Okuti Ankho Utyiyale?

Oñgeni omamanya okukunkha ankho aundapeswa kohale?

Omamanya okukunkha ankho aundapeswa pala okukunkha ohinde yokulinga onombolo. Okukunkha, ankho tyilingwa kese nthiki novakai ine novaundapi momaumbo omanyingi. Kohale ankho tyakaka okuiva ovanthu vakunkha ononthiki ambuho.—Êxodo 11:5; Jeremias 25:10.

Omalutalatu omo Egitu kohale, etyilekesa nawa. Ovilia ankho vipakwa kemanya lialinga katutu etoko. Omukunkhi, aikila konongolo konyima yemanya, akuate onkhunkho nomavoko aeho, ahimbika okukunkha. Omukanda umwe upopia okuti vamwe ankho vakunkha ononeka 2 ine 4 monthiki. Inkha onkhunkho yatyo iyumbwa momunthu ipondola okumuipaa.—Juízes 9:50-54.

Okukunkha ankho tyakolela unene momaumbo pala okutekula nawa ombunga. Moluotyo, otyitumino tyo Mbimbiliya ankho tyiilika okukuata opinyolo emanya liokukunkha. Deuteronômio 24:6 yati: “Nawike upondola okukuata opinyolo emanya ine onkhunkho yatyo, opo ha afetwe, mokonda ngotyo watyinda otyipuka tyihupisa vomeumbo.”

Onondaka “Okukala Pekolo” Mbulekesa Tyi?

Ombimbiliya ipopia okuti Jesus “ukahi pekolo lia He.” (João 1:18) Onondaka ombo, mbulekesa oupanga omunene Jesus ena na Huku. Tupu, onondaka ombo mbulekesa otyituwa tyo va Judeu ankho putyina valia.

Pononthiki mba Jesus, putyina ova Judeu valia ankho vapumphama avayendama. Kese munthu ankho uyendama, aeta omutwe ponthele yomesa, otyo eliyeka kokuvoko kuokumbili. Okukala ngotyo, ankho tyivekuatesako okulinga nokulio atyiho vahanda. Omukanda umwe wapopia okuti, mokonda ovanthu aveho ankho tyina valia veliyeka kokumbili, avelikalela popepi, ngotyo “omutwe womunthu umwe ukala popepi nonthulo you uli konyima yae. Otyo ovanthu vapopila okuti, ‘okukala pekolo’ lia mukuavo.”

Okukala pekolo lionkhalamutwe yombunga, ine lia hekulu yotyipito tyimwe, ankho elao enene. Moluotyo, Popasikwa yahulilila ya Jesus, apostolu João “omulongwa Jesus ankho ehole,” oe wapumphamene pekolo liae. Ngotyo, João ankho upondola ‘okufuenaika omutwe ponthulo ya Jesus,’ emulingi epulo.—João 13:23-25; 21:20.