivisa Kovanthu Vatyo Aveho
ETYI MATULILONGESAa
Konyima yetyi atutiliswa, Sesusi elivasi novalanduli vae iya evetumu opo ‘vakalinge ovalongwa.’ (Tala ono palagrafu 1)
1. Oityi ovaumbili va Huku vahanda okulinga, iya omokonda yatyi? (Tala olutalatu luo kondye.)
SESUSI KILISITU watuma ovalanduli vae opo ‘vende . . . avalingi ovalongwa vomalongo aeho.’ (Mat. 28:19) Ovaumbili ovakuatyili va Huku vahanda okunoñgonoka oñgeni mavetyivili okufuisapo nawa ovilinga viokuivisa. (2 Tim. 4:5) Ovilinga viokuivisa viakolela vali tyipona ovipuka ovikuavo momuenyo wetu. Tupu vialumbanesa unene. Mahi pamwe tyipondola okutupuiya okuundapa unene movilinga viokuivisa.
2. Ovitateka patyi vipondola okututyilika okufuisapo nawa ovilinga viokuivisa?
2 Pena ovipuka ovikuavo viakolela vitupola omuvo wetu nononkhono. Hamwe ononthiki ambuho tuundapa onoola ononyingi opo tulitekule ine tutekule ombunga yetu. Tupu hamwe tuesukisa okukuatesako ombunga yetu, hamwe tuvela, tuasoya ine hamwe tuakulupa. Oñgeni matufuisapo nawa ovilinga viokuivisa inkha tuna ovitateka ngovio?
3. Oityi tulilongesila konondaka tuvasa mu Mateusi 13:23?
3 Inkha una ovitateka vikutyilika okuundapa unene movilinga vya Siovaa, uhasoye. Sesusi ankho utyii-ale okuti matuave ovinyango vielikalaila movilinga Viouhamba. (Tanga Mateusi 13:23.) Siovaa upanda unene ononkhono tulinga iya tyakolela kwe, okumuundapela nomutima auho nokulinga atyiho tuvila. (Heb. 6:10-12) Mahi hamwe tuaimbuka okuti onkhalelo yomuenyo wetu ituyeka okuundapa vali unene. Monthele ei, matulilongesa oñgeni tupondola okupaka ovilinga viokuivisa pomphangu yo tete momuenyo wetu, nokutyinda omuenyo wapola pokati, nokuviukisa onkhalelo yetu yokulongesa movilinga viokuivisa. Mahi tete matukumbulula epulo liati: Oityi tyihangununa okufuisapo nawa ovilinga viokuivisa?
4. Oityi tyihangununa okufuisapo nawa ovilinga viokuivisa?
4 Okufuisapo nawa ovilinga viokuivisa tyihangununa okulinga atyiho tuvila movilinga viokuivisa nokulongesa. Mahi otyo katyilekesa vala omuvo tumanena movilinga viokuivisa. Tyakolela vali ku Siovaa, otyetyi tyikahi momutima wetu ine omokonda yatyi tuivisila. Onthue tuundapa nomutima auho movilinga vya Siovaab mokonda tumuhole, tupu tuhole ovanthu. (Malu. 12:30, 31; Kolo. 3:23) Okuumbila Siovaa nomutima auho, tyihangununa okuundapesa ononkhono mbetu nounongo wetu movilinga viae. Okunoñgonoka okuti okuivisa elao limwe enene, tyituavela ondundo yokupopila vakuetu onondaka onongwa.
5-6. Oñgeni omunthu apondola okupaka ovilinga viokuivisa pomphangu yo tete, namphila ehena omuvo omunyingi? Popia ongeleka.
5 Soka komukuendye umwe uhole okuhika otyihumba. Apeho tyina tyitavela uhika. Konthyulilo yo simanu ukahikila mombale otyo afetwa. Mahi onombongo afetwa mombale kambutuuka opo elitekule. Mokonda yotyo, okuhimbikila Tyasikunda alo Mutano utyinda ovanthu nomota. Namphila akala omuvo omunyingi nokuundapa nomota, mahi otyipuka ehole vali okuhika otyihumba. Utualako okulinga ononkhono mbokuhika vali nawa opo otyilinga tyae tyikale vala tyokuhika. Ngotyo, uundapesa kese omphitilo akala nayo opo ahike, alo umwe tyina omuvo wehehi.
6 Tyelifwa notyo, nove hamwe kuundapa unene movilinga viokuivisa ngetyi ankho uhanda. Mahi no ngotyo, otyo otyilinga uhole vali. Utualako okulinga ononkhono mbokuyawisa kounongo wove wokulongesa ovanthu onondaka onongwa. Mokonda una ovipuka ovinyingi wesukisa okulinga, hamwe ukahi nokulipula okuti: Oñgeni mandyipake ovilinga viokuivisa pomphangu yo tete momuenyo wange?
OÑGENI MOPAKE OVILINGA VIOKUIVISA POMPHANGU YO TETE?
7-8. Oñgeni tupondola okuhetekela onkhalelo Sesusi ankho atala ovilinga viokuivisa?
7 Sesusi wasapo ongeleka ongwa konthele yo ñgeni tuna okutala ovilinga viokuivisa. Otyipuka ankho tyakolela vali momuenyo wae okupopila vakuavo konthele Youhamba wa Huku. (Suau 4:34, 35) Waendele ovikambo ovile opo akaivise kovanthu ovanyingi. Ankho utaindya onomphitilo mbokupopia novanthu kese oku vavasiwa, tyilinge o momaumbo avo ine monomphangu ononkhuavo. Ovipuka aviho Sesusi alingile ankho vielikuata novilinga viokuivisa.
8 Onthue tuhetekela Sesusi tyina tutaindya onomphitilo mbokupopila ovanthu onondaka onongwa apeho tyina tyitavela. Alo umwe tuafuapo opo tuyekepo ovipuka vimwe tuhole opo tuundape vali movilinga viokuivisa. (Malu. 6:31-34; 1 Pet. 2:21) Vamwe mewaneno vaundapa ngovakokoli-ndyila, ovakuavo ovakokoli-ndyila vavilapo iya vamwe ovakokoli-ndyila vapola pokati. Ovakuatate vamwe velilongesa elaka ekuavo, vamwe vailukila kuna kuesukisa vali ovaivisi. Mahi ovilinga viokuivisa haunene vilingwa novakuatate mewaneno vekahi nokulinga atyiho vevila. Katyesukisile inkha tuundapa unene ine katuundapa unene movilinga viokuivisa, Siovaa ketuiti tulinge etyi tuhevili okulinga. Etyi ahanda vala kuonthue, okumuundapela nehambu putyina tutualako okuivisa “onondaka onongwa mba Huku wehambu.” — 1 Tim. 1:11; Deut. 30:11.
9. (a) Oñgeni Paulu apakele ovilinga viokuivisa pomphangu yo tete, namphila ankho ena okuundapa opo elitekule? (b) Ngetyi tyipopia Ovilinga 28:16, 30, 31, oñgeni Paulu ankho atala ovilinga viokuivisa?
9 Apositolu Paulu nae wetuhila ongeleka ongwa yokupaka ovilinga viokuivisa pomphangu yo tete momuenyo wetu. Etyi ankho eli mepunda-umbo lyo Korintu, ahimbika okutunga omakaka mokonda ankho utupu onombongo. Mahi otyilinga otyo, hatyoko ankho tyakolela vali kwe. Ankho ulinga otyilinga otyo opo elitekule, mokonda ankho kahande ova Kolindu vemulandele ovipuka esukisa. (2 Kol. 11:7) Namphila Paulu ankho esukisa okuundapa opo elitekule, mahi no ngotyo watuaileko okupaka ovilinga viokuivisa pomphangu yo tete, iya alo umwe ankho wivisa Movityasapalo aviho. Etyi onkhalelo yomuenyo wae yapiluluka, pahe ahimbika okuundapa vali unene movilinga viokuivisa. Ankho ‘uundapa unene okuivisa ondaka ya Huku, okuavela oumbangi ova Sundeu nokulekesa okuti Sesusi oe o Kilisitu.’ (Ovil. 18:3-5; 2 Kol. 11:9) Konyima, etyi ankho eli mepunda-umbo lyo Loma, ankho kapondola okutunda meumbo liae mokueenda kuomanima evali. Mokonda yotyo, Paulu ankho upopila onondaka onongwa vana vekemutalelapo, nokuhonekela ovakuatate omikanda. (Tanga Ovilinga 28:16, 30, 31.) Paulu ankho kahande otyipuka natyike tyimutyilike okupaka ovilinga viokuivisa pomphangu yo tete. Wahoneka okuti: “Tyetyi tuna otyilinga etyi . . . katuyeke-ko.” (2 Kol. 4:1) Ongeleka ya Paulu yalekesa nawa okuti alo umwe tyina tuundapa unene opo tutekule ombunga yetu, no ngotyo tupondola okupaka ovilinga vya Huku pomphangu yo tete momuenyo wetu.
Kuna ononkhalelo ononyingi mbokufuisapo nawa ovilinga viokuivisa (Tala ono palagrafu 10-11)
10-11. Oñgeni tupondola okufuisapo nawa ovilinga viokuivisa tyina tuavela?
10 Alo umwe inkha katutyivili okuundapa unene movilinga viokuivisa umbo na umbo mokonda tuvela ine tuakulupa, no ngotyo tupondola okuivisa mononkhalelo ononkhuavo. Ovakilisitau vo potyita tyo tete ankho vaovola ovanthu kese omphangu vavasiwa. Ankho vaundapesa onomphitilo ambuho opo valongese vakuavo otyili, tyilinge momaumbo avo ine omounyingi. (Ovil. 17:17; 20:20) Inkha katutyivili okueenda unene, tupondola okupumphama apa pakuata ovanthu ovanyingi otyo tuvepopila onondaka onongwa. Tupu tupondola okuava oumbangi tyina tuheli movilinga viokuivisa, nokuhonekela ovanthu omikanda, nokuivisa notelefone. Ovakuatate ovanyingi vehetyivili okuundapa unene movilinga viokuivisa umbo na umbo, vahambukwa unene okuivisa mononkhalelo ombo.
11 Namphila pena ovipuka vimwe uhevili okulinga mokonda yekongoko, no ngotyo upondola okufuisapo nawa ovilinga viokuivisa. Tusokei vali kongeleka ya Paulu. Wati: “Movipuka aviho ndyina ononkhono mokonda ya una undyavela epondolo.” (Fili. 4:13) Paulu wesukisile ononkhono ombo puetyi avelele moungendi wae woumisionaliu. Wapopilile ovakuatate ova Galata okuti: “Omokonda youvela wange nakalela nomphitilo yo tete yokumupopila onondaka onongwa.” (Gal. 4:13) Tupu ouvela wove upondola okukuavela onomphitilo mbokupopila onondaka onongwa o nofulumelu, novanthu ovakuavo vaundapa mosipitali. Ovanyingi povanthu ovo, vekahi nokuundapa tyina ovakuatate vakaivisa momaumbo avo.
OÑGENI MOTUALAKO NOMUENYO WAPOLA POKATI?
12. Oityi tyihangununa okukala neiho “litala nawa”?
12 Sesusi wati: “Otyimimi tyolutu eiho liove. Ngotyo inkha eiho liove litala nawa, [ine “okutala vala kotyipuka tyike,” okatoi] olutu luove aluho malukala motyimimi.” (Mat. 6:22) Otyo tyihangununa-tyi? Tyihangununa okuti tuna okukala nomuenyo wapola pokati nokutala vala kotyipuka tyike, atuhatalukwa novipuka ovikuavo. Sesusi wetuhila ongeleka ongwa. Ankho usuka vala novilinga viokuivisa, iya alongesa ovalongwa vae okutualako okuumbila Siovaa, nokuundapela Ouhamba. Onthue tuhetekela Sesusi tyina tusuka unene novilinga viokuivisa ‘atutualako okuovola tete Ouhamba nouviuki wa Huku.’ — Mat. 6:33.
13. Oityi tyipondola okutukuatesako okupaka ovilinga viokuivisa pomphangu yo tete?
13 Otyipuka tyimwe matyitukuatesako okupaka ovilinga viokuivisa pomphangu yo tete, okuhamanena omuvo wetu movipuka vihesukisile, opo tukale vali nomuvo wokukuatesako vakuetu okunoñgonoka Siovaa, nokukala nohole nae.c Mongeleka, okuti tupondola okutepulula komuvo tuundapa opo tuivise ononthiki mbumwe mosimanu? Okuti tupondola okutepulula komuvo tumanena movitalukiso?
14. Ovipuka patyi ovalinepi vamwe valinga opo vakale vali nomuvo wokuundapa movilinga viokuivisa?
14 Otyo tyalingile omukulu umwe wewaneno utiwa o Elias nomukai wae. Wati: “Ankho katupondola okukala ovakokoli-ndyila, mahi ankho pena ovipuka tupondola okulinga opo tuundape vali unene movilinga viokuivisa. Iya otyo umwe tualinga. Mongeleka, atuhimbika okupaka nawa onombongo, nokuyekapo ovitalukiso ankho vimana omuvo wetu, tupu atukaita kovahona vetu opo vatepulule komuvo tuundapa. Pahe ankho tuivisa kounthiki, atuyawisa kovalongwa vetu, iya alo umwe tuivisa mokati kosimanu ovikando vivali mohanyi. Otyo tyitukalesa nehambu!”
OÑGENI MOVIUKISA ONKHALELO YOVE YOKUIVISA NOKULONGESA?
Okuendela muetyi tulilongesa meliongiyo lyo mokati kosimanu matyitukuatesako okutualako okukala vali ovanongo movilinga viokuivisa (Tala ono palagrafu 15-16)d
15-16. Ngetyi tyapopia 1 Timotiu 4:13, 15, oñgeni tupondola okuyawisa kounongo wetu wokuivisa? (Tupu tala okakasa kati: “Etyi Mandyilingi opo Ndyifuisepo Nawa Ovilinga Viokuivisa.”)
15 Onkhalelo onkhuavo yokufuisapo nawa ovilinga viokuivisa, okuyawisa kounongo wetu wokulongesa. Ovanthu vamwe vaundapa, valongeswa opo vayawise kounongo wavo, avetyivili okufuisapo nawa ovilinga viavo. Tupu novaivisi Vouhamba ongotyo vekahi. Tuesukisa okutualako okuyawisa kounongo wetu movilinga viokuivisa. — Pro. 1:5; tanga 1 Timotiu 4:13, 15.
16 Mahi oñgeni tupondola okutualako okukala ovanongo movilinga viokuivisa? Oputyina tutala nawa omalekeso alingwa meliongiyo lyo mokati kosimanu. Eliongiyo olio litukuatesako okuyawisa kounongo wetu wokupopia novanthu movilinga viokuivisa. Mongeleka, tyina omuendesi weliongiyo apopila vana valinga ononthele mbavo ovipuka vesukisa okuviukisa, novipuka valinga nawa, nonthue tuna okutehelela nawa, atuimbuka etyi matyitukuatesako movilinga viokuivisa. Tupondola okuundapesa onondonga ombo tyina tupopia nomunthu umwe movilinga viokuivisa. Tupondola okuita ekuateso komukulu wotyikundyi tyetu tyokuivisa, nokuivisa nae. Tupu tupondola okuivisa novakuatate ovakuavo ovanongo mewaneno, novakokoli-ndyila, nomutalelipo womawaneno. Okutualako okuundapesa vali nawa Oviti Viokulongesa matyitukuatesako okuhambukilwa ovilinga vietu viokuivisa nokulongesa.
17. Ouwa patyi mopoloko inkha ufuisapo nawa ovilinga viokuivisa?
17 Tupandula unene Siovaa etyi etuavela omphitilo ‘yokuundapela kumwe nae’! (1 Kol. 3:9) Inkha “utala nawa ovipuka viesukisa vali,” opake ovilinga viokuivisa pomphangu yo tete momuenyo wove, “moumbila Siovaa nehambu.” (Fili. 1:10; Sal. 100:2) Upondola okukala nonthumbi yokuti Siovaa mekuavela ononkhono wesukisa opo ufuisepo nawa ovilinga viokuivisa, katyesukisile ovitateka una. (2 Kol. 4:1, 7; 6:4) Tyilinge uundapa unene movilinga viokuivisa ine onkhalelo yomuenyo wove kaikuyeke okuundapa unene, no ngotyo una “ehunga liokuhambukilwa” ovilinga viove mokonda uvilinga nomutima auho. (Gal. 6:4) Tyina ufuisapo nawa ovilinga viokuivisa, ulekesa okuti uhole Siovaa, nomunthele yove. Iya “mokulinga ngotyo moliyovola ove muene na vana vekutehelela.” — 1 Tim. 4:16.
OTYIIMBO 58 Tuovolei Omapanga Ombembwa
a Sesusi wetutuma okuivisa onondaka onongwa Mbouhamba nokulinga ovalongwa. Onthele ei maitukuatesako okunoñgonoka oñgeni tupondola okufuisapo nawa ovilinga viokuivisa alo umwe tyina tuna ovitateka. Tupu, matulilongesa oñgeni tupondola okuviukisa onkhalelo yetu yokuivisa opo tuhambukilwe ovilinga ovio.
b ONONDAKA MBAHANGUNUNWA: Ovilinga vya Siovaa viakutikinya okuivisa nokulongesa, novilinga viokutunga onondyuo Mbouhamba, nokukuatesako ovakuatate vamonekelwa noviponga. — 2 Kol. 5:18, 19; 8:4.
c Tala ovipuka epandu-vali viapopiwa mokakasa kati “Oñgeni Motyindi Omuenyo Wapola Pokati,” Momutala Womulavi wa Julho yo 2016, pefo 10.
d ONONDAKA MBOKUHANGUNUNA OLUTALATU: Omphange ukahi nokulinga elekeso meliongiyo lyo mokati kosimanu. Konyima, ahoneka momukanda wae Linga Ononkhono Mbokutanga Nokulongesa Nawa, tyina omuendesi apopia oñgeni onthele yaenda. Pahe konthyulilo yosimanu, uundapesa movilinga viokuivisa etyi elilongesa meliongiyo.