Oityi Huku Ekahi Nokukulingila

Otestu oyo iiwe unene nokupopiwa unene Mombimbiliya aiho. Otyo tyipopilwa okuti kutupu vali otestu onkhuavo “ipopia nawa oupanga wa Huku novanthu nonkhalelo mavayovolwa”. Moluotyo, movilongo vimwe otestu ya“João 3:16” ine onondaka mbayo, yahonekwa pana palingilwa ovinyano, nokomatuku-tuku, no movimato, kese apa pakuata ovanthu.

Ovanthu aveho vatala onondaka mbo testu oyo, vetavela okuti oluembia lwa Huku otyilekeso tyokuti uhanda okuveyovola opo vakamone omuenyo. Oityi ove usoka? Kuove oluembia lwa Huku luhangununa tyi? Iya mokusoka kuove, oityi Huku ekahi nokulinga tyilekesa okuti ukuhole?

“HUKU UNA OLUEMBIA NOVANTHU”

Ovanthu ovanyingi vetavela okuti Huku oe watunga atyiho, mokutalela kouye, na aviho vikahiko, novanthu. Ovipuka vina omuenyo viatungwa monkhalelo imwe ongwa nokuhuvisa tyilekesa okuti kuna omunthu omunongo wevitunga. Ovanthu ovanyingi vapandula Huku muetyi eveavela omuenyo. Tupu vetavela okuti vetei vala ku Huku una uveavela etyi omuenyo wesukisa, ngetyi omphepo tufuima, nomaande, nokulia, naaviho vikahi kombanda yohi, vitukuatesako okukala nomuenyo nokuhambukilwa etyi alinga.

Matulingi nawa inkha tupandula Huku muatyiho alinga, mokuyumba onthumbi Momutungi wetu Nomutekuli. (Salmo 104:10-28; 145:15, 16; Atos 4:24) Tupandula oluembia Huku ena nonthwe tyina tusoka kuatyiho etulingila opo tukale nomuenyo. Apostolu Paulu otyo wetyipopia okuti: “[Huku] muene oe wavela omuenyo ovanthu aveho, nomufuimo, novipuka aviho. Tyetyi, tuna omuenyo, tuendaenda nokukahiko mokonda yae”​—Atos 17:25, 28.

Mahi Huku oluembia lwa Huku luavilapo vali tyipona okututekula mopalutu. Tupu wetupanda nokutunkhimaneka muetyi etuavela ounongo nombatelo mopaspilitu. (Mateus 5:3) Moluotyo, ovanthu vokutavela mavakahupa avakala ombunga ya Huku, “ovana” vae.​—Romanos 8:19-21.

Ngetyi João 3:16 yapopia, Huku wetulekesa oluembia lwae mokuatuma Omona wae, Jesus, pano pohi opo etulongese konthele ya Huku yae, na Tate yae, ankhila onthwe. Mahi, ovanyingi vapopia okuti kavetyii nawa omokonda yatyi tyesukisila ankho Jesus ankhile ovanthu no ñgeni ononkhia mba Jesus mbulekesa oluembia Huku ena nonthwe. Tutalei oñgeni Ombimbiliya ihangununa ehunga liononkhia mba Jesus nesilivilo liambo.

“WAAVA OMONA WAE WONGUNGA”

Ovanthu aveho vamona ovitateka, nononkhumbi, nokukulupa, nokunkhia. Mahi otyo hatyoko Jeova Huku ponthyimbi ahandelele ovanthu. Oe wavelele ovanthu votete ekevelo liokukala apeho momphangu yombembwa. Mahi ankho vena etyi vesukisa okulinga: Okutavela kwe. Huku evepopila okuti inkha kavetavela, mavankhi. (Gênesis 2:17) Omulume wotete watyitukilapo etumino lia Huku, elietela ononkhia nae, novana vae. Apostolu Paulu wahangununa okuti: “Mokonda yomunthu wike vala onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho vena onkhali.”​—Romanos 5:12.

Mahi, Huku “uhole ouviuki.” (Salmo 37:28) Namphila ahayekele omulume wotete omphuki atualako, mahi kahitisile ovanthu aveho opo vamone ononkhumbi apeho nokunkhia mokonda youmphuki womunthu oo. Anthi, mokulinga etyi tyapopia ovitumino okuava “omuenyo, nomuenyo,” waundapesa ouviuki opo aavele omuenyo wahapu ovanthu ovataveli. (Êxodo 21:23) Epulo: Oñgeni omuenyo wehena nkhali Andau aombesa upondola okuvasiwa vali? Ekumbululo: Omunthu umwe waava omuenyo ulifwe na una Andau avombesa​—omuenyo uhena onkhali.

Tyimoneka nawa okuti, kutupu omona omukuankhali wa Andau upondola okuava omuenyo oo, mahi o Jesus vala. (Salmo 49:6-9) Mokonda watyituwa tyihena onkhali, Jesus ankho una omuenyo wafuapo ngetyi tyali Andau. Ngotyo, mokuatavela okuava omuenyo wae, Jesus wayovola ovanthu moupika wonkhali. Mokualinga ngotyo, wavela ovana vo valinepi votete omphitilo yokukala nomuenyo uhena onkhali nga Andau na Eva kohale. (Romanos 3:23, 24; 6:23) Okuti kuna etyi tuesukisa okulinga opo tupole ouwa kohole oyo onene?

“KESE OMUNTHU UTAVELA KWE”

Okukondoka ku João 3:16, tuvasa onondaka mbati: “Kese omunthu utavela ku [Jesus] kakahanyaunuako, mahi ukamona omuenyo wahapu.” Otyo tyilekesa okuti opo tukamone omuenyo wahapu tuna etyi tuesukisa okulinga. Inkha tuhanda okukala “nomuenyo wahapu” tuesukisa okukala nekolelo mu Jesus nokutavela kwe.

Ove hamwe ulipula okuti: ‘Okutavela tyakutikinya tyi? Jesus kapopile okuti, “kese una utavela mwe” ukamona omuenyo wahapu?’ Otyili, okutavela, ine ekolelo tyesukisa. Mahi, otyiwa okuhinangela okuti Mombimbiliya, ekolelo liakutikinya vali tyipona okutavela vala. Ngetyi tyapopia omukanda Vine’s Expository Dictionary of Old and New Testament Words, ondaka yaundapeswa na João melaka liotete ihangununa “okuyumba unene onthumbi, hakutavela vala.” Opo tupandwe na Huku, tyesukisa vali tyipona okuimbuka vala okuti Jesus Omuyovoli. Tupu okutavela tyakutikinya okuendela nawa muetyi Jesus alongesa. Inkha kulingi ngotyo, ekolelo kalisilivila. Ombimbiliya yati: “Ekolelo lihena ovilinga liankhia.” (Tiago 2:26) Tupu, etyi tyesukisa ku una, ukolela mu Jesus, okutyinda omuenyo welikuata nomatavelo ae nekolelo.

Otyo Paulu wetyihangununa okuti: “Ohole ya Kristu itulunda, mokonda etyi otyo tuanoñgonoka, okuti omunthu wike [Jesus] wankhila aveho, . . . Iya oe wankhila aveho, opo vana vena omuenyo vahakaleko vali pala avo muene, mahi o pala una wevenkhila iya atutiliswa.” (2 Coríntios 5:14, 15) Olupandu olunene tuna notyilikutila tya Jesus, lutulunde okupilulula omuenyo wetu, atuyekepo omahando etu opahitu, atukalako pala Jesus, una wetunkhila. Otyo okuti, tuesukisa okupaka komutwe momuenyo wetu etyi Jesus alongesa. Otyo tyesukisa okupilulula ovituwa vietu, nomaholovono etu na atyiho tulinga. Oityi matyikayambwa vana vetavela nokuna ekolelo mu Jesus?

“KAKANYIMUEKO, MAHI UKAMONA OMUENYO WAHAPU”

João 3:16 yamanuhuka nonondaka mbulekesa omulao wa Huku ku vana vakolela motyilikutila tyeyovo nokutyinda omuenyo welikuata novitumino via Huku. Huku uhanda ovanthu ovakuatyili “vahakanyimueko, mahi vakamone omuenyo wahapu.” Mahi ovanthu mavapolo ouwa kohole ya Huku vena omakevelo elikalela.

Vamwe Jesus wevelaa okukala nomuenyo wahapu keulu. Oe wevepopila nokuayandyuluka okuti wenda keulu ekevepakele omphangu opo vatumine nae. (João 14:2, 3; Filipenses 3:20, 21) Vana makatutila pala omuenyo wokeulu, “mavakakala ovanakwa va Huku no va Kristu, avakatumina kumwe nae omanima 1.000.”​—Revelação 20:6.

Kavehi po valanduli va Kristu mavakatambula elao olio. Tyotyili, Jesus wati: “Uhakale nowoma kahambo okatutu, mokonda Tate yenyi wapanda okumuavela ouhamba.” (Lucas 12:32) Ovo “vokahambo okatutu” velifuepi? Revelação 14:1, 4 yati: “Iya ame namona, Ondyona [Jesus Kristu watutila] itai komphunda [keulu] Siau, kumwe novanthu 144.000, vahonekwa monombamba mbavo enyina liae no lia Tate yae. . . . Ovo vatetekela okulandwa povanthu opo vakale va Huku novo Ndyona.” Okuveeleka novanthu ovanyingi mavakamona omuenyo, 144.000 “okahambo okatutu.” Ovo vokuatiwa onohamba, mavakatumina valie?

Jesus wapopia otyikundyi tyavali tyavana vena ekolelo okuti makatambula oviwa Viouhamba. Ngetyi tyapopia João 10:16 Jesus wati: “Iya ame ndyina onongi ononkhuavo mbehe mbohambo ei, tupu nambo ndyina okumbueta. Iya ambutehelela ondaka yange, nokukala otyunda tyike vala, no munthita wike vala.” “Onongi” ombo mbuna ekevelo liokukamona omuenyo wahapu pano pohi, ngetyi ankho tyikevela Andau na Eva ponthyimbi. Oñgeni tutyii okuti vakevela okukala pano pohi?

Ovikando ovinyingi Ombimbiliya ipopia Omphangu Yombembwa pano pohi. Opo ulitaleleko, ikula Ombimbiliya yove otange ono testu ombu: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Mateus 5:5; João 5:28, 29; Revelação 21:4. Ono versikulu ombo mbapopia onthyulilo yovilwa, nondyala, nomauvela, nononkhia. Mbapopia omuvo ovanthu onondalawa mavakala nehambu liokutunga onondyuo mbavo, nokulima omapia avo, nokukamona ovana vavo nombembwa.a Ovipuka ovio kavikuhambukiswa? Onthwe tuna ehunga ewa liokutavela okuti omilao ovio mavifuisuapo.

HUKU UKAHI NOKULINGA VALI

Inkha utalamapo katutu otale ovipuka aviho Huku ekahi nokulinga pala ovanthu aveho, motyimono nawa okuti wafuapo pala okulinga ovipuka ovinene vali. Onthwe tuna omuenyo, nounongo, nekongoko, atyiho tyesukisa pala okukala nomuenyo. Haunene, ofeto yeyovo Huku aava menyina lia Jesus, una wetunkhila, maituetela oviwa ovinene, ngetyi tuelilongesa mu João 3:16.

Omuenyo wahapu momphangu yombembwa, muhena vali ovitateka viomauvela, novilwa, nondyala, ine ononkhia, tyotyili maueta ehambu limwe enene nononkhano onongwa. Inkha uhanda okukavasa oviwa ovio tyitei kuove. Epulo liahupako olieli, Oityi ove ukahi nokulingila Huku?