Onondongwa Mbutukuatesako Okulivila na Vakuetu

Evela Vakuenyi

“Tualeiko. . . okulievela nomutima auho alo umwe inkha pena umwe wemulinga otyipuka tyemunumanesa.” — OVA KOLOSU 3:13.

Ovanthu aveho valinga ovipuka vinumanesa vakuavo. Pamwe onthue tunumanesa vakuetu, pamwe ovo vetunumanesa. Otyo tyilekesa okuti pamwe onthue muene tuesukisa okuevelwa ine okuevela vakuetu. Tyina tuamaevela mukuetu tuyekapo okumupakela onkhongo. Onthue katupondola ‘okukondolela nawike otyivi notyivi,’ ine okumuhinangelesa apeho otyipuka etulingile. (Ova Loma 12:17) Mahi inkha mukuetu wetulinga tyimwe tyetuihama unene ya katuna-ko nokutyivila okutyilimbwa? Tuna yokukapopia nae, apahakala vali omunthu omukuavo. Pokutomphola tuhapopiei olie wapengesa, mahi tuovolei ombembwa. — Ova Loma 12:18.

Liola Omutima Nokukala Nonthilo na Vakuenyi

“Nomutima weliola talei vakuenyi ngatyina ovanene vali ku onwe.” — OVA FILIPU 2:3.

Tyina tuliola omutima nokukala nonthilo na vakuetu navo vahambukwa. Mokonda vetyii okuti matuvetekula nawa, nokukala nokankhenda navo iya tupu kamatuvenumanesila tyawina. Inkha tutala vakuetu ngatyina ovanene vali ku onthue kamatuvekuluminya okulinga ovipuka ngetyi tuhanda, atueta onondyaya. Mokonda ankho tulinga ngotyo ovanthu kamavakala no onthue, atuhakala nomapanga.

Wahakale Nokapungulula

“Huku utupu okapungulula, mahi momalongo aeho omunthu una onthilo nae nokulinga etyi tyaviuka umutavela.” — OVILINGA 10:34, 35.

Omutungi wetu katale ovanthu vamwe ngatyina vesukisa vali ku vakuavo mokonda yelaka notyilongo vatyitilwa ine otyivala tyavo. Ombimbiliya yati: “Nomulume wike vala Huku walinga omalongo aeho ovanthu.” (Ovilinga 17:26) Otyo tyilekesa okuti, ovanthu aveho velikuai. Tyina tutekula nawa vakuetu, tyituhambukiswa nokuhambukiswa vakuetu Nomutungi wetu.

Kala Nomutima Omuwa

“Livalekei . . . ouwa-tima.” — OVA KOLOSU 3:12.

Tyina tuna omutima omuwa, vakuetu mavelitehelela nawa ponthele yetu. Kamavakala notyinkhe tyokupopia no onthue, nowoma wokutuviyula mokonda vetyii okuti kamatunumana liwa. Iya tyina umwe ametunumanena, matumukumbulula nawa, atyimutulisa omutima. Provérbios 15:1 yati: “Okukumbulula nawa tyitulisa onyengo, mahi ondaka ileva iyawisa konyengo.”

Kala Notyali Nokupandula

“Okuava tyihambukiswa vali tyipona okupewa.” — OVILINGA 20:35.

Ovanthu ovanyingi hono vena elungavi iya vasoka vala kuvo. Mahi etyi tyieta ehambu okukala notyali. (Luka 6:38) Ovanthu votyali vena ehambu mokonda vehole vali vakuavo tyipona ovipuka vena. Tyina vamapewa otyipuka tyimwe vapandula. (Ova Kolosu 3:15) Lipula okuti: ‘Okuti ndyityihole tyokukala novanthu vahapandula vanumina ine ndyikala no votyali no vokupandula?’ Otyo tyitulongesa-tyi? Tyitulongesa okuti, tuesukisa okutekula vakuetu ngetyi tuhanda vetutekule. — Mateusi 7:12.