Oñgeni Jesus Ankhimaneka Ouviuki Wa Huku

“Huku wemupakula [Kristu] opo akale otyilikutila tyokuhita ononkhali, mokonda yekolelo mohonde yae. Huku wetyilinga opo alekese ouviuki wae.”—ROMANOS 3:25.

1, 2. (a) Oityi Ombimbiliya itulongesa konthele yonkhalelo yovanthu? (b) Omapulo patyi maakumbululwa monthele ino?

EHIPULULO Liombimbiliya konthele youmphuki wapita motyikunino tyo Endene liiwe nawa. Onthue atuho tuivite etyi tyatuka konkhali ya Andau, ngetyi tyahangununwa mo nondaka ombu mbati: “Mokonda yomunthu wike vala onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.” (Romanos 5:12) Namphila tulinga ononkhono ononene mbokulinga etyi tyaviuka, mahi, tulinga oviponyo, moluotyo tuesukisa okuevelwa na Huku. Alo umwe apostolu Paulu weliyava okuti: “Otyiwa ndyihanda, hityilingi, mahi otyivi nahahande, otyo ndyilinga. Ame ndyipongo!”—Romanos 7:19, 24.

² Onkhalelo yetu yonkhali ikatula omapulo aa akolela: Oñgeni Jesus omu Nazare atyitwa tyahapiñganene onkhali? Omokonda yatyi ambatisalelwa? Oñgeni onkhalelo yomuenyo wa Jesus yankhimaneka ouviuki wa Jeova? Tyolela vali unene, oityi ononkhia mba Kristu mbafuisapo?

Ouviuki wa Huku Watyitukiluapo

3. Oñgeni Satanasi akembele Eva?

³ Ovotate yetu votete, Andau na Eva, valinga owova “okuanya Ouhamba wa Huku, avetavela okutuminwa nonyoka yokonthuko, iihanwa okuti Eliapu Satanasi.” (Revelação [Apocalipse] 12:9) Tala oñgeni otyo tyaenda. Satanasi wapopia okuti onkhalelo ya Jeova Huku yokutumina kayaviukile. Oe wetyipopia etyi apula Eva okuti: “Otyili Huku wemutolela okuti muhaliei komiti aviho vio motyikunino?” Eva wapitulula otyitumino tya Huku tyayandyuluka nawa tyeveilika okukuata komuti wike vala, opo vahankhie. Satanasi atendeleya Huku okuti onkhembi. Eliapu liati: “Tyotyili kamamunkhi.” Oe walimbilika Eva okumutavelesa okuti Huku ukahi nokuholeka otyipuka tyimwe otyiwa. Nokuti, inkha alia kotyinyango otyo, oe makala nga Huku, iya ahatuminwa vali na Huku.—Gênesis 3:1-5.

4. Oñgeni ovanthu veya okukala moutumini omuvi wa Satanasi?

⁴ Ngotyo, Satanasi wapopia okuti ovanthu mavakala vali nehambu inkha kavatuminwa na Huku. Andau kaamenene ouhamba waviuka wa Huku, anthi, watavela komukai wae elipake kumwe nae mokuetavela okulia otyinyango tyailikwa. Ngotyo, Andau wayekapo oupanga wae omuwa na Jeova, iya etuetela omutengi omuvi wonkhali no nonkhia. Tupu, ovanthu vanyingiyua moutumini omuvi wa Satanasi, “Huku youye uno.”—2 Coríntios 4:4, Tradução interconficional; Romanos 7:14.

5. (a) Oñgeni Jeova alekesa okuti onondaka mbae ombotyotyili? (b) Ekevelelo patyi Huku aavela ovana va Andau na Eva?

⁵ Opo afuisepo onondaka mbae, Jeova wahitisa Andau na Eva mononkhia. (Gênesis 3:16-19) Mahi, otyo katyilekesa okuti ehando lia Huku liaponya. Malifuisuapo! Etyi Jeova akoyesa Andau na Eva, walekesa okuti ovana vavo vena ekevelelo ewa. Wapopia ehando liae liokueta “ombuto” ina Satanasi ankho makanumata kotyikomeko. Anthi, Ombuto oyo yalaelwe, ankho maiveluka otyipute otyo, iya ‘aikamiangula omutwe wa [Satanasi].’ (Gênesis 3:15) Ombimbiliya otyo yetyilekesa nawa mokupopia konthele yonondaka mba Jesus mambulandulako mbati: “Otyo Omona wa Huku aholololelwa, opo ahanyauneko ovilinga vie Liapu.” (1 João 3:8) Mahi, oñgeni ovituwa via Jesus nononkhia mbae viankhimaneka ouviuki wa Huku?

Oityi Ombatisimu ya Jesus Ihangununa

6. Oñgeni tutyii okuti Jesus kapiñganene onkhali ya Andau?

⁶ Tyina ankho Jesus amekulu, ankho una okukala nga Andau etyi nkhele ehenelinge onkhali. (Romanos 5:14; 1 Coríntios 15:45) Otyo tyilekesa okuti oe ankho una okutyitwa tyehena onkhali. Otyo ankho matyiende ñgeni? O andyu Gabrieli yahangununina nawa Maliya ina ya Jesus okuti: “Ospilitu sandu maikuwila, iya epondolo lio Mukulami malikufiki. Moluotyo, tupu omona matyitwa matiwa osandu, Omona wa Huku.” (Lucas 1:35) Ponthyimbi yomuenyo wa Jesus, Maliya tyafuile wemupopilile ovipuka vimwe konthele yokutyitwa kuae. Ngotyo, nthiki imwe etyi Maliya na Jose tate ya Jesus koutekuli vemuvasa mondyuo ya Huku, omona Jesus apulu okuti: “Kamutyii okuti ame ndyina okukala mondyuo ya Tate yange?” (Lucas 2:49) Tyimoneka nawa okuti, tunde pouna Jesus ankho utyii okuti oe Omona wa Huku. Ku Jesus okuhivilika enyina lia Huku ankho tyakolela unene.

7. Ovipuka patyi viakolela Jesus ankho ena?

⁷ Jesus walekesile okuti wesuka novipuka via Huku mokukala apeho momaliongiyo okufenda. Mokonda omutima wae ankho utupu onkhali, oe ankho upondola okunoñgonoka atyiho atehelela netyi atanga Movihonekwa vio Hebreu. (Lucas 4:16) Tupu ankho una otyipuka otyikuavo tyakolela. Ankho una olutu luhena nkhali apondola okuava ngotyilikutila pala okuyovola ovanthu. Etyi ambatisalwa, Jesus ankho ukahi nokulikuambela iya tyafuile ankho ukahi nokusoka konondaka mbeulo likahi mu Salmo 40:6-8.—Lucas 3:21; tanga Hebreus 10:5-10.a

8. Oityi João Batista ankho ahahandelele okumbatisala Jesus?

⁸ João Batista potete ankho kahandele okumbatisala Jesus. Omokonda yatyi? Omokonda João ankho ukahi nokumbatisala ova Judeu okulekesa okuti velivela Ononkhali. Iya mokonda João na Jesus ankho ombunga, oe ankho utyii okuti Jesus omuviuki, kesukisa okulivela. Iya Jesus akumbulula João okuti Kwe tyaviuka ambatisalwe. Moluotyo, Jesus wahangununa okuti, “otyiwa tulinge atyiho tyaviuka.”—Mateus 3:15.

9. Oityi ombatisimu ya Jesus ankho ilekesa?

⁹ Mokonda Jesus ankho utupu nkhali, oe ankho utyii okuti nga Andau, nae ankho upondola okutyita ovana vehena onkhali. Anthi, Jesus kenekale nehando liatyo olio, mokonda hatyoko Jeova emutuma okulinga. Huku ankho watuma Jesus pano pohi opo alinge otyilinga Tyombuto ankho yalawa ine o Mesiya. Omo ankho muakutikinya otyilikutila Jesus ankho ena okulinga nomuenyo wae uhena onkhali. (Tanga Isaías 53:5, 6, 12.) Tyotyili, ombatisimu ya Jesus kaihangununa otyipuka tyike no yetu. Ankho kailekesa okulipakula ku Jeova, mokonda Jesus ankho ukahiale melongo lio Isilayeli lielipakulale ku Huku. Anthi, Ombatisimu ya Jesus ankho ilekesa okuti welieta oe muene pala okulinga ehando lia Huku liapopiwa Movihonekwa konthele ya Mesiya.

10. Okukala Mesiya pala okulinga ehando lia Huku ankho tyakutikinya tyi? Oñgeni Jesus afuisapo otyilinga otyo?

¹⁰ Movilinga Jeova ahandele Jesus alinge, ankho muakutikinya okuivisa onondaka onongwa Mbouhamba wa Huku, nokulinga ovalongwa, nokuvepongiya opo vatualeko nokulinga ovilinga ovio komutwe. Jesus okulieta oe muene, tupu ankho tyakutikinya ehando liokukoleleya mononkhumbi no nonkhia onombi, opo aamene Ouhamba waviuka wa Jeova Huku. Mokonda Jesus ankho uhole tyili Tate yae keulu, ankho una ehambu liokulinga ehando lia Huku, iya ahambukwa unene okuava olutu lwae ngotyilikutila. (João 14:31) Tupu, wahambukilue okunoñgonoka okuti esilivilo liotyilikutila tyomuenyo wae uhena nkhali, ankho tyipondola okupakulwa ku Huku ngofeto opo etuyovole moupika wonkhali no nonkhia. Okuti Huku wapanda etyi Jesus elieeta oe muene opo alinge ovilinga ovio viakolela unene? Enga!

11. Oñgeni Jeova alekesa okuti wetavela okuti Jesus o Mesiya walaelue ine o Kristu?

¹¹ Ovahoneki aveho vono Evandyeliu ononkhuana, vapopia neyandyuluko onondaka mba Jeova Huku mbokupanda Jesus, puetyi ankho atunda momeva Menyana Jordau. João Batista wati: “Namona ospilitu ilauka keulu ngo pomba, iya aikala kwe [Jesus] . . . Iya ame neimona, andyiave oumbangi wokuti ou oe Omona wa Huku.” (João 1:32-34) Tupu, onthiki onkhuavo, Jeova wati: “Ou Omona wange onthyolwa, ame napanda unene.”—Mateus 3:17; Marcos 1:11; Lucas 3:22.

Watualeleko Nekolelo Alo Ankhia

12. Oityi Jesus alinga momanima etatu no nohanyi epandu etyi ambatisalwa?

¹² Momanima etatu no nohanyi epandu mbalandulako, Jesus waundapele nombili onene, okulongesa ovanthu konthele ya Tate yae nokulekesa okuti ouhamba wa Huku waviuka. Walingile oungendi omunene Motyilongo Tyalaelwe okuenda konomphai aponwa, mahi natyike tyemutyilikile okuava oumbangi konthele yotyili. (João 4:6, 34; 18:37) Jesus walongesa vakuavo konthele Youhamba wa Huku. Wavelulile ovavei, nokuavela okulia ovanthu ovanyingi ankho vankhia ondyala, nokupindulapo alo umwe vokuankhia. Ngotyo, oe walekesa etyi Ouhamba wa Huku maukalinga pala ovanthu.—Mateus 11:4, 5.

13. Oityi Jesus alongesile konthele yokulikuambela?

¹³ Jesus kelipandele oe muene mokonda yetyi ankho alongesa nokuvelula ovanthu. Anthi, waava ongeleka ongwa mokunkhimaneka Jeova nomutima weliola movilinga ovio aviho. (João 5:19; 11:41-44) Jesus tupu wapopia ovipuka viakolela vali onthue tuesukisa okuita momalikuambelo. Momalikuambelo etu tuna okuita opo enyina lia Huku, Jeova, “lisukukiswe.” Tupu tuna okuita opo ouhamba waviuka wa Jeova upinge outumini omuvi wa Satanasi, opo ‘ehando liae lilingwe pano pohi, ngetyi lilingwa keulu.’ (Mateus 6:9, 10; okatoi.) Tupu Jesus wetulondola opo tulinge ngetyi tuita momalikuambelo etu, ‘mokupaka tete ouhamba wa [Huku] nouviuki Wae.’—Mateus 6:33.

14. Namphila Jesus ankho utupu nkhali, oityi ankho esukisila okulinga ononkhono opo afuisepo otyilinga tyae mehando lia Huku?

¹⁴ Etyi omuvo wononkhia mba Jesus ankho mbukahi popepi, oe wasukalalele unene mokonda yotyilinga otyinene ankho ena. Jesus ankho wesukisa okukoleleya ononkhumbi nononkhia onombi pala okulekesa ehando lia Tate yae novituwa viae oviwa. Etyi ankho kuakambela ononthiki ononthano kononkhia mba Jesus, oe elikuambela okuti: “Pahe omutima wange wasukalala unene, iya oityi mandyipopi? Tate, ndyovole moola ino. Mahi etyi, otyo neila moola ino.” Etyi Jesus apopia onondaka ombo, apilulula olusoke lwae, okusoka kotyipuka tyakolela vali unene, iya elikuambela okuti: “Tate nkhimaneka enyina liove.” Jeova emukumbulula liwa okuti: “Ame nelinkhimanekale, ngetyi mandyilinkhimaneka vali.” (João 12:27, 28) Tyotyili Jesus ankho wafuapo pala okukoleleya mononkhumbi ononene mbuhenemonwe nomunthu nawike. Mahi, okutehelela onondaka ombo ku Tate yae keulu, tyotyili tyaavela Jesus onthumbi onene yokuti metyivili okunkhimaneka nokuamena Ouhamba wa Jeova. Iya etyivili umwe!

Oityi Ononkhia mba Jesus Mbafuisapo

15. Etyi ekahi nokunkhia, oityi Jesus apopila okuti: “Atyiho tyafuapo”?

¹⁵ Etyi Jesus apapelwa momuti wemone, pokutula omuenyo, oe wati: “Atyiho tyafuapo!” (João 19:30) Nombatelo ya Huku Jesus wetyivila okufuisapo ovipuka ovinene mokueenda kuomanima etatu no nohanyi epandu, tunde pombatisimu yae alo pononkhia mbae! Etyi Jesus ankhia, apaende otyinimawe otyinene, iya ondyai yomafualali o Roma ankho ukahipo apopi okuti: “Tyotyili, ou ankho Omona wa Huku.” (Mateus 27:54) Tyafuile efualali olio ankho liamona Jesus ulingwa omukuele, mokonda yetyi ati oe Mona wa Huku. Namphila Jesus amoneswa ononkhumbi ononene, mahi watualako nekolelo liae, iya alekesa okuti Satanasi onkhembi onene. Satanasi wapopia konthele ya kese umwe wamena ouhamba wa Huku, okuti: “Omunthu maave ovipuka aviho ena, mokonda yomuenyo wae.” (Jó 2:4, Nova Tradução na linguagem de hoje) Mokonda yekolelo liae, Jesus walekesa okuti Andau na Eva ankho vapondola okutualako nekolelo liavo mokapuka kana okatutu valolwa. Tyakolela unene kuaviho, omuenyo wa Jesus no nonkhia mbae, viaamena ouhamba waviuka wa Jeova nokuunkhimaneka. (Tanga Provérbios 27:11.) Okuti ononkhia mba Jesus mbuna etyi mbafuisapo? Enga!

16, 17. (a) Omokonda yatyi Ovakristau vokohale onombangi mba Jeova vetyivilile okukala ovaviuki nae? (b) Ondyambi patyi Jeova aavela Omona wae mokonda yekolelo liae, iya oityi Tatekulu Jesus Kristu atualako okulinga?

¹⁶ Ovaumbili ovanyingi va Jeova vakaleleko etyi Jesus eheneye pano pohi. Ovo vena oupanga omuwa na Huku, nokuna ekevelelo lietutilo. (Isaías 25:8; Daniel 12:13) Mahi, oñgeni omusukuki Huku, Jeova apondola okuavela monkhalelo oyo ononkhano onongwa ovanthu ovakuankhali? Ombimbiliya ihangununa okuti: “Huku wemupakula [Jesus Kristu] opo akale otyilikutila tyokuhita ononkhali mokonda yekolelo mohonde yae. Huku wetyilinga opo alekese ouviuki wae, mokonda ankho ukahi nokuevela ononkhali mbalingwa kohale, puetyi oe ankho akoleleya vala. Opo Huku alekese ouviuki wae mononthiki mbuno, opo akale omuviuki, alo umwe tyina apopia omunthu wokuna ekolelo mu Jesus okuti omuviuki.”—Romanos 3:25, 26.b

¹⁷ Jeova wayamba Jesus mokumututilisa opo akakale novilinga viavilapo vina ankho ena etyieheneyepano pohi. Jesus pahe, omona wopaspilitu uhankhi. (Hebreus 1:3) Ngomunene-nakwa nohamba, Tatekulu Jesus Kristu utualako okukuatesako ovalanduli vae opo vankhimaneke ouviuki wa Huku. Tupandula unene tyetyi Tate yetu keulu, Jeova Omufeti waveho vankhimaneka ouviuki wae nokutualako okumuumbila nekolelo okuhetekela Omona wae!—Tanga Salmo 34:3; Hebreus 11:6.

18. Oityi matukelilongesa monthele mailandulako?

¹⁸ Ovanthu aveho vekolelo vakondoka mondyila ya Abele, vena oupanga omuwa na Jeova mokonda vena ekolelo nonthumbi Mombuto yalaelwe. Jeova ankho utyii okuti Omona wae matualako nekolelo iya ononkhia mbae mambukahita “ononkhali mbouye.” (João 1:29) Ononkhia mba Jesus tupu mbuetela ouwa ovanthu vena omuenyo hono. (Romanos 3:26) Ngotyo, ouwa patyi otyilikutila tyofeto tya Jesus tyipondola okukuetela? Otyo matuketyililongesa monthele mailandulako.

[Onondaka Poutoi]

Oñgeni Ove Mokumbulula?

• Oñgeni ouviuki wa Huku watyitukiluapo?

• Oityi ombatisimu ya Jesus ankho ilekesa?

• Oityi ononkhia mba Jesus mbafuisapo?

[Olutalatu pefo 15]

Ove utyii oityi ombatisimu ya Jesus ankho ilekesa?