Omapulo Ovatangi

Ovalie ankho ovayungi vomondyuo ya Huku iya otyipi otyilinga tyavo?

Vamwe pova Levita ankho ovanakwa, mahi ovakuavo ankho vena ovilinga ovinyingi vielikalaila. Mongeleka, vamwe ankho ovayungi. Ankho vahongolelwa nomutumini wovayungi vondyuo ya Huku. Omuhoneki umwe omu Sundeu utiwa o Philo, wapopia otyilinga tyavo okuti: “Vamwe puvo ankho vakala ponombundi mbondyuo ya Huku. Ovakuavo ankho vakala mokati nokuyunga ovanthu opo vahanyingile monomphangu vahapondola okuliata. Iya nkhele ovakuavo, ankho veliseta-seta nondyuo yatyo. Tyiti vamwe vanyingila komuhuka ovakuavo o kongulohi.”

Ovatumini Vombonge Onene yova Sundeu, pamwe ankho vaita kovayungi ovo opo vevekuateseko. Namphila ova Loma ankho vahayeke ova Sundeu vamaneke, mahi ankho vayeka ovayungi ovo vaende tyamaneka.

Omunongo umwe utiwa o Joachim Jeremias wapopia okuti “onondaka mba Sesusi mbokuati ‘ame ankho ndyikala mondyuo ya Huku nokulongesa, mahi amuhankhuate,’ mbulekesa nawa okuti Mondyuo ya Huku ankho mukala umwe ovayungi. Mokonda inkha ovanthu vokueya okumukuata ankho kavaundapa Mondyuo ya Huku, ñgeno Sesusi kapopile onondaka ombo.” (Mat. 26:55) Tupu Joachim Jeremias, wapopia okuti tyafuile nthiki imwe, ovo vatuminwe-ale opo vakakuate Sesusi. (Suau 7:32, 45, 46) Konyima, ovatumini Vombonge Onene yova Sundeu vatumine ovayungi ovo nomutumini wavo opo vakakuate ovalongwa va Sesusi na vakoyeswe. Mokutala, ovo tupu vapolele apositolu Paulu Mondyuo ya Huku. — Ovil. 4:1-3; 5:17-27; 21:27-30.