Omokonda Yatyi Tuhongolelwa Nospilitu Ya Huku?

“Ove Huku yange. Ospilitu yove ongwa, inthyongolele.”—SALMO 143:10.

1. Oityi omunthu uhei nawa ondyila apondola okulinga?

LUMWE waendeliale mondyila uhei nawa? Okuenda mondyila uhei, wesukisa okuhongolelwa nomunthu wii nawa ondyila oyo. Mokonda inkha kuhongolelwa kumehiki oku wenda nako, nokuimbuka apa ukahi. Mokueenda kuomanima omanyingi, tyina ovanthu valinga oungendi, valanda omapa ine okuovola omunthu wii nawa ondyila opo evehongolele.

2, 3. (a) Ononkhono patyi mbavilapo Jeova aundapesa kohale-hale? (b) Oñgeni tutyii okuti ononkhono mba Huku mbupondola okutuhongolela hono?

² Pena ononkhono mbahamoneka mbesukisa unene pala okutuhongolela. Ononkhono patyi? Ononkhono ombo mbapopiwa mono versikulu mbotete Mbombimbiliya. Omukanda wa Gênesis utupopila etyi Jeova alinga kohale-hale, okuti: “Ponthyimbi Huku watunga eulu noohi.” Tutyii okuti oe waundapesa ononkhono mbavilapo opo atunge ovipuka, mokonda Ombimbiliya itualako okuti: “Ononkhono mba Huku, ankho mbuendaenda.” (Gênesis 1:1, 2) Oityi ankho tyikahi nokuundapa? Ospilitu sandu, ononkhono mbuundapa mba Huku. Tupandula Jeova waundapesa ospilitu sandu yae pala okutuavela omuenyo nokutunga ovipuka aviho.—Jó 33:4; Salmo 104:30.

³ Tutyii okuti Jeova waundapesa ononkhono mbae mbuundapa opo etutunge, mahi okuti ononkhono ombo mbuhongolela omuenyo wetu? Omona wa Huku Jesus ankho utyii okuti mbutuhongolela, mokonda wapopila ovalongwa vae okuti: “Ospilitu . . . maimuhongolela kotyili atyiho.” (João 16:13) Ospilitu oyo oityi? Omokonda yatyi tuhandela okuhongolelwa nayo?

Ospilitu Sandu Oityi

4, 5. (a) Vokutavela Koutatu Ukola vena olusoke patyi luahaviukile konthele yospilitu sandu? (b) Oñgeni upondola okuhangununa oityi ospilitu sandu?

⁴ Tyotyili, ovanthu vamwe upopia navo movilinga viokuivisa vena olusoke luelikalela konthele yospilitu sandu. Ovanthu vokutavela kelongeso Lioutatu Ukola, vena olusoke luhaviukile luokuti ospilitu sandu omunthu welifua na Huku Tate. (1 Coríntios 8:6) Mahi, elongeso Lioutatu Ukola lielikalela unene netyi tyipopia Ovihonekwa.

⁵ Mahi, ospilitu sandu oityi? Okatoi mu Gênesis 1:2, mo Tradução do Novo Mundo das Escrituras Sagradas com Referências, kati: “Ondaka yo [Hebreu] rú·ahh yapitiyua ‘ospilitu’ tupu yapitiyua okuti ‘omphepo,’ nonondaka ononkhuavo mbulekesa okuti ononkhono mbuundapa, mbuhamoneka.” (Eleka noutoi mu Gênesis 3:8; 8:1.) Ngetyi omphepo ihamoneka mahi ina ononkhono, tupu ospilitu sandu hamunthu, kaimoneka mahi yundapa. Ospilitu oyo, ononkhono mba Huku mbuundapa movanthu ine o movipuka opo afuisepo ehando liae. Okuti tyipuiya okutavela okuti ononkhono ombo mbuhuvisa mbutunda ku Huku Wepondolo Aliho? Au!—Tanga Isaías 40:12, 13.

6. Oityi David aita ku Jeova?

⁶ Okuti Jeova matualako okuundapesa ospilitu yae opo ituhongolele? Oe walaele David okuti: “Ame mandyikulongo onondunge, mandyikulekesa ondyila una okuendela.” (Salmo 32:8) Okuti David ankho wetyihandele? Enga, otyo aitila ku Jeova okuti: “Ndongese okulinga ehando liove, mokonda ove Huku yange. Ospilitu yove ongwa, inthyongolele.” (Salmo 143:10) Tuesukisa okukala nga David, okuhanda okuhongolelwa nospilitu ya Huku. Mokonda yatyi? Tutalei omahunga ekuana.

Katutyivili Okulihongolela

7, 8. (a) Omokonda yatyi katutyivili okulihongolela tyehena ombatelo ya Huku? (b) Ongeleka patyi itukuatesako okunoñgonoka omokonda yatyi tuesukisila ehongolelo lia Huku mouye uno wovivi?

⁷ Tete, tuhanda okuhongolelwa nospilitu ya Huku mokonda katutyivili okulihongolela. “Okuhongola” tyihangununa “okulekesa ondyila omunthu opo eilandule.” Anthi, Jeova ketutungile nepondolo liokulihongolela, haunene mokonda tuvakuankhali iya tulinga oviponyo ovinyingi. Omuuli Jeremia wahoneka okuti: “Tatekulu ndyityii nawa okuti ovanthu kavetyivili okuhongolela onondyila mbavo muene.” (Jeremias 10:23, Tradução João Ferreira de Almeida) Omokonda yatyi? Huku wapopila Jeremia omokonda yatyi. Wati: “Omutima omukengeleli unene upona kese tyipuka, nokuhena ekevelelo. Olie upondola okuunoñgonoka?”—Jeremias 17:9; Mateus 15:19.

⁸ Hawova omunthu uhena ounongo okuenda aike mehoko, tyihena ou umuhongolela? Inkha omunthu ketyii oñgeni mahupu momphangu ngoyo, noñgeni mavasi ondyila ikahi nawa, mapake omuenyo wae motyiponga. Tupu omunthu usoka okuti upondola okuhongolela ondyila yae mouye uno wovivi tyihahongolelua na Huku, upaka omuenyo wae motyiponga. Opo tutyivile okuenda nawa mouye uno, tuesukisa okulikuambela ku Jeova nga David wati: “Onomphai mbange mbuendele vala monondyila mbove, tyotyili onomphai mbange kamambusesunuka.” (Salmo 17:5; 23:3) Oñgeni matuhongolelwa?

9. Ngetyi tyalekeswa pefo 19, oñgeni ospilitu ya Huku ipondola okutuhongolela?

⁹ Inkha tuliola omutima nokutavela ku Jeova, oe metuavela ospilitu yae opo ituhongolele. Oñgeni ononkhono ombo mambutukuatesako? Jesus wapopila ovalongwa vae okuti: “Omukuatesiko, ospilitu sandu, Tate matumikisa menyina liange, maimulongesa ovipuka aviho, nokumuhinangelesa ovipuka aviho nemulongesa.” (João 14:26) Inkha tulikuambela apeho nokulilongesa Ondaka ya Huku, okukutikinyamo omalongeso a Kristu, ospilitu sandu maitukuatesako okunoñgonoka ounongo wa Jeova opo tumutavele. (1 Coríntios 2:10) Tupu, inkha tutumbukilwa natyimwe, ospilitu maitukuatesako okunoñgonoka etyi matulingi. Maituhinangelesa onondonga Mbombimbiliya tuelilongesale nokutuvatela okunoñgonoka oñgeni matumbulandula opo tulinge omatokolo omawa.

Jesus Wahongolelwa Nospilitu ya Huku

10, 11. Oityi Omona wa Huku wongunga ankho akevelela konthele yospilitu sandu, iya oñgeni ospilitu oyo yemukuatesako?

¹⁰ Ehunga liavali tuhandela okuhongolelwa nospilitu sandu omokonda Huku wahongolela Omona wae nospilitu oyo. Etyi nkhele eheneye pano pohi, Omona wa Huku wongunga ankho wii eulo eli liati: “Ospilitu ya Jeova maikakala nae, ospilitu yonondunge nounongo, ospilitu yokulonga no younene, ospilitu yenoñgonoko no yonthilo na Jeova.” (Isaías 11:2) Soka oñgeni Jesus ankho ahanda unene okukuatesuako nospilitu ya Huku etyi ankho ekahi pano pohi!

¹¹ Onondaka mba Jeova mbafuiswapo. O Evandyeliu yapopia etyi tyapita konyima yombatisimu ya Jesus okuti: “Jesus wakala tyeyula ospilitu sandu, atundu po Jordau iya ospilitu aimutuala alo koluhandya.” (Lucas 4:1) Oko, etyi Jesus ankho elikuambela, nokusokolola, nokuhali, Jeova walongesa nokupongiya Omona wae konthele yetyi matyikapita nae komutwe. Ononkhono mba Huku mbalunda omutima wa Jesus, nokuhongolela omalusoke ae nomatokolo ae. Ngotyo, Jesus apeho ankho utyii oityi Tate yae ahanda alinge, iya ngatyo alinga.

12. Omokonda yatyi tuesukisila okuita ospilitu ya Huku ituhongolele?

¹² Jesus ankho utyii okuti ospilitu ya Huku yakolela unene momuenyo wae, moluotyo waavela ondundo ovalongwa vae vaite ospilitu oyo nokuyeka ivehongolele. (Tanga Lucas 11:9-13.) Omokonda yatyi tuesukisa ospilitu ya Huku ituhongolele? Omokonda ipondola okupilulula olusoke luetu, opo tukale nolusoke lwa Kristu. (Romanos 12:2; 1 Coríntios 2:16) Otyo tyilekesa okuti tyina tuyeka ospilitu ya Huku ituhongolele, matusoko nga Kristu nokumuhetekela.—1 Pedro 2:21.

Ospilitu Youye Ipondola Okutuyapula

13. Ospilitu youye oityi? Iya ihindila ovanthu okulinga tyi?

¹³ Ehunga liatatu tuhandela okuhongolelwa nospilitu ya Huku omokonda tyehena ospilitu oyo, tupondola okuyapulwa nospilitu youye ihongiliya ovanthu ovanyingi hono. Ononkhono mbouye, mbuhongiliya ovanthu okulinga etyi tyelikalela unene netyi ospilitu sandu ituhongolela okulinga. Ospilitu youye kaikuatesako ovanthu okukala nolusoke ngo lwa Kristu, mahi ituala ovanthu okusoka nokulinga ovipuka vielifwa no viomutumini wouye, Satanasi. (Tanga Efésios 2:1-3; Tito 3:3.) Tyina omunthu ayeka ospilitu youye imuhongolele iya ahimbika okulinga ovilinga violutu, makala novitateka ovinene vipondola okumutyilika okupiñgana Ouhamba wa Huku.—Gálatas 5:19-21.

14, 15. Oñgeni tupondola okuanya ospilitu youye?

¹⁴ Jeova utukuatesako opo tuanye ospilitu youye. Apostolu Paulu wapopia okuti “tutualeiko okutambula ononkhono ku Tatekulu no kepondolo liononkhono mbae . . . opo tutyivile okukoleleya monthiki ombi.” (Efésios 6:10, 13) Jeova utupameka nospilitu yae opo tuhayapulwe na Satanasi. (Revelação 12:9) Ospilitu youye ina ononkhono, mahi tupondola okulityilikayo, mokonda ospilitu sandu ina vali ononkhono, iya maitukuatesako!

¹⁵ Apostolu Petulu wapopile vana vayekelepo otyili Pomuvo wo Vakristau votete okuti: “Vasapo ondyila yaviuka, moluotyo avayondyua.” (2 Pedro 2:15) Tupandula unene moluetyi “tuahatambulile ospilitu youye, anthi tuatambula ospilitu ya Huku”! (1 Coríntios 2:12) Inkha tuyeka ospilitu sandu ituhongolele, nokuundapesa ovipuka aviho Jeova etuavela opo tupameke oupanga wetu nae, matulingi etyi tyaviuka nokuanya ospilitu youye uno wovivi.—Gálatas 5:16.

Ospilitu Sandu Yava Otyinyango Otyiwa

16. Otyinyango patyi ospilitu sandu ipondola okutuavela?

¹⁶ Ehunga liakuana tuhandela okuhongolelwa nospilitu ya Huku, omokonda oyo yava otyinyango otyiwa momuenyo wavana vahongolelwa nayo. (Tanga Gálatas 5:22, 23.) Olie puonthue uhahande okukala vali nohole, nehambu, nombembwa? Olie uhahande okukala vali noumphua-lundo, nokankhenda, nouwa-tima? Olie uhahande okukala nekolelo enene, nepoleyo, nokulikondola omutima? Ovituwa ovio oviwa vikuatesako onthue muene nombunga yetu, newaneno. Tuna okutualako okulinga ononkhono opo ovanthu vatale okuti tuna otyinyango otyo, mokonda okuava otyinyango otyo tyitupu onthyulilo.

17. Oityi tupondola okulinga opo tulekese otyinyango tyospilitu?

¹⁷ Otyiwa okulitala nawa opo tukale nonthumbi yokuti onondaka mbetu nevi tulinga vilekesa okuti tukahi nokuhongolelwa nospilitu sandu nokuna otyinyango tyayo. (2 Coríntios 13:5a; Gálatas 5:25) Inkha tutala okuti tuesukisa ononthele mbumwe mbotyinyango tyospilitu, tupondola okuundapela kumwe nospilitu sandu opo tukale novituwa ovio. Tupondola okutyilinga pokulilongesa kese nthele yospilitu, okuundapesa Ombimbiliya nomikanda viomupika. Tuesukisa okusoka oñgeni matulekesa otyinyango tyospilitu kese nthiki, nokulinga ononkhono mbokukala natyo momuenyo wetu.a Putyina tutala ouwa utundilila kombatelo yospilitu ya Huku momuenyo wetu, no wovakuatate vetu, tuimbuka nawa omokonda yatyi tuna okuhongolelwa nospilitu oyo.

Ove Utavela Ospilitu ya Huku Ikuhongolele?

18. Ongeleka ya Jesus yokutavela okuhongolelwa nospilitu ya Huku itulongesa tyi?

¹⁸ Mokonda Jesus ankho waundapa na Huku “ngomesene yovilinga” pokutunga ovipuka aviho mouye, ankho wii ononkhono ambuho mbo ohi ovanthu vaundapesa pokulinga oungendi. (Provérbios 8:30; João 1:3) Mahi, petupu natyike Mombimbiliya tyilekesa okuti Jesus wahongolelwa nononkhono mbo ohi etyi ankho ekahi pano pohi. Mahi, Ombimbiliya ipopia okuti ospilitu sandu ya Huku ankho ononkhono ononene momuenyo wa Jesus. Ankho uhanda unene okuhongolelwa nayo. Tyina ospilitu ankho imuhongolela okulinga otyipuka tyimwe, oe utavela. (Marcos 1:12, 13; Lucas 4:14) Nove utavela ospilitu ya Huku ikuhongolele?

19. Oityi tuna okulinga opo ospilitu sandu ituhongolele?

¹⁹ Ononkhono mba Huku nkhele mbukuatesako vana vena omutima waviuka vetavela mbuvehongolele. Oñgeni moyeke ospilitu ya Huku ikuhongolele mondyila yaviuka? Likuambela apeho okuita ku Jeova atume ospilitu yae nokukukuatesako utavele ehongolelo liayo. (Tanga Efésios 3:14-16.) Lekesa okuti uhanda okuhongolelwa nospilitu ya Huku pokulilongesa Ombimbiliya, yahonekwa kononkhono mba Huku. (2 Timóteo 3:16, 17) Tavela onondonga mbukahi Mombimbiliya, nehongolelo liospilitu sandu. Lekesa okuti wakolela mounongo wa Jeova wokuhongolela omuenyo wove mouye uno wovivi.

[Onondaka Poutoi]

Uhinangela Ononthele Mbakolela Vali?

• Oñgeni ospilitu sandu itukuatesako?

• Omahunga patyi ekuana alekesa okuti tuesukisa okuhongolelwa nospilitu ya Huku?

• Oñgeni tupondola okuyeka ospilitu sandu ituhongolele mondyila yaviuka?

[Olutalatu pefo 17]

Ospilitu ya Huku yali ononkhono ononene mbalunda omuenyo wa Jesus

[Olutalatu pefo 19]

Ospilitu ya Huku yavela ondundo nokuhongolela ovanthu vomutima waviuka