Suau Batisita Uviukisa Ondyila

Palamba omanima 17 tunde etyi Sesusi akalele mondyuo ya Huku, otyo alinga omapulo ovalongesi etyi nkhele ankho ena omanima 12. Pahe enima 29 P.K. pondyovo. Ovanthu ovanyingi vekahi nokupopia konthele ya Suau, ombunga ya Sesusi, ankho ukahi nokuivisa motyilongo atyiho, koutakelo wekumbi konthele Kondongi yo Solondau.

Suau omunthu ankho welikalela, tyilinge molutu tyilinge mokupopia. Ovikutu ankho avala vilingwa nombandwa yekamelu iya ankho uvala epoha liahikwa nawa. Suau ankho ulia ovimphunia-mphunia, nowiki. Oityi ankho aivisa? Ankho uti: “Livelei, mokonda Ouhamba wo keulu ukahi popepi.” — Mateusi 3:2.

Onondaka mba Suau ankho mbulunda unene ovanthu vembutehelela. Ovanyingi avanoñgonoka okuti vesukisa okulivela, avapilulula ovituwa viavo iya avayekepo onkhalelo yavo yomuenyo ihekahi nawa. Ovanthu ankho veya kwe, vatunda mo “Selusalei no vomo Sundeya aiho, novanthu vo movilongo vikala popepi no Solondau.” (Mateusi 3:5) Ovanthu veile ku Suau, ovanyingi puvo velivelele. Iya ngwe evembatisala, okuvenyingiya onthui-twi momaande mondongi yo Solondau. Omokonda yatyi?

Suau ankho umbatisala ovanthu otyilekeso ine enyingilikilo liokuti velivela nomutima auho ononkhali ankho valinga mokuhetavelele Ovitumino viomphango ya Huku. (Ovilinga 19:4) Mahi, ha aveho vakalele tyafuapo. Etyi ononkhalamutwe mbonongeleya, ova Faliseu nova Sanduseu veya kwe, Suau wevepopilile okuti: ‘Onwe muvana vonombuta.’ Evepopila okuti: “Lingei ovilinga vilekesa okuti muelivela. Muhapopiei vala etyi musoka okuti, ‘Ambalaiau o tate yetu.’ Ame ndyimupopila okuti Huku upondola okutyitula omamanya aa, aakala ovana va Ambalaiau. Onkhava yapakwa-le pehina liomiti. Ngotyo, omuti una uhaimi ovinyango oviwa mautyokwa-po auyumbwa motupia.” — Mateusi 3:7-10.

Ovanthu ovanyingi ankho vekahi nokutavela Suau, mokonda onondaka apopia ankho mbuna epondolo enene iya ambatisala ovanthu ovanyingi, moluotyo, ovanakwa nova Levita avatumwa vekemupule okuti: ‘Ove, ove-lie?’

Suau akumbulula, eheliholeka, ati: “Ame hame-ko Kilisitu.”

Avati: ‘Muaina ove-lie? Ove Eliya?’

Ngwe ati: “Hame-ko.”

Avemupulu okuti: “Ove Umuuli?” Ankho vasoka komuuli omunene Moisesi apopile okuti meya. — Deuteronômio 18:15, 18.

Suau ati: “Au!”

Avatualako okumukuluminya apopie, avapulu vali okuti: ‘Ove, ove-lie? Tupopile opo tukakumbulule ava vetutuma. Ove muene uliti ove-lie?’ Suau evekumbulula okuti: “Ame una ukahi nokuliyavela moluhandya, okuti: ‘Viukisei ondyila ya Siovaa,’ ngetyi omuuli Isaiya apopia.” — Suau 1:19-23.

Ankho pahe vahanda okutyinoñgonoka, avapulu okuti: “Omokonda yatyi umbatisalela inkha have-ko Kilisitu, have-ko Eliya, have-ko Muuli?” Suau evekumbulula okuti: “Ame ndyimbatisala nomaande. Pokati kenyi pena ou muhei, ou meya konyima yange, ame hatokalele okumukutulula ononkhuto mbononkhaku mbae.” — Suau 1:25-27.

Tyotyili, Suau ankho utyii okuti ukahi nokuviukisa ondyila, okupongiya omitima viovanthu opo vetyivile okutavela Mesiya walaelwe, una ankho makala Ohamba. Muene wetyipopia okuti: “Una meya konyima yange omunene vali tyipona ame, ame hityivili okumulula ononkhaku mbae.” (Mateusi 3:11) Ngotyo, Suau alo umwe apopi okuti: “Ou meya konyima yange omunene vali tyipona ame, mokonda oe watetekela okuya kouye ku ame.” — Suau 1:15.

Moluotyo, onondaka mba Suau mbokuti, “livelei, mokonda Ouhamba wo keulu ukahi popepi,” ankho mbaviuka. (Mateusi 3:2) Ankho mbukahi nokulekesa ovanthu okuti ovilinga vya Huku mavilingwa Nohamba ya Siovaa, Sesusi Kilisitu, mavihimbika.