Endesa Ovilwa Viove Nounongo
1. Oñgeni 1 Coríntios 9:26 ipopia ovilinga viokuivisa?
1 Apostolu Paulu wahoneka okuti: ‘Ame hihateka tyihei oku ndyenda nako, tupu hilu nomphepo.’ (1 Cor. 9:26) Paulu ankho ukahi nokupopia etyi ankho aovola, okuumbila vali nawa Jeova. Anthi, onondaka ombo tupu mbupopia konthele yovilinga viokuivisa. Onthue tuhanda “okulwa” ine okulinga ononkhono nounongo, opo tufuisepo nawa ovilinga vietu. Ñgeni?
2. Oñgeni matuholovona omowo naapa tukaivisa okuhetekela Paulu novaivisi vakuavo votete?
2 Enda Apa Pavasiwa Ovanthu: Paulu novauli vakuavo Pomuvo wo Vakristau votete, ankho vakaivisa pana pavasiwa ovanthu. (Atos 5:42; 16:13; 17:17) Ngotyo, inkha ovanthu ovanyingi motelitoliu yetu vakala vali peumbo kokangulohi, oo omuwo waviuka okuivisa umbo-na-umbo. Okuti pana patalamena omakalela nomboyo, peyula ovanthu komuhuka ine o kekumbi tyina ovanthu vaya kovilinga ine tyina vakondoka keumbo? Onalupi ponovenda mbo motelitoliu peyula ovanthu? Okuivisa momatapalo pomivo ovio, tyipondola okuavela vali unene.
3. Oñgeni matuendesa ovilwa vietu nounongo monkhalelo tuundapa otelitoliu yetu?
3 Undapa Otelitoliu Nounongo: Tupu, tuesukisa okulunguka pokuendesa ovilwa vietu nounongo, monkhalelo tuundapa motelitoliu yetu. Mongeleka, hahe okuyapaula ovaivisi tyipona okutuma ovaivisi ovanyingi vakaundape pomphangu ike, mokonda tyipesela omuvo nokupuilisa okuonganeka. Tupu, tyina tuundapa motelitoliu kokule nepundaumbo, matutyivili okuyundapa aiho liwa, atukala vali no nomphitilo mbokupopia novanthu, inkha katuende nomatukutuku omanyingi. Okuti kese umwe upondola okupewa otelitoliu ikahi popepi neumbo liae, opo ahapesele omuvo omunyingi?
4. Oityi matyitukuatesako okuundapa nawa movilinga ‘viokufwa ovanthu?’
4 Jesus waeleka ovaivisi na vana ‘vafwa ovanthu.’ (Mar. 1:17) Omunthu wokufua, etyi ahanda hakupaka vala ondyolo momeva, mahi okukuata onohi. Ngotyo, vana vetyivila okufwa, vaya moola yaviuka nokuenda pana vei okuti mavavasipo onohi, iya avahimbika okufwa tyihakevelela. Enga, vaundapesa ononkhono mbavo nounongo. Nonthue tukalei nombili ngoyo movilinga viokuivisa.—Heb. 6:11.