Onthwe Tuahula Vala ku Siovaa

Sesusi wapopia okuti ovalanduli vae kavapondola ‘okulinga onthele youye.’ (Suau 15:19) Oityi okuahalingi onthele youye? Okuahahulu komutumini nawike, atuehelipake movilwa. Mahi pamwe katyapepukile okuhelipake movipuka ovio mokonda vakuetu vapondola okutulinga omukwele. Pahe oityi tuna okulinga tyimoneke umwe okuti onthwe tuahula vala ku Siovaa?

1. Oñgeni ovanthu va Huku vatala ovatumini?

Sesusi watile: “Fetei ku Sesale ovipuka vya Sesale.” Ovanthu va Huku otyo valinga ngotyo. Valinga onthilo ovatumini, vetavela etyi vapopia, vafeta onombongo vaita. (Maluku 12:17) Ombimbiliya yati ovatumini vatumina tupu, omokonda o Siovaa weveyeka vatumine. (Ova Loma 13:1) Onthwe tutyii okuti una okutumina atyiho o Huku vala, ha vanthu-ko. Otyo tuyumbila-ko onthumbi okuti o Huku vala, no Hamba aholovona atumine, mavakamana-ko ononkhumbi ambuho ovanthu veli nokumona.

2. Oityi tuna okulinga tyimoneke umwe okuti onthwe tuahula vala ku Siovaa?

Nthiki imwe Sesusi waavelele okulia onthumbo yovanthu. Ovanthu etyi vetyimona, avahande ñgeno Sesusi ulinga omutumini wavo, mahi Sesusi ehetavela. (Suau 6:15) Omokonda yatyi ehetavelele? Omokonda yetyi apopile okuti: “Ouhamba wange kaulingi onthele youye uno.” (Suau 18:36) Onthwe mokonda tuhetekela Sesusi, katuende kovilwa, katuhulu komutumini nawike. (Tanga Miquéias 4:3.) Onthwe tuna onthilo nepandela, mahi katulipetamena kulio mokonda ongatyina olio tuli nokufenda. (1 Suau 5:21) Onthwe katuyembe kopalititu naike, katumange; mahi tupu katupopi omapita ovatumini, oo hamwe omunthu uhanda okutumina. Tyina tuahalingi ovipuka ovio novikwavo vali, ngotyo Siovaa utyimona umwe okuti tuahula umwe vala kwe, no Kohamba akoya atumine, Sesusi Kilisitu.

KUHANDE OKUNOÑGONOKA VALI?

3. Ovanthu va Huku kavelipake movitateka viouye uno

Sesusi novalongwa vae ankho kavelipake movitateka viouye uno. No onthwe tuna okuvehetekela. Tangei Ova Loma 13:1, 5-7 na 1 Petulu 2:13, 14. Tyina muamatange onotesitu ombo, talei OVIDIU, amutomphola omapulo aa:

OVIDIU: Ovakilisitau Votyotyili Kavelipake Movitateka Viouye Ou — Ovidiu yo Tete (4:28)

• Oityi tuesukisila okulinga onthilo ovatumini?

• Oityi tuna okulinga tyimoneke umwe okuti tuna onthilo navo?

Pamwe tyina kotyilongo tyimwe kuluwa, ovatumini vovilongo ovikwavo vati, otyo muene otyavo katulipake-po. Mahi pamwe ukati-ko vala ñgaa, vatuma-ko onombongo nomatolopa vakuateseko ovo veli nokulwa. Mahi muene-muene, okuahahulu komunthu nawike oityi? Tangei Suau 17:16. Tyina wamatange otesitu oyo, talei OVIDIU amutomphola epulo eli:

OVIDIU: Ovakilisitau Votyotyili Kavelipake Movitateka Viouye Ou — Ovidiu ya Vali (3:11)

• Oityi onthwe tuahalingi?

Pahe matulingi ñgeni, ine tukati-ko ñgaa, ovatumini vetutuma tyimwe tyilipona netyi Huku apopia? Tangei Ovilinga 5:28, 29. Tyina muamatange otesitu oyo, talei OVIDIU amutomphola omapulo aa:

OVIDIU: Ovakilisitau Votyotyili Kavelipake Movitateka Viouye Ou — Ovidiu ya Tatu (1:18)

• Ine ovatumini vetutuma otyipuka tyilipona netyi Huku apopia, olie tuna okutavela?

• Tyina usoka, ovipuka patyi pamwe ovatumini vapondola okututuma, onthwe tuahapondola okutavela?

4. Evi tusoka nevi tulinga

Tangei 1 Suau 5:21. Pahe amutale OVIDIU, amutomphola omapulo aa:

OVIDIU: Omokonda Yatyi Ovakristau Votyotyili Vesukisila Okukola Omutima — Opo Vatualeko Tyelikalela Nouye (2:49)

• Oityi Ayenge ehetavelele okuimba o inu, nokuhula komutumini wotyilongo tyavo?

• Ku ove, etyi alinga walinga nawa?

Pamwe katyapepukile okuahayembe kotyilongo tyetu, no kovatumini. Talei OVIDIU, amutomphola omapulo aa:

OVIDIU: Ovipuka Tuelilongesa Momutala Womulavi — Uhelipake Mopulitika Mouye Uno Weliyapauko (5:16)

• Pamwe vo tyilongo tyetu vakayumba ombola no vovilongo ovikwavo. Pahe povipuka ovio, oityi tuna okulinga tuahayembe nthele imwe?

• Pamwe ovatumini vapopia okuti mavalingi ovipuka vimwe, tyina tuvitala ñgaa, ngoti vikahi nawa. Tupu pamwe vapopia otyipuka, ngoti matyituetela vala ovitateka. Pahe povipuka ngo ovio, oityi tuna okulinga (a) tuahayembe komutumini nawike (b) tuahapopie omapita ovatumini?

• Ine apeho tutehelela vala motelevisau no molaliu ovipuka vipopia ovatumini, novanthu tuhimama navo ovio vala vapopia, ha matukala ñgeni?

ETYI WELILONGESA

Welilongesa okuti Ovakilisitau votyotyili vahula umwe vala ku Siovaa, atee umwe mu evi vasoka. Kavahulu komutumini nawike, kavelipake movilwa, kavelipake monondyaya mbouye uno, novipuka ovikwavo vali.

Okupitulula

• Oñgeni Siovaa ahanda tutale ovatumini?

• Omokonda yatyi tuahulila umwe vala ku Siovaa?

• Onalupi tyipondola okupuiya okuhula umwe vala ku Siovaa?

KUHANDE OKUOVOLA VALI?

Pamwe ovitateka patyi ovanthu va Huku vakala navio mokonda yokuahahulu komutumini nawike?

Siovaa Ketuyekele-po (3:14)

Oityi vokuna ovana vapondola okulinga valongese ovana vavo etyi vena okulinga tyina vakuavo veli nokuimba o inu?

Uhelipake Mopulitika na Tyina Uli Povanthu Ovanyingi (4:25)

Okuti otyipuka otyiwa vali omunthu apondola okulinga, okukala etolopa aamene otyilongo tyavo?

“Ovipuka Aviho ku Huku Viapepuka” (5:19)

Tyina tuovola ovilinga, oityi tuna okutala nawa opo ‘tuahalinge onthele youye’?

“Kese Munthu Makatyinda Omutengi Wae Muene” (Omutala Womulavi 15 ya Março yo 2006)

Ovanthu vamwe kavahande Onombangi mba Siovaa. Tupondola umwe okukati-ko ñgaa, nthiki imwe vetulwisa otyo vetumonesa ononkhumbi tuyekepo okulingila Siovaa. Okuti pahe otyipuka otyo matyitutilisa owoma?

1. Omokonda yatyi tyahandela vala okukala tyityii okuti nthiki imwe matumoneswa ononkhumbi?

Ombimbiliya yati: “Aveho vahanda okufenda Huku kumwe na Kilisitu Sesusi tupu navo mavakahataikiswa.” (2 Timotiu 3:12) Sesusi ovanthu ankho vemuyele mokonda kalingi ovipuka ovanthu vo mouye wa Satanasi valinga. Ovatumini vamwe novanthu vonongeleya mbumwe, kavetuhande mokonda no onthwe tulinga umwe nga Sesusi. Katulipake movipuka viouye uno wa Satanasi. — Suau 15:18, 19.

2. Oityi tuna okulinga pahetyino opo ha tuahasoye tyina tuamamoneswa ononkhumbi?

Tuna okupameka onthumbi yetu mu Siovaa pehepano. Mahi pahe matutyilingi ñgeni? Tuna okutanga Ombimbiliya ononthiki ambuho, nokulikuambela, nokuenda komaliongiyo aeho. Pamwe vetumonesa ononkhumbi, vahahande tulingile Siovaa, ombunga yetu muene. Mahi ine apeho tulinga umwe vala ovipuka ovio vitatu, nii kamatutili owoma. Omu apositolu Paulu wamonesilwe unene ononkhumbi novanthu ankho veyele Ovakilisitau. Mahi tala onondaka ombu ahoneka, wati: “Siovaa omukuatesiko wange; ame himakala nowoma.” — Ova Hebeleu 13:6.

Otyipuka otyikwavo tupondola okulinga pehepano opo ha tuahatile owoma, okulongesa vakuetu Ombimbiliya. Ovilinga ovio vitulongesa okuyumba onthumbi mu Siovaa, atuahatili owoma ovanthu. (Provérbios 29:25) Ine pahetyino tulikuatehila tulongese vakuetu Ondaka ya Huku, ovatumini nga vetuilika vala okufenda Siovaa, kamatutili owoma, atuyekepo okulongesa vakuetu Ombimbiliya. — 1 Ova Tesalonika 2:2.

3. Tyina tumonesiwa emone atukoleleya, tupolapo-tyi?

Petupu ou utyihole tyokumonesiwa emone. Mahi tyina tumonesiwa emone, atukoleleya, atuahayekepo Siovaa, opo oupanga wetu nae upama vali, atumuyumbu vali onthumbi. Ñgeni ngotyo? Tyina tuehena vali ononkhono, Siovaa utukuatesako, no onthwe atutyimono umwe okuti hanthue-ko vala tuetyivila kononkhono mbetu. (Tanga Tiaku 1:2-4.) Ombimbiliya yati: ‘Ine mukoleleya ononkhumbi mokonda mukahi nokulinga otyiwa, otyo tyihambukiswa Huku.’ Tyina tumoneswa ononkhumbi, Siovaa nae tyimuihama. Mahi uhambukwa unene tyina etutala tuli nokukoleleya. (1 Petulu 2:20) Naina ine tukoleleya, Siovaa meketuavela omwenyo wahapu mouye omupe, muahamakakala vali ovanthu veyele ava vemuhole. — Mateusi 24:13.

KUHANDE OKUNOÑGONOKA VALI?

4. Ine vombunga yove vekumonesa emone, koleleya vala

Sesusi wapopile umwe nawa okuti pamwe ombunga yetu kamavahande tulingile Siovaa. Tangei Mateusi 10:34-36, amutomphola epulo eli:

• Tyina tuamapopila vetu okuti tuna nokulilongesa Ombimbiliya, tuahanda okulingila Siovaa, vapondola okutulinga-tyi?

OVIDIU: Siovaa Wetutambula Nawa (5:13)

• Oityi molingi ine omapanga ove, hamwe ombunga yove, vekukuluminya uyekepo okufenda Siovaa?

Tangei Salmo 27:10 na Maluku 10:29, 30. Tyina muamatange otesitu ike, amutomphola epulo eli:

• Oñgeni okuhinangela onondaka mbo tesitu ei, matyikupe ononkhono wahaponwe tyina hamwe ombunga yove nomapanga ove vahahande ufende Siovaa?

5. Wahayekeko okulingila Siovaa na tyina umwe umonesiwa ononkhumbi

OVIDIU: Kavatilile Owoma Naapa Veyelwe (6:27)

• Okuti hamwe ovanthu ava tuamona movidiu, vekupameka omutima?

Tangei Ovilinga 5:27-29 nomukanda Ova Hebeleu 10:24, 25. Tyina muamatange otesitu ike, amutomphola epulo eli:

• Omokonda yatyi tuesukisila okuahayekeko okulongesa vakuetu Ombimbiliya, nokuenda komaliongiyo, naapa umwe ovatumini vetuilika-tyo?

6. Siovaa mekukuatesako otyivili okukoleleya

OVIDIU: Siovaa Huku Mankhuatesako (3:40)

• Oityi tyakuatesako ovanthu ava tuamona movidiu, avakoleleya umwe, avahayekepo Siovaa?

Tangei Ova Loma 8:35, 37-39 nomukanda Ova Filipu 4:13. Tyina muamatange otesitu ike, amutomphola epulo eli:

• Oñgeni etyi tyapopia otesitu ei tyilekesa okuti ove upondola okukoleleya naapa umwe ovipuka viatokota, ohayekepo okulingila Siovaa?

Tangei Mateusi 5:10-12, amutomphola omapulo aa:

• Okuti ñgaa tyitavela umwe okuhambukwa tyina tuli nokumoneswa emone? Oityi wapopila ngotyo?

ETYI WELILONGESA

Wamona okuti tyina ovanthu vetumonesa emone, mahi atulikuatehila, Siovaa uhambukwa. Tupu wamona okuti Siovaa utukuatesako opo tukoleleye tyina tumonesiwa emone.

Okupitulula

• Oityi tuahatumphulukila tyina ovanthu vetumonesa emone?

• Oityi una okulinga pahetyino opo ha wahasoye tyina wamamoneswa ononkhumbi?

• Oityi una okuhinangela apeho opo uyumbe-ko onthumbi okuti Siovaa una ove, mekukuatesako?

KUHANDE OKUOVOLA VALI?

Omukuendye umwe wapopia oñgeni Siovaa emukuatesileko etyi apakwa mokaleya mokonda yokuehetavela okukala etolopa.

Wakoleleya Ononkhumbi (2:34)

Ovakulu ava, kotyilongo tyavo, tundee kohale ovanthu kavahande Onombangi mba Siovaa. Oityi tyevekuatesako okukoleleya, avahayekepo otyili?

Tualingila Siovaa Namphila Ankho Tyalema (7:11)

Onthele ei ipopia etyi tuna okulinga tuahatile owoma tyina ovatumini vametuilika okufenda Siovaa.

“Lipongiya Pahetyino Opo Ukoleleye Tyina Tumoneswa Ononkhumbi” (Omutala Womulavi wa Julho yo 2019)

Oityi tuna okulinga tulivile na vakuetu meumbo na tyina umwe vetumonesa emone mokonda yokufenda Siovaa? Ouwa patyi tupola-ko tyina tulikuatehila atuahasoyo?

Otyili “Katyieta Ombembwa, Mahi Tyieta Omutunga” (Omutala Womulavi wa Outubro yo 2017)