O Alumagedom Otyipuka Otyiwa!

1-2. (a) Omokonda yatyi o Alumagedom otyipuka otyiwa? (b) Omapulo patyi matulilongesa?

OKUTI nthiki imwe weivile-ale ovanthu vapopia okuti o “Alumagedom” ovilwa mavihanye-ko ovanthu aveho ine otyinimawe matyipaa ovanthu? Mahi otyo tyelikalela netyi Ombimbiliya ipopia. Ombimbiliya ilekesa okuti o Alumagedom otyipuka tyihambukiswa! (Ehol. 1:3) Ovilwa vyo Alumagedom hapala okuhanya-ko ovanthu, mahi opala okuveyovola! Ñgeni ngotyo?

² Ombimbiliya ilekesa okuti ovilwa vyo Alumagedom maviyovola ovanthu mokumana-ko outumini wovanthu. Ovilwa ovio mavikamana-ko ovivi iya vana valinga etyi tyaviuka avatualako nomuenyo. Tupu mavikamana-ko ovipuka aviho vihanya ohi. (Ehol. 11:18) Opo tutyinoñgonoke nawa, matukumbulula omapulo aa ekuana: O Alumagedom oityi? Ovipuka patyi maviendepo tyina o Alumagedom iheneye? Oityi tuesukisa okulinga opo tukahupe ko Alumagedom? Oñgeni tupondola okutualako okukala ovakuatyili ku Siovaa tyina o Alumagedom ifuenako?

ALUMAGEDOM OITYI?

3. (a) Oityi ondaka “Alumagedom” ihangununa? (b) Ngetyi tyipopia Eholololo 16:14, 16, omokonda yatyi tunela onthumbi yokuti o Alumagedom ha tyilongo-ko?

³ Tanga Eholololo 16:14, 16. Ondaka “Alumagedom” yapopiwa vala like mo Mbimbiliya iya yatuka mondaka yo Hebeleu ihangununa okuti “Omphunda yo Mesido.” (Ehol. 16:16; okatoi) O Mesido ankho epunda-umbo lyo mo Isilayeli. (Jos. 17:11) Mahi ondaka Alumagedom kaipopi otyilongo. Ondaka oyo ipopia omuvo ‘onohamba mbo kombanda yohi aiho’ maveliwaneka opo valuise Siovaa. (Ehol. 16:14) Mahi monthele ei, tupu matupopi ondaka “Alumagedom” opo tulekese ovipuka maviendepo tyina onohamba ombo mbamahetekela okuluisa Siovaa. Oñgeni tutyii ondaka Alumagedom kaipopi otyilongo? Tete, omokonda kutupu omphunda itiwa o Mesido. Vali, o Mesido otyilongo otyitutu vala. Ngotyo, “onohamba mbo kombanda yohi aiho,” nomauta, nomafualali aeho, kaafumo. Tatu, ngetyi matulilongesa komutwe, ovilwa vyo Alumagedom mavihimbika tyina ovatumini vamautukila ovanthu va Huku mouye auho.

4. Omokonda yatyi Siovaa alukila ovilwa viae enyina lielikuata no Mesido?

⁴ Omokonda yatyi Siovaa alukila ovilwa viae enyina lielikuata no Mesido? Ko Mesido no kevota lyo tyilongo tyimwe ankho tyikala popepi tyitiwa o Jezileele, ankho kuluilwa unene. Pamwe Siovaa ankho ukuatesako ovanthu vae okufinda onondyale mbavo. Mongeleka, Huku wakuatesileko Omukoyesi Barake okufinda Sisera nomafualali ae “popepi nomaande oko Mesido.” Barake nomuuli Debora vapandulile Siovaa etyi evekuatesako okufinda onondyale mbavo. Vaimbile okuti: “Ononthungululu mbo keulu mbaluisa Sisera. Ondongi yo ko Kisom yevetyindapo.” — Juí. 5:19-21.

5. Omonkhalelo patyi ovilwa vyo Alumagedom vielikalela novilwa vya Barake?

⁵ Barake na Debora vavitulile otyiimbo tyavo nonondaka ombu: “Ngotyo, Siovaa, onondyale mbove ambuho mbunkhie, mahi vana vekuhole vakale ngekumbi litunda.” (Juíz. 5:31) Onondyale mba Huku navo mavankhi mo Alumagedom, mahi vana vemuhole mavakayovolwa. Mahi ovilwa vyo Alumagedom novilwa vya Barake vielikalela. Mo Alumagedom ovaumbili va Huku kamavekesukisa okulwa iya alo umwe kamavakamaneka! Mokonda ‘ononkhono mbavo mambukatuka kokukala tyahiliya nokuyumba onthumbi’ mu Siovaa no monoandyu mbae. — Isa. 30:15; Ehol. 19:11-15.

6. Oityi Siovaa apondola okuundapesa opo ahanyeko onondyale mbae?

⁶ Oñgeni Siovaa makahanyako onondyale mbae mo Alumagedom? Huku upondola okuundapesa ononkhalelo ononyingi. Mongeleka, upondola okueta ovinimawe, nombila yongandavila, nomiliakulo. (Jó 38:22, 23; Eze. 38:19-22) Upondola okulinga onondyale mbae mbulipilukile-mo. (2 Crô. 20:17, 22, 23) Tupu upondola okutuma onoandyu mbae mbuvehanyeko. (Isa. 37:36) Kese tyipuka Huku makaundapesa, tuna onthumbi yokuti makafinda onondyale mbae. Ambuho mambukahanyuako. Mahi vana vokulinga etyi ahanda, mavakayovolwa. — Pro. 3:25, 26.

OVIPUKA PATYI MAVIENDEPO TYINA O ALUMAGEDOM IHENEYE?

7-8. (a) Ngetyi tyipopia 1 Ova Tesalonika 5:1-6, onondaka patyi ovatumini mavakapopia? (b) Omokonda yatyi omatutu oo maakanyona ovanthu?

⁷ Tete mavakapopia okuti “tuna ombembwa, tukahi metuliyo” iya konyima “onthiki ya Siovaa” aiya. (Tanga 1 Ova Tesalonika 5:1-6.) Mu 1 Ova Tesalonika 5:2, “onthiki ya Siovaa” ilekesa “ononkhumbi ononene.” (Ehol. 7:14) Oñgeni matuimbuka okuti ononkhumbi ononene mambuhimbika? Ombimbiliya itupopila konthele yonondaka mbumwe mambukapopiwa. Iya onondaka ombo mambukalekesa okuti ononkhumbi ononene mambuhimbika.

⁸ Ombupi onondaka ombo? Oputyina ovatumini vamapopi okuti “tuna ombembwa, tukahi metuliyo.” Omokonda yatyi mavakapopila ngotyo? Okuti ononkhalamutwe mbonongeleya navo maveliwaneka novatumini mokupopia onondaka ombo? Hamwe. Mahi tutyii okuti onondaka ombo omatutu vala ovilulu. Omatutu oo maakanyona unene ovanthu mokonda mavasoko okuti pahe vena ombembwa yotyotyili, mahi naina ononkhumbi ononene mambuhimbika mouye auho. Pomuvo opo “mavauhululwa nehanyauno, ngetyi omaluihamo okukutula auhulukila omukai omulemi.” Iya ovaumbili va Siovaa? Hamwe mavakatumphuluka mokonda kavetyii nawa-nawa onalupi ononkhumbi ononene mambuhimbika, mahi kamavahuvu netyi matyiendepo.

9. Okuti Siovaa makahanyako ouye wa Satanasi momuvo wike vala? Hangununa.

⁹ Siovaa kamakahanyako ouye wa Satanasi momuvo wike vala ngetyi alingile pononthiki mba Noe. Tete, mahanyeko Ombambilonia Onene — onongeleya ambuho mbomatutu. Konyima, ahanyeko ovipuka ovikuavo viouye wa Satanasi mo Alumagedom. Ovipuka ovio viakutikinya opulitika, nomafualali, novitanda. Pahe matulilongesa vali nawa ovipuka ovio vivali Siovaa makalinga.

10. Ngetyi tyipopia Eholololo 17:1, 6 no 18:24, omokonda yatyi Siovaa mahanyenako Ombambilonia Onene?

¹⁰ “Ekoyeso liekunga enene.” (Tanga Eholololo 17:1, 6; 18:24.) Ombambilonia ononene yalinga ovipuka ovinyingi visilisa enyina lya Huku. Mongeleka, ilongesa ovanthu omatutu konthele ya Huku. Yalekesa okuti itupu onthilo na Huku mokukuatesako ovatumini, ngetyi tyilinga ekunga. Mokonda ina epondolo, ikuluminya ovanthu okulinga etyi ihanda iya ivepola onombongo mbavo. Tupu Ombambilonia onene yaipaa ovanthu ovanyingi, okukutikinyamo ovaumbili va Huku. (Ehol. 19:2) Oñgeni Siovaa makahanyako Ombambilonia Onene?

11. “Enyama enkhuhu” oityi? Iya oñgeni Siovaa mekeliundapesa opo ahanyeko Ombambilonia Onene?

¹¹ Siovaa makaundapesa ‘onombinga ekwi’ ‘mbenyama enkhuhu’ opo ahanyeko “ekunga enene.” Enyama enkhuhu lilekesa eongano limwe litiwa o Nações Unidas. Iya onombinga ekwi mbulekesa-tyi? Mbulekesa ovatumini vakuatesako eongano olio. Momuvo Huku anaka, ovatumini ovo mavakapilukila-mo Ombambilonia Onene. Ovatumini ovo ‘mavekeipola ovipuka aviho aveisi muhoyo.’ Otyo tyilekesa okuti mavekeipola omalumono ayo iya avalekesa kovanthu aveho okuti Ombambilonia Onene ondingavivi. (Ehol. 17:3, 16) Mokonda Ombambilonia Onene maikahanyuako liwa-liwa, matyimoneka ngatyina ovipuka ovio viaendapo vala monthiki ike. Iya ehanyauno olio malihuvisa vana vakuatesako Ombambilonia Onene, mokonda ilimphanda okuti: “Napumphama ngonkhai-hamba, ame himuhepe-ko iya himalili nalumwe.” — Ehol. 18:7, 8.

12. Siovaa kamayeke ovatumini valinge-tyi iya omokonda yatyi?

¹² Huku kamayeke ovatumini vahanyeko ovaumbili vae. Ovaumbili va Siovaa vena onthilo nenyina liae iya vetavela otyitumino tyae tyokutunda mo Mbambilonia Onene. (Ovil. 15:16, 17; Ehol. 18:4) Tupu valinga ononkhono mbokukuatesako vakuavo okutunda-mo. Mokonda yotyo, ‘kamavatambulila kumwe nayo omahingano ayo.’ Mahi otyo katyilekesa okuti ekolelo liavo kamalikalolwa. Ñgeni ngotyo?

13. (a) Goge olie? (b) Ngetyi tyipopia Ezequiel 38:2, 8, 9, oityi matyilundu Goge okuutukila ovaumbili va Siovaa?

¹³ Okuutukilwa na Goge. (Tanga Ezequiel 38:2, 8, 9.) Tyina onongeleya ambuho mbomatutu mbamahanyuako, makukesala vala ovaumbili va Siovaa. Otyo matyinumanesa unene Satanasi. Iya Satanasi malekesa onyengo yae mokuyandyanesa “onondaka . . . mbasila” mbatuka kovilulu. Onondaka ombo mambulundu ovanthu vovilongo aviho okuliwaneka opo vautukile ovaumbili va Siovaa. (Ehol. 16:13, 14) Otyikundyi otyo, tyiihanwa okuti o “Goge yotyilongo tya Magoge.” Tyina ovanthu ovo vamautukila ovaumbili va Siovaa, opo o Alumagedom maihimbika. — Ehol. 16:16.

14. Oityi Goge makaimbuka?

¹⁴ Goge makayumba onthumbi “mokuvoko [kwae] kuohitu,” ine omafualali ae. (2 Crô. 32:8) Onthue matukayumba onthumbi mu Huku yetu Siovaa. Mahi ku Goge, otyo matyikala ngatyina owova. Omokonda yatyi? Omokonda namphila Ombambilonia Onene ankho ina epondolo, no ngotyo yahanyuako ‘nenyama enkhuhu’ no “nombinga ekwi.” Iya ovikahuku viayo kavieikuatesileko. (Ehol. 17:16) Goge mahinangela ovipuka ovio, asoko okuti tupu matyimupepukila okuhanyako ovaumbili va Siovaa. Makautukila ovaumbili va Siovaa mouye auho “ngomakaka aoya meulu.” (Eze. 38:16) Mahi konyima Goge maimbuka okuti watokela meliva. Maimbuka okuti naina ukahi nokuluisa Siovaa Huku, ngetyi tyalingile Falao Melunga Enkhuhu. — Êx. 14:1-4; Eze. 38:3, 4, 18, 21-23.

15. Oityi Sesusi makalinga movilwa vyo Alumagedom?

¹⁵ Sesusi Kilisitu no noandyu mavakayakulila ovaumbili va Huku, avakahanyako Goge. (Ehol. 19:11, 14, 15) Satanasi oe mahongiliya ovanthu okuliwaneka opo vautukile ovaumbili va Siovaa. Naina, oityi matyikamonekela ondyale oyo ya Siovaa? Sesusi makapaka Satanasi novilulu viae mokaleya iya avakala-mo omanima 1.000. — Ehol. 20:1-3.

OITYI WESUKISA OKULINGA OPO UHUPE KO ALUMAGEDOM?

16. (a) Oñgeni tulekesa okuti ‘twii Huku’? (b) Oityi matyikamoneka na vana vei Huku po Alumagedom?

¹⁶ Tyilinge tuvakulu ine tuvape motyili, tuesukisa okulekesa okuti ‘twii Huku’ iya atutavela “onondaka onongwa konthele ya Tatekulu Sesusi,” opo tuhupe ko Alumagedom. (2 Tes. 1:7-9) Onthue ‘twii Huku’ tyina tunoñgonoka etyi ehole netyi eyele novitumino viae. Tupu tulekesa okuti tumwii tyina tukala nohole nae, nokumutavela, na tyina tumufenda vala aike. (1 Suau 2:3-5; 5:3) Inkha tulekesa okuti twii Huku, nae malekesa okuti utwii. Iya otyo matyiketuhupisa ko Alumagedom! (1 Kol. 8:3) Ñgeni ngotyo? Mokonda ‘okuiwe na Huku’ tyilekesa okuti wetupanda.

17. Oityi tyihangununa okutavela “onondaka onongwa konthele ya Tatekulu Sesusi”?

¹⁷ “Onondaka onongwa konthele ya Tatekulu Sesusi,” mbakutikinya ovipuka aviho Sesusi alongesile vikahi Mondaka ya Huku. Onthue tulekesa okuti tutavela onondaka onongwa konthele ya Sesusi tyina tuendela-mo. Iya otyo tyakutikinya okupaka Ouhamba wa Huku pomphangu yo tete, nokuendela movitumino vya Huku, nokuivisa. (Mat. 6:33; 24:14) Tupu tyakutikinya okukuatesako onondenge mba Kilisitu movilinga ovinyingi vena. — Mat. 25:31-40.

18. Oñgeni ovalembulwa mavakakondolela ovipuka oviwa valingilwa nonongi ononkhuavo?

¹⁸ Apa katutu, ovalembulwa mavakala nomphitilo yokukondolela ovipuka oviwa valingilwa ‘nonongi ononkhuavo.’ (Suau 10:16) Ñgeni ngotyo? Tyina o Alumagedom ihenehimbike, ovalembulwa aveho veli pano pohi pomuvo opo, mavatualwa keulu opo vakale ovana va Huku vahankhi vali. Omokonda yatyi mavatuailwa aveho keulu pomuvo opo? Omokonda vo 144.000 mavalingi onthele yonoandyu mambukahanyako Goge, nokuyakulila onongi ononkhuavo. (Ehol. 2:26, 27; 7:9, 10) Mo Alumagedom, onongi ononkhuavo mavakahambukwa unene mokonda yetyi vakuatesileko ovalembulwa, etyi ankho nkhele veli pano pohi!

OÑGENI TUPONDOLA OKUTUALAKO OVAKUATYILI TYINA O ALUMAGEDOM IFUENA-KO?

19-20. Oityi matyitukuatesako okutualako okukala ovakuatyili tyina o Alumagedom ifuena-ko, namphila tuna ovitateka?

¹⁹ Mononthiki mbuno mbonthyulilo ovanyingi povaumbili va Siovaa vekahi nokulambela movitateka. Mahi no ngotyo tupondola okukoleleya nehambu. (Tia. 1:2-4) Otyipuka tyimwe tuesukisa okulinga, okutualako okulikuambela nomutima auho. (Luka 21:36) Tyihe-kulikuambela vala, tupu tuesukisa okulilongesa Ombimbiliya ononthiki mbatyo ambuho, nokusokolola ku etyi tutanga. Iya otyo tyakutikinya okulilongesa omaulo apopia konthele yetyi matyikeya komutwe wandyila. (Sal. 77:12) Inkha tulinga ovipuka ovio iya atuivisa onondaka onongwa, ekolelo lietu nekevelelo lietu mavitualako tyapama!

²⁰ Soka vala oñgeni mokahambukwa tyina Ombambilonia Onene yamahanyuako na tyina o Alumagedom yamapu! Iya tyakolela vali, soka oñgeni molitehelela tyina ovanthu aveho pano pohi mavakala nonthilo nenyina lya Huku nokutavela okutuminwa nae! (Eze. 38:23) Tyayandyuluka nawa okuti o Alumagedom otyipuka otyiwa ku vana vei Huku, vetavela Omona wae iya vakoleleya alo konthyulilo. — Mat. 24:13.