12. (a) Oityi Jesus apopia konthele yotyitei tyopaspilitu? (b) Oñgeni matuyeke otyimimi tyetu tyiliaime?

¹² Matulingi nawa vakuetu tyina tuvekuatesako okutambula otyimimi tyitunda ku Huku. (Salmo 43:⁠3) Jesus wapopilile ovalongwa vae okuti onue “mutyimimi tyouye.” Ayawisako okuti yekei otyimimi tyenyi tyiliaime, opo ovanthu vamone “ovilinga vienyi oviwa,” ine ovilinga oviwa valingila vakuavo. Jesus ankho ukahi nokupopia konthele yokupopila “ovanthu” otyili tyo Mbimbiliya, pala ouwa wavo. (Tanga Mateus 5:​14-16.) Hono, tuyeka otyitei tyetu tyiliaime, mokulingila vakuetu ovipuka oviwa, nokuivisa onondaka onongwa “ouye auho” “momalongo aeho.” (Mateus 26:13; Marcos 13:​10) Tuna elao enene liokulinga ovilinga ovio!

15. Oñgeni ovilinga vietu oviwa vikalesa ovanthu vamue?

¹⁵ Etyi Jesus amana okupopia konthele yokandiyelo katema, apopila ovalongwa vae okuti: “Tupu, nonue yekei otyitei tyenyi tyiliaimine ovanthu, vamone ovilinga vienyi oviwa, opo vankhimaneke Tate yenyi ukahi keulu.” Mokonda “yovilinga vietu oviwa” vamue “mavankhimaneka” Huku mokukala ovaumbili vae. Otyo, tyituavela ondundo yokutualako “okuliaima ngovimimi viouye!”​—⁠Filipenses 2:⁠15.

16. Opo tukale “otyimimi tyouye” tyihanda tulinge tyi?

¹⁶ Okukala “otyimimi tyouye” tyihanda tulipake movilinga viokuivisa Ouhamba wa Huku, nokulinga ovalongwa. Mahi, kuna vali etyi tuna okulinga. Apostolu Paulu wahoneka okuti, “Tualeiko okueenda ngovana votyitei, mokonda ovinyango viotyitei ouviuki, notyili, notyilinga atyiho otyiwa.” (Efésios 5:​8, 9) Tuesukisa okuliaimisa ovituwa vielikuata novitumino via Huku. Tuna okutavela onondonga mba Paulu wati: “Kalei novituwa oviwa pokati kovanthu vouye, opo namphila vemupopia okuti mulinga ovivi, mahi, mokonda yovituwa vienyi oviwa veete, vankhimaneke Huku monthiki yekoyeso.” (1 Pedro 2:​12) Mahi, tyina ovakuatate velinumanesa ankho oityi vesukisa okulinga?