Ombunga Ya Sesusi Yenda Ko Selusalei

Ankho o pomuvo wondyovo. Ngotyo, wehikapo omuvo ombunga ya Suse, kumwe nomapanga avo, novanthu velii navo, ankho vena okulipaka moungendi wa kese nima, okuenda ko Selusalei. Ankho vaya vakalinga otyipito tyo Pasikwa, ngetyi Ovitumino vipopia. (Deuteronômio 16:16) Okutunda ko Nasalee okuenda no ko Selusalei, paendwa onokilometulu 120. Pomuvo opo, ovanthu vakala novilinga ovinyingi, nehambu enene. Sesusi pahe ankho una omanima 12, ankho wesuka unene nokuenda kotyipito otyo, iya ankho makala nomphitilo yokuenda vali popepi yondyuo ya Huku.

Ku Sesusi nombunga yae, otyipito tyo Pasikwa ankho katyilambe vala monthiki ike. Tyina o Pasikwa yamalambe, onthiki ilandulako kuhimbika Otyipito Tyonombolo Mbahapakelwe Onkhiso tyilingwa mononthiki epandu-vali. (Maluku 14:1) Otyipito otyo, ankho tyitalwa ngatyina onthele imwe motyipito tyo Pasikwa. Okutunda keumbo liavo ko Nasalee, avakakala ko Selusalei, alo vakondoka vali keumbo liavo, ankho vetyilinga monosimanu onombali. Mahi enima eli, mokonda yotyipuka tyimwe Sesusi alinga, avakala-ko vali ehimbwe. Otyitateka otyo veketyimona vala, etyi vekahi mondyila, vekahi-ale nokutunda ko Selusalei.

Putyina ankho vekahi nokueenda, Suse na Maliya ankho vasoka okuti hamwe Sesusi ukahi pokati kovanthu ovakuavo velii navo, nomapanga avo. Etyi vatalama opo vapululukuepo kounthiki, avetyimono okuti Sesusi vetupu-e. Moluotyo, avahimbika okumuovola pokati ka vana vaenda navo, mahi avehemuvasi. Omona wavo ankho kekahi pokati kavo! Suse na Maliya avakondoka ko Selusalei okukemuovola.

Avaovola onthiki aiho, avehemumono. Avaovola vali onthiki ya vali, nii avehemuvasi. Monthiki ya tatu, avekemuvasa mondyuo ya Huku. Avamono Sesusi upumphi pokati kovalongesi vamwe vova Sundeu. Ankho ukahi nokutehelela etyi vapopia, otyo evelinga omapulo, iya ankho vahuva unene nenoñgonoko liae.

Maliya apulu okuti: “Mona wange, oityi wetulingila ñgaa? Ame na ho ankho tukahi nokukuovola unene.” — Luka 2:48.

Sesusi ahuvu etyi eiva okuti oku ekahi ankho kavekwii. Evepulu okuti: “Omokonda yatyi ankho mundyovolela? Ankho kamutyii okuti ame ndyina okukala mondyuo ya Tate yange?” — Luka 2:49.

Pahe ankho velivasa, Suse na Maliya avaende na Sesusi ko Nasalee iya Sesusi atualako okuvetavela. Ankho utualako okuyawisa enoñgonoko liae, nokukula. Namphila ankho nkhele omona, ankho wapandwa na Huku, novanthu. Ngotyo, okutuka puetyi omututu, okuenda no komutwe, Sesusi wasa-po ongeleka ongwa, ha yokuovola vala ovilinga vya Huku, mahi no yokutavela kovo tate yae.