Oityi Tulilongesila Ombimbiliya Nounkhengela?

OMAHIPULULO OMBIMBILIYA​—O OTYOTYILI

Brian: Okamene.

Eric: Tyetu.

Brian: Oñgeni onawa? Ame ndyitiwa o Brian. Iya ove?

Eric: Onawa. Ame ndyitiwa o Eric. Utyii, ame hesukile unene no nongeleya. Tutupu etyi matupopi.

Brian: Napandula etyi wapopia. Mahi nkhele ndyikupule, ove wekulila povanthu vaya ko nongeleya?

Eric: Enga. Mahi, etyi natunda meumbo andyikalongeswa mosikola onene, iya andyiyekepo okuenda kongeleya.

Brian: Ooo. Iya oityi walongesua kosikola oyo?

Eric: Nalongeswa o Estudos Sociais okulilongesa ovituwa viovanthu no História okulilongesa ehipululo lionthuko yovanthu. O História ndyiihole​—mokonda ipopia oku kuatuka ovanthu.

Brian: Okulilongesa omahipululo otyiwa. Hamwe utyii okuti Ombimbiliya, omukanda womahipululo. Okuti momaovololo ulinga, ukutikinya-mo Ombimbiliya?

Eric: Au. Ndyityii okuti Ombimbiliya omukanda ukahi nawa, mahi hinesoke okuti omukanda womahipululo.

Brian: Ndyiete okuti utyihole okuiva etyi vakuenyi vasoka. Inkha tyitavela, nahanda okukulekesa omahipululo amwe otyotyili avasiwa Mombimbiliya.

Eric: Tyitavela. Mahi, ame ndyitupu Ombimbiliya.

Brian: Ame ndyipondola okukulekesa mo yange. Ehipululo limwe likahi mu 1 Crônicas kapitulu 29 versikulu 26 no 27. Ono versikulu ombo mbupopia okuti: “David omona wa Jesse wali omutumini wo Isilayeli aiho, iya watuminine omanima 40. Mo Hebron watuminine-mo omanima 7, iya mo Jelusalei omanima 33.”

Eric: Oityi tyilekesa okuti ehipululo olio oliotyotyili?

Brian: Ovanthu vamwe ankho vapopia okuti kakunekale Ohamba itiwa o David.

Eric: Iya omokonda yatyi vapopila ngotyo?

Brian: Omokonda Ombimbiliya vala ityipopia, ankho kutupu vali omikanda omikuavo vipopia okuti kuali David. Mahi, mo 1993, vokuheyulula omatunthu, vavasa emanya limwe liokohale-hale no nondaka mbapitiyua okuti “Ondyuo ya David.”

Eric: Otyo tyikahi nawa.

Brian: Omunthu omukuavo wapopiua Mombimbiliya, o Posiu Pilatu, omutumini umwe waliko pononthiki mba Jesus. Mahi, vamwe ankho kavetavela okuti waliko. Wapopiua mu Lucas kapitulu 3 versikulu 1, kumwe novatumini ovakuavo vo pomuvo opo.

Eric: Ndyityeete. Yati: “Puetyi Posiu Pilatu ankho atumina otyilongo tyo Judeia, Herode ankho utumina epundaumbo lio Galileia.”

Brian: Watanga nawa. Momanima omanyingi, ovanongo vamwe ankho kavetavela okuti Posiu Pilatu ankho waliko umwe. Mahi, Kovilongo vio Koutundilo kuavasiwa emanya limwe liahonekwa enyina liae. Palambale omanima ehungi po 50 tunde etyi emanya olio liavasiwa.

Eric: Otyo, ame hinetyiive.

Brian: Napandula etyi tuahipulula nove konthele yotyo.

Eric: Utyii umwe, ame ndyina onthilo Nombimbiliya, mahi ndyisoka okuti omukanda vala, hinesoke okuti yesukisa unene hono. Tyipondola ina omahipululo otyotyili, mahi hinesoke okuti naina ina esilivilo enene.

OMBIMBILIYA ONKHULU​—MAHI TUPU OMUKANDA OMUPE

Brian: Ovanthu ovanyingi vapondola okutavela onondaka ombo. Mahi ame ndyimbutavela monkhalelo yelikalela. Utyii omokonda yatyi? Ovipuka tuesukisa, kaviapilulukile tunde ponthyimbi. Mongeleka, tunde ponthyimbi tuesukisa okulia, nomuvalo, nondyuo. Tuhanda okutomphola na vakuetu, nokukala nehambu mombunga. Okuti atuho katupande ovipuka ovio?

Eric: Tuvipanda.

Brian: Ombimbiliya ipondola okutukuatesako movipuka ovio aviho. Otyo tupopila okuti Ombimbiliya onkhulu, mahi tupu omukanda omupe.

Eric: Ñgeni ngotyo?

Brian: Oñgaa: Ombimbiliya ina onondonga mbakolela unene hono, ngetyi ankho mbakolela pomuvo yahonekwa. Iya tunde apa yahonekwa palambale omanima omanyingi.

Eric: Mahi, omovipuka patyi Ombimbiliya ipondola okutukuatesako?

Brian: Onondonga mbo Mbimbiliya mbupondola okutukuatesako okukala nolusoke luaviuka konthele yonombongo, nokukala nehambu mombunga, nokukala epanga ewa. Omukanda ou, upondola okutukuatesako okukala nomuenyo ukahi nawa. Kutavela okuti katyapepukile okukala omulume ukahi nawa, nokuhongolela ombunga mononthiki mbuno?

Eric: Otyili, katyapepukile. Nanepale kohale, mahi ame nomukai wange, katulivili.

Brian: Ovitateka ngovio viakaka. Mahi Ombimbiliya ina onondonga mbukuatesako ovanthu konthele yotyo. Tala etyi tyipopia Efésios mokapitulu 5. Tutale moversikulu 22, 23, no 28. Upondola okutanga?

Eric: Yoo. Pati: “Vakai tavelei kovalume venyi, ngatyina oku Tatekulu. Mokonda omulume omutwe womukai wae, ngetyi Kristu omutwe wewaneno, nomuyovoli walio.” Iya oversikulu 28 yati: “Moluotyo, ovalume vena okukala nohole novakai vavo, ngetyi vehole omalutu avo muene. Una uhole omukai wae ulihole oe muene.”

Brian: Watanga nawa, napandula. Kutyitavela okuti inkha ovalinepi valandula elondolo olio, ombunga ikala nawa?

Eric: Ndyisoka okuti ikala nawa. Mahi, okupopia otyipuka, tyapepuka vali tyipona okutyilinga.

Brian: Otyo umwe, kutupu omunthu uhapengesa. Mahi mokapitulu aka muna oversikulu itukuatesako okukala nolusoke luapola pokati.a Ovanthu aveho velinepa vesukisa okupola pokati, nokulitavela namphila umwe ankho ehetyihandele. Ame nomukai wange, tuaimbuka okuti Ombimbiliya ipondola okutukuatesako okupola pokati.

Eric: Mahi opo otyili.

Brian: Onombangi mba Jeova vena o site imwe muna omikanda vikuatesako ovalinepi, no nombunga. Inkha tyitavela, ndyipondola okukulekesa etyi tyilimo.

Eric: Ewaa. Tyitavela.

Brian: Tyikahi nawa. O site yetu oyei, www.jw.org/nyk. Oku okonthyimbi.

Eric: Omalutalatu aa omawa.

Brian: Omalutalatu aa, alekesa etyi tulinga tyina tukahi movilinga viokuivisa ouye auho. Apa tuhanda opapa. Pena osapi yati “Omikanda.” Apa movasipo Omutala Womulavi nomikanda omikuavo omipe. Mongeleka, apa pokuati omikanda no nombrochula pena omukanda ou: “Etyi Tyieta Ehambu Mombunga.” Momukanda ou muna onosapi ononyingi mbulekesa oñgeni matutetulula ovitateka vielikalaila. Oipi uhanda okunoñgonoka nawa?

Eric: Oyei, yokuati: “Onosapi Onombali opo Otyinepo Tyitualeko.” Nahanda okunoñgonoka oityi tyikuatesako otyinepo okutualako!

Brian: Tyikahi nawa, onthele ei, ipopia etyi ovalinepi vena okulinga opo otyinepo tyavo tyitualeko. Tala o palagrafu ei. Upondola okuitanga?

Eric: Enga. Yati: “Ohole, nonthilo viesukisa monkhalelo onkhuavo yotyinepo: metompho. Omulume una ohole, utomphola nomukai wae konthele yovilinga viae, novitateka viae, netyi asoka konthele yovipuka ovikuavo.” Etyi tyikahi nawa.

Brian: Watanga nawa, napandula. Pena o testu ei Yombimbiliya. Opo tuitange, tumanga vala kombanda yayo.

Eric: Iyaa, ndyiyeete. O Efésios 5:33. Yati: “Kese umwe puonwe, akale nohole nomukai wae, ngetyi oe muene elihole. Tupu, omukai akale nonthilo onene nomulume wae.”

Brian: Okuti wetyimona okuti otestu yapopia konthele yokulinga etyi kese umwe ahanda mukuavo emulinge?

Eric: Otyo wapopia hetyinoñgonokele nawa.

Brian: Oñgaa, omulume uhanda okutyimona okuti omukai wae una nonthilo nae. Tupu omukai uhanda okutyimona okuti omulume wae umuhole.

Eric: Otyo otyili.

Brian: Inkha omulume wovola apeho ononkhalelo mbokulekesa okuti uhole omukai wae, okuti omukai katyimupepukila okukala nonthilo nomulume wae?

Eric: Otyili, opo tyimupepukila.

Brian: Ngotyo, oversikulu ei ike vala Yombimbiliya, ikuatesako unene ovalinepi inkha vaendela muetyi ipopia. Mahi, apa yahonekwa, palambale omanima ehungi po 2.000. Ngetyi tuatanga konthyimbi, inkha ovalinepi vatomphola, otyinepo tyavo matyitualako.

Eric: Naina, Mombimbiliya muna ovipuka ovinyingi ankho nahasokela-mo.

Brian: Otyo wapopia tyihambukiswa Eric. Nahanda ñgeno tulivasa vali pano, opo tuhipulule konthele yovipuka vivali vipondola okukuatesako otyinepo okutualako, vikahi monthele ei mo site omu.b

Eric: Tyikahi nawa. Ame nomukai wange matukatanga onthele ei.