ETUTILO lia Jesus hatyipuka vala tyamonekele kohale atyihena esilivilo pala onthue hono. Apostolu Paulu wapopile esilivilo olio etyi ahonekele okuti: “Kristu watutilisua povokuankhia. Oe tete kuaveho velele mononkhia. Tyetyi ononkhia mbeya mokonda yomunthu wike, tupu vokuankhia mavakatutila mokonda yomunthu wike. Mokonda, ngetyi mu Andau aveho vankhia, tupu mu Kristu aveho mavakakala nomuenyo.”—1 Coríntios 15:20-22.

Onondaka mba Paulu mbulandulako mbupopia etyi etutilo lia Jesus lialinga. Paulu wati: “Tyetyi ononkhia mbeya mokonda yomunthu wike, tupu vokuankhia mavakatutila mokonda yomunthu wike.” Atuho tunkhia mokonda o Andau wetuetela onkhali. Mahi etyi Jesus aava otyilikutila tyomuenyo wae wehena nkhali, waikula ondyila opo ovanthu aveho vayovoke konkhali, nokututiliswa. Paulu wapopia nawa konthele oyo etyi ahonekele mu Romanos 6:23: “Ofeto yonkhali ononkhia, mahi otyali tuapewa na Huku omuenyo wahapu, menyina lia Kristu Jesus Tatekulu yetu.”