“Onwe Mumapanga Ange”

“Onwe mumapanga ange, inkha mulinga etyi nemutuma.”—JOÃO 15:14.

1, 2. (a) Ovalongwa va Jesus vatundile mononkhalelo patyi mbelikalaila? (b) Omokonda yatyi okukala epanga lia Jesus tyakolela?

OVALUME ankho vepumphi na Jesus mondyuo onene, ankho vena onontheto novilinga vielikalaila. Petulu na Andre omukulu nondenge, ankho ovafwi vonohi. Mateusi ankho omutanthi womalilimu, otyilinga ankho tyokuatombwa no va Judeu. Vamwe, nga Tiaku na João, tyafuile ankho vei Jesus tunde poukuendye. Ovakuavo, nga Natanaele, tyafuile weya okunoñgonoka vala Jesus momanima ehehi. (João 1:​43-​50) Ngotyo, aveho ankho vekahi po Pasikwa otyinthiki otyo mo Jelusalei, ankho vena onthumbi yokuti Jesus o Mesiya walaelue, Omona wa Huku wokuna omuenyo. (João 6:​68, 69) Tyevehikile komitima okumutehelela etyi evepopila okuti: “Ame nemuihana okuti mumapanga, mokonda ovipuka aviho neiva ku Tate yange, nemupopila vio.”—João 15:15.

² Onondaka ombo Jesus apopilile ono apostolu mbae mbekolelo, hono mbaviukiswa mo Vakristau ovalembulwa aveho, nomapanga avo “onongi ononkhuavo.” (João 10:16) Namphila ononkhalelo mbetu mbelikalaila, nonthue tupondola okukala omapanga a Jesus. Oupanga wetu nae wakolela unene, mokonda okukala omapanga ae, tupu tyitukalesa omapanga a Jeova. Tyotyili, katupondola okukala omapanga a Jeova, inkha katukala tete omapanga a Kristu. (Tanga João 14:​6, 21.) Oityi tuna okulinga opo tukale omapanga a Jesus, nokutualako noupanga oo? Tyina nkhele tuhenepopie konthele yepulo olio liakolela, tutalei oñgeni Jesus ali epanga ewa. Iya atutale oñgeni tupondola okulilongesila kuetyi ovalongwa vae vapopile netyi valingile mokonda youpanga wavo nae.

Jesus Waava Ongeleka Yokukala Epanga Ewa

3. Jesus ankho wiiwe ñgeni?

³ Omunongo Ohamba Salomau wahoneka okuti, “omapanga omuhona omanyingi.” (Provérbios 14:20) Onondaka ombo mbulekesa nawa eyembelo liovanthu ovakuankhali. Valinga oupanga okutala kuetyi vapondola okutambula, ha kuetyi vapondola okuava. Otyituwa otyo otyivi, Jesus ankho utyiyele. Oe ankho kahongiliyua no vokuna omalumono ine ovokuankhimana. Tyili, Jesus wali nohole nomukuendye umwe omuhona omutumini, emukongo opo akale omulanduli wae. Anthi, Jesus watumine omulume oo alandese etyi ankho ena opo aavele vokuahepa. (Marcos 10:17-​22; Lucas18:18, 23) Jesus ankho wiiwe okuti hepanga ko liovahona no vokuankhimana, mahi ankho epanga lio vokuahepa na vana vapenyenyekwa.—Mateus 11:19

4. Omokonda yatyi tupopila okuti omapanga a Jesus ankho valinga oviponyo?

⁴ Tyotyili, omapanga a Jesus ankho valinga oviponyo. Onthiki imwe Petulu waponyene monkhalelo ya Huku yokutala ovipuka. (Mateus 16:21-23) Tiaku na João valekesile otyituwa tyelungavi etyi vaita ku Jesus evepe onomphangu mbankhimana Mouhamba wa Huku. Iya otyo, atyinumanesa ono apostolu ononkhuavo. Iya olusoke luokunkhimana luatualako okueta omalutañgu. Anthi, Jesus noumphua-lundo aovola okuvatela omapanga ae okukala nonkhalelo yaviuka yokusoka. Mahi, kanumanene navo.—Mateus 20:20-28.

5, 6. (a) Omokonda yatyi Jesus atuaileko noupanga wae nono apostolu? (b) Omokonda yatyi Jesus ahatualeleko noupanga wae na Juda?

⁵ Jesus katuaileko okukala epanga liovanthu ovakuankhali mokonda ankho wapanda ononkhali mbavo. Anthi, oe ankho utala kehando ewa ankho vena no kovituwa oviwa. Tala ongeleka ya Petulu, na Tiaku, na João, ankho velele, motyinthiki ankho tyepuiya unene pala Jesus. Jesus ankho kahambukilwe navo. No ngotyo, oe watala kehando ewa ankho vena, iya ati: “Tyotyili, ospilitu ina ombili mahi olutu luaponwa”.—Mateus 26:41.

⁶ Tupu, Jesus wayekapo oupanga wae na Juda Iskaliote. Namphila ankho Juda elilekesa ngatyina epanga, Jesus ankho waimbukale okuti wayeka omutima wae usiliswe. Mokonda Juda ankho walinga epanga liouye, iya ngotyo ankho welilinga oe muene ondyale ya Huku. (Tiago 4:4) Moluotyo, etyi Jesus apameka oupanga wae nono apostolu 11 vekolelo, opo ankho Juda wemulekelale wapita.​—João 13:21-35.

7, 8. Oñgeni Jesus alekesa ohole ena nomapanga ae?

⁷ Jesus ankho katale koviponyo omapanga ae valinga kohale, iya ankho ulinga etyi tyaviuka pala ouwa wavo. Mongeleka, welikuambelele ku tate yae opo eveamene pomuvo wononkhumbi. (Tanga João 17:11.) Jesus ankho wanoñgonoka okuti omalutu avo kafuilepo. (Marcos 6:​30-​32) Iya oe ankho kasukile vala nokuvepopila etyi oe asoka, mahi tupu ankho uvetehelela nokunoñgonoka etyi ovo vasoka no ñgeni veliivite.—Mateus 16:13-​16; 17:24-​26.

⁸ Jesus watyindile omuenyo wae nokuipawa pala ouwa womapanga ae. Oe ankho utyii okuti una okuava omuenyo wae opo afuisepo otyitumino tya Tate yae konthele youviuki. (Mateus 26:27, 28; Hebreus 9:22, 28) Mahi, Jesus waava omuenyo pala okulekesa ohole yae. Jesus wati: “Nawike una ohole ipona yauna waava omuenyo mokonda yomapanga ae.”—João 15:13.

Oñgeni ankho Ovalongwa Vatala Okukala Omapanga a Jesus?

9, 10. Oñgeni otyali tya Jesus tyakalesile ovanthu?

⁹ Jesus waavele otyali omuvo wae, nohole yae, novipuka viae viakolela. Otyo, tyakokelele ovanthu kwe, navo avakala nehambu liokumuavela etyi vena. (Lucas 8:​1-3) Moluotyo, Jesus ankho upondola okupopia okuti: “Kalei ovakuatyali opo nonue mupewe. Mamutyukumuninwa pekolo otyieleko otyiwa, tyeyula nokuatyokelwa nokuhapauka. Mokonda motyieleko muelekela, nonwe omo mamukaelekelwa.”—Lucas 6:38.

¹⁰ Anthi, vamwe ankho vaovola vala Jesus, mokonda yetyi ankho vapondola okutambula kwe. Omapanga oo omatutu, asapo Jesus etyi vahanoñgonokele otyipuka tyimwe evepopila. Mokonda ankho kavayumbile onthumbi mu Jesus tyina vahanoñgonokele otyipuka tyimwe, valinga etokolo liahaviukile, iya avemusipo. Anthi, ono apostolu valekesile onthumbi mue. Oupanga wavo na Kristu walolelue ovikando vimwe. Mahi, ovo valingile atyiho vapondola opo vemuvatele pomivo oviwa no viovitateka. (Tanga João 6:26, 56, 60, 66-68.) Motyinthiki tyae tyahulililako pano pohi, Jesus wapandele omapanga ae ati: “Ngotyo, onue, onwe muakala name pononkhumbi mbange.”—Lucas 22:28.

11, 12. Oñgeni Jesus akuatesileko ovalongwa iya oñgeni ovo valingile?

¹¹ Etyi Jesus amana okupanda ovalongwa vae vekolelo, palamba vala katutu, ovalume ovo avemusipo. Vayeka owoma wovanthu uhitikinye ohole ankho vena na Kristu. Mahi, Jesus eveevela vali. Konyima yononkhia mbae netutilo liae, wevemonekela apameka oupanga wae navo. Tupu, weveavela otyilinga tyakolela unene, tyokulinga ovalongwa “ovanthu movilongo aviho,” nokukala onombangi mbae “alo kononthele mbokokule-kule mboohi.” (Mateus 28:19; Atos 1:8) Oñgeni ovalongwa vakumbululile?

¹² Ovalongwa vapaka mimitima viavo nomuenyo wavo ovilinga viokuivisa onondaka Mbouhamba wa Huku. Nombatelo yononkhono mba Jeova, aveyulisa o Jelusalei nondongeso yavo. (Atos 5:27-29) Namphila ankho kuna onondyale vahanda okuveipaa, vatuaileko okutavela otyitumino tya Jesus tyokulinga ovalongwa. Etyi palamba omanima ehehi etyi vatambula otyitumino tya Jesus, apostolu Paulu ahoneka okuti onondaka onongwa mbaiviswa “kovanthu aveho mombuelo yeulu.” (Colossenses 1:23) Tyotyili, ovalongwa ovo valekesa okuti ankho vapanda unene oupanga vena na Jesus!

13. Etyi ovalongwa va Jesus vaimbukile onondonga mbae tyevekalesile ñgeni?

¹³ Tupu vana veya okukala ovalongwa, navo vaimbuka ondongeso ya Jesus avapilulula omienyo viavo. Kovanyingi otyo tyesukisa okulinga omapiluluko omanene movituwa nomonkholelo yavo yomuenyo. Ovalongwa vamue ovape kohale ankho valinga omaundalelapo, nokulala novalume ovakuavo, nounkholwa, novimphulu. (1 Coríntios 6:9-11) Vakuavo ankho vena okupilula ovituwa viavo konthele yonombuto ononkhuavo mbovanthu. (Atos 10:25-28) Ngotyo, vetavela Jesus. Ankho vesukisa okululamo omunthu omukulu avelivaleka omunthu omupe. (Efésios 4:20-24) Veya okukala “nomutima wa Kristu” mokuñgonoka nokuhetekela onkhalelo yae yokusoka novituwa.—1 Coríntios 2:16.

Okulinga Oupanga na Kristu Hono

14. Oityi Jesus alaa mokuenda “kuonthyulilo youye” uno?

¹⁴ Ovanyingi povakristau vokohale ankho vei nawa Jesus ine vemumuene etyi atutila. Tyotyili, onthue tutupu elao olio liokumumona. Ngotyo, oñgeni, matulingi oupanga na Kristu? Onkhalelo imue okutavela ehongolelo lie tupewa nomupika wekolelo nokualunguka, onondenge mba Jesus vekahi kombanda yoohi valembulwa nospilitu. Jesus walaa okuti mokuenda “kuotyolilo younye uno” makakuateseko omupika una “otyilinga tyokuyunga omalumono ae aeho.” (Mateus 24:3, 45-47) Hono, ovanyingi vekahi nokuovola okukala omapanga a Kristu kavalingi onthele yomupika. Oñgeni vetavela ehongolelo vatambula komupika wekolelo, livekuatesako okukala omapanga a Kristu?

15. Oityi tyilekesa okuti omunthu makakala otyikombo ine ongi?

¹⁵ Tanga Mateus 25:31-40. Jesus waihana vana valinga onthele yomupika okuti nondenge mbange. Mongeleka yokupungulula onongi kovikombo, Jesus wapopia monkhalelo yayandyuluka okuti etyi tulinga onondenge mbae ongatyina oe tukahi nokutyilinga. Tyotyili, Jesus walekesa okuti etyi tyilekesa okuti omunthu wapunguluka kovikombo onkhalelelo kese umue “atala otyihupe otyo onondenge [mbae].” Ngotyo, onkhalelo yotete yavana vena ekevelo liokukala pano pohi, ilekesa okuti vahanda okukala omapanga a Kristu, omokukuatesako omupika wekolelo.

16, 17. Oñgeni tupondola okulekesa oupanga wetu nonondenge mba Kristu?

¹⁶ Inkha ove una ekevelo liokukala pano pohi mombuelo Youhamba wa Huku, oñgeni molekesa okuti una oupanga nonondenge mba Kristu? Tutalei ononkhalelo ononthanthu. Tete omokuundapa unene movilinga viokuivisa. Kristu watuma onondenge mbae vaivise nonondaka onongwa ouye auho. (Mateus 24:14) Ngotyo, otyihupe tyonondenge mba Kristu vekahi kombanda yoohi hono, vapondola okukala notyitateka tyokufuisapo otyilinga tyavo inkha kavavatelwa nomapanga avo onongi onokhuavo. Tyotyili, kese mowo onongi ononkhuavo valinga movilinga viokuivisa, vakuatesako onondenge mba Kristu okufuisapo otyilinga tyakolela vapewa. Kristu nomupika wekolelo nokualunguka vapanda unene oupanga oo.

¹⁷ Onkhalelo ya vali onongi ononkhuavo vakuatesako onondenge mba Kristu, omokuava etyi vena opo vavatele ovilinga viokuivisa. Jesus waavelele ovalanduli vae ondundo opo valinge oupanga navakuavo “nomalumono ahaviukile.” (Lucas 16:9) Otyo katyilekesa okuti onthue tupondola okulanda oupanda na Jesus na Jeova. Anthi, mokuundapesa ovipuka tuna opo tukuateseko Ouhamba wa Huku, tulekesa okuti oupanga wetu nohole hamonondaka vala mahi “omuevi tulinga no motyili.” (1 João 3:16-18) Ngotyo onthue tuvatela netyi tuna tyina tuundapa unene movilinga viokuivisa, natyina tuava onombongo pala okupindulapo nokuhiviswa onondyuo mbomaliongiyo, natyina tuava etyi tuna opo tukuateseko ovilinga viokuivisa ounye auyo. Inkha tuava etyi tuna tyilinge otyitutu ine otyinyingi, Jeova na Jesus vetyipanda unene.—2 Coríntios 9:7.

18. Omonkhonda yatyi tuesukisa okutavela ehongolelo tupewa novalulu vewaneno liapolua mo Mbimbliya?

¹⁸ Onkhalelo ya tato ilekesa okuti tuna oupanga na Kristu omokutavela ehongolelo liovakulu vewaneno. Ovalume ovo, vaholovonwa nospilitu sandu mehongolelo lia Kristu. (Efésios 5:23) Apostolu Paulu wahoneka okuti: “Tavelei ku vana vekahi nokumuhongolela nokulinga etyi vemutuma.” (Hebreus 13:17) Pamue tyipondola okutupuiya okutavela ehongolelo lia polwa Mombimbilia tupewa novakulu vewaneno lietu. Inkha tutala unene koviponyo viavo, otyo tyipondola okututyilika okutavela onondonga vetuavela. Nkhele, Kristu Omunthue wewaneno, wapanda okuundapesa ovalume ovo ovakuankhali. Ngotyo, onkhalelo yetu yokutavela etumino, yakolela unene moupanga wetu na Kristu. Tyina tuhesukile noviponyo viovakulu vewaneno nokutavela nehambu ehongolelo liavo, tyilekesa okuti tuna ohole na Kristu.

Opi Matuvasi Omapanga Omawa

19, 20. Oityi tupondola okuvasa mewaneno? Oityi matulilongesa monthele mailandulako?

¹⁹ Jesus katualako vala nokutuyunga nawa mokuundapesa ovakulu vewaneno, mahi tupu utuavela ovo me mopaspilitu, novakuatate no nomphange mewaneno. (Tanga Marcos 10:29, 30.) Etyi wehimbika okulihonyeka neongano lia Jeova, oñgeni ombunga yove yakala? Tyesukisa vekukuateseko mononkhono ukahi nokulinga opo ukale epanga lia Huku na Kristu. Mahi Jesus walondolele okuti “onondyale mbomunthu, ovanthu vombunga yae muene.” (Mateus 10:36) Tyitupameka unene okunoñgonoka okuti mokati kewaneno matuvasimo omapanga apona puvana tulikuai navo!—Provérbios 18:24.

²⁰ Ngetyi tyalekeswa no apostolu Paulu pokumanuhula omukanda wae ahonekela ewaneno lio Roma, Paulu watyalungwisapo omapanga ae omanyingi. (Romanos 16:8-16) Apostolu João wamanuhula omukanda wae watatu nonondaka mbati: “Tyalungwisapo omapanga, ko manyina.” (3 João 14) Tyotyili nae wakalele nomapanga omanyingi. Oñgeni tupondola okuhetela ongeleka ya Jesus no yovalongwa votete mokulinga nokutualako noupanga omuwa novakuatate vetu no nomphange vopaspilitu? Onthele mailandulako matukelilongesa ekumbululo liepulo olio.

Oñgeni Ove Mokumbulula?

• Oityi tupondola okuvasa mewaneno? Oityi matulilongesa monthele mailandulako?

• Oñgeni ovalongwa valekesa oupanga wavo na Jesus?

• Oñgeni matulekesa okuti tumapanga a Kristu?

[Olutalatu pefo 21]

Jesus ankho wasuka netyi omapanga ae asoka, no ñgeni velitehelela

[Olutalatu pefo 23]

Oñgeni matulekesa okuti tuhanda okukala omapanga a Kristu?