Lekesa Okuti Upanda Otyali Tya Jeova
JEOVA o Huku una otyali. (Tiago 1:17) Tupondola okutala otyali tyae movipuka aviho atunga. Watunga eulu no nonthungululu, nohi ina omiti omiwa.—Salmos 65:12, 13; 147:7, 8; 148:3, 4.
Omuhoneki wo Salmu 104 wapandulile ovipuka aviho Jeova atunga, iya ahoneka otyiimbo tyokumuhivilika. Tyina utanga o salmo oyo, noove upandula ngo muhoneki wono salmu? Wati: “Mandyiimbila Jeova mokueenda kuomuenyo wange. Mandyiimbila Huku yange oviimbo tyina nkhele ndyina omuenyo.” (Salmo 104:33) Noove uhanda okulinga ngotyo?
ONGELEKA ONENE YOTYALI
Jeova uhanda tuhetekele otyali tyae. Iya wetuavela omahunga omawa okukala notyali. Watumine apostolu Paulu opo ahoneke okuti: “Londola ovahona mouye uno, vehelipakeko, vahapake ekevelelo liavo momalumono ahayumbwa onthumbi. Mahi, vayumbe onthumbi mu Huku, una waava ovipuka aviho, pala ehambu lietu. Opo valinge oviwa, opo vakale ovahona vovilinga oviwa, opo vakale ovakuatyali, velipongiya pala okuava. Iya avelipakela olumono malukeveetela ouwa komutwe, opo vakakatele momuenyo wotyotyili.”—1 Timóteo 6:17-19.
Momukanda wavali ahonekela ova Korintu, Paulu wahangununa etyi tyina okutulunda tyina tuavela vakuetu. Wati: “Kese umwe alinge ngetyi atokola momutima wae, ahaave nokulivela, ine okukuluminyua, mokonda Huku uhole una waava nehambu.” (2 Coríntios 9:7) Tyina tuna otyali oñgeni tukuatesako vakuetu? Paulu wati tupondola okukuatesako vakuetu okuveavela etyi vesukisa, nonthue tyitukuatesako mokonda Jeova metuyambe.—2 Coríntios 9:11-14.
Paulu ankho ukahi nokupopia ovipuka vilekesa okuti Huku una otyali etyi ati: “Ndyipandula Huku mokonda yo tyali tyae otyinene.” (2 Coríntios 9:15) “Otyali otyinene” tya Jeova tyakutikinya ovipuka aviho etuavela pokati ka Jesus Kristu. Tutupu onondaka mbutuuka pala okupopia esilivilo liotyiawa otyo.
Oñgeni tupondola okulekesa okuti tuapandula ovipuka aviho Jeova na Jesus vekahi nokutulingila nevi mavakalinga komutwe? Onkhalelo imwe tulekesa okuti tuna otyali, omokuava omuvo wetu, nononkhono, novipuka ovikuavo tuna pala okufenda Jeova, nokukuatesako vakuetu opo velilongese konthele yae. Tupondola okulinga ngootyo tyilinge tuna unene ine tuna vala katutu.—1 Crônicas 22:14; 29:3-5; Lucas 21:1-4.