Tanga Ombimbiliya Opo Upoleko Ouwa Omunene
“Ame tyotyili ndyihambukwa novitumino via Huku.” —ROMANOS 7:22.
1-3. Oñgeni okutanga Ombimbiliya nokuendela muetyi tuatanga tyitukuatesako?
OMPHANGE umwe omukulu wati, “ononthiki ambuho komuhuka ndyipandula Jeova mokonda unkhuatesako okunoñgonoka Ombimbiliya.” Namphila atangale Ombimbiliya ovikando vilamba po 40, na hono nkhele wiitanga. Omphange umwe omuhikuena wahonekele okuti okutanga Ombimbiliya tyemukuatesako okunoñgonoka okuti Jeova tyilityili okuekahi, nokukala noupanga omuwa nae. Wati: “Hinekale nehambu ngeli ndyinalio hono!”
2 Apostolu Petulu wetulongesa okuti tuesukisa okupanda otyili tyivasiwa Mondaka ya Huku. (1 Pedro 2:2) Tyina tutanga Ombimbiliya nokuendela muetyi tuelilongesa, matukala nomutima wasukuka, nomuenyo una esilivilo. Otyo matyitukuatesako okukala noupanga omuwa navana vehole Huku yotyotyili nokumuumbila. Oo omahunga omawa opo “tuhambukilwe ovitumino via Huku.” (Romanos 7:22) Oñgeni okulilongesa Ombimbiliya tyipondola okutukuatesako?
3 Putyina ulilongesa vali konthele ya Jeova, Nomona wae, tupu ohole yove navo, novanthu vakuenyi mailiyawisa. Tupu Ombimbiliya maikulongesa oñgeni Huku mayovola ovaviuki tyina amahanyaunako onondingavivi. Movilinga viove viokuivisa una onondaka onongwa pala okutolela ovanthu. Iya upondola okukala nonthumbi yokuti Jeova mekukuatesako tyina ulongesa vakuenyi etyi ukahi nokulilongesa.
TANGA OMBIMBILIYA NOKUSOKOLOLA KUETYI WATANGA
4. Okutangela Ombimbiliya “pombuelo” tyilekesa tyi?
4 Jeova uhanda tuovole omuvo wokusoka, nokunoñgonoka etyi tutanga Mombimbiliya. Wapopilile Josue okuti: “Omukanda ou wovitumino, uhakale kokule nomulungu wove. Iya una okuutangela pombuelo otyitenya notyinthiki.” (Josué 1:8; Salmo 1:2) Okuti otyo tyilekesa okuti tuna okutangela peulu ine opombuelo Ombimbiliya aiho? Au. Tyilekesa okuti tuesukisa okutanga monkhalelo imwe itukuatesako okusoka kuetyi tukahi nokutanga. Otyo matyikukuatesako okutala nawa onoversikulu onongwa, mambukukuatesako. Tyina uvasa onondaka ine ehipululo lipameka, uhatange okukuluminya, upondola okutangela pombuelo. Inkha ulinga ngotyo, etyi ukahi nokutanga tyipondola okukuhika komutima. Omokonda yatyi otyo tyakolela unene? Mokonda tyina unoñgonoka nawa onondonga mba Huku, mohande okuendelamo.
5-7. Popiapo onongeleka mbulekesa okuti okutanga nawa Ondaka ya Huku nokulipulukwa tyipondola okukuatesako (a) okutavela ovitumino via Huku; (b) okupopia nawa navakuenyi; (c) okuyumba onthumbi mu Jeova mononthiki mbepuiya.
5 Tyina tutanga omikanda Viombimbiliya tusoka okuti vipuiya okuvinoñgonoka, etyi tyipondola okutukuatesako, okutanga nawa nokulipulukwa opo tutyivile okusoka kuetyi tukahi nokutanga. Mongeleka, soka komukuatate umwe omukuendye ukahi nokutanga omukanda wa Oseia. Mokapitulu 4, tyina amatange onoversikulu 11 alo 13, utalamapo katutu opo asoke. (Tanga Oséias 4:11-13.) Omokonda yatyi? Omokonda ankho kosikola ukahi nokuhongiliyua opo alinge ovivi. Mahi putyina asoka konoversikulu ombo, ulipopila okuti: ‘Jeova umona ovipuka ovivi ovanthu valinga alo umwe tyina vekahi aveke. Ame hihande okumunumanesa.’ Omukuatate atokola okuti matualako okutavela ovitumino via Huku konthele yovituwa oviwa.
6 Mongeleka yavali, soka komphange umwe ukahi nokutanga nawa omukanda wa Joel iya wehika mokapitulu 2, oversikulu 13. (Tanga Joel 2:13.) Oversikulu oyo imukuatesako okunoñgonoka okuti wesukisa okuhetekela Jeova, wokuna “okankhenda, notyieve, wahanumana liwa, nokuna okankhenda okanene.” Atokola okulinga omapiluluko amwe mokonda pamwe ankho unumanena nokukandukila omulume wae, novanthu ovakuavo.
7 Mongeleka yatatu, soka komukuatate umwe una omukai novana. Wapolua movilinga iya pahe wasukalala noñgeni matekula ombunga yae. Utanga nawa omukanda wa Naum 1:7 wati, Jeova wii nawa vana vemuyumba onthumbi iya mekeveamena “monthiki yononkhumbi.” Otyo atyikuatesako omukuatate okuimbuka okuti Jeova umuhole kumwe nombunga yae, ahasukalala vali unene. Iya atange nawa oversikulu 15. (Tanga Naum 1:15.) Aimbuka okuti upondola okulekesa okuti wayumba onthumbi mu Jeova pokuivisa onondaka onongwa Mbouhamba alo umwe mononthiki mbepuiya. Moluotyo, tyina aovola ovilinga ovikuavo, matualako okuundapa vali unene movilinga viokuivisa mokueenda kuosimano.
8. Popiapo tyimwe welilongesa etyi watanga Ombimbiliya.
8 Onongeleka ombo onongwa tuamana okulilongesa, mbapolwa momikanda Viombimbiliya ovanthu vamwe vasoka okuti vipuiya okuvinoñgonoka. Mahi tyina uvasa onoversikulu mbukuavela ondundo, mohande okutualako okutanga omikanda ovio vipondola okukupameka, nokukukalesa omunongo. Tyotyili, omikanda aviho Viombimbiliya vipondola okutuvatela. Ondaka ya Huku yelifwa nomphangu ina ono diamante. Putyina utanga Ombimbiliya aiho, tualako okutaindya opo uvasemo “ono diamante,” ine ehongolelo nepameko.
LINGA ONONKHONO OPO UNOÑGONOKE ETYI UTANGA
9. Oityi tupondola okulinga opo tunoñgonoke vali nawa Ombimbiliya?
9 Tyakolela okutanga Ombimbiliya ononthiki ambuho, mahi tupu wesukisa okulinga ononkhono mbokunoñgonoka etyi utanga. Moluotyo, ovolola momikanda viomupika opo ulilongese konthele yovanthu, no nomphangu, nomahipululo watangamo. Inkha kutyii oñgeni una okulandula tyimwe watanga Mombimbiliya, upondola okupopia nomukulu umwe weuaneno ine omunthu omukuavo walongoka nawa motyili opo ekukuateseko. Kohale kuali Omukristau umwe ankho wesukisa ombatelo opo anoñgonoke vali nawa otyili. Enyina liae o Apolu.
10, 11. (a) Oñgeni Apolu elitehelela etyi akuatesuako opo aivise vali nawa onondaka onongwa? (b) Oityi tulilongesila ku Apolu? (Tala okakasa “Ukahi Nokulongesa Ovipuka Ovipe?”)
10 Apolu wali Omukristau umwe omu Judeu ankho “wii nawa Ovihonekwa,” nokuna ombili movilinga viokuivisa. Omukanda wa Atos upopia okuti Apolu ankho wivisa konthele ya Jesus. Mahi ankho ketyii okuti Jesus walongesile otyipuka tyimwe otyipe konthele yombatisimu. Akila na Prisila veiva Apolu ankho ulongesa mo Efesu, iya “avemulongesa vali nawa ondyila ya Huku.” (Atos 18:24-26) Ouwa patyi Apolu apoleleko?
11 Etyi aya ko Akaia, Apolu watuaileko nokulongesa. Waundapesile Ovihonekwa opo alongese ova Judeu ankho vehetavela okuti Jesus o Kristu. Wakuatesileko vana ankho vetavela onondaka onongwa. (Atos 18:27, 28) Mokonda pahe wanoñgonoka etyi tyihangununa ombatisimu Yomukristau, “wakuatesileko unene” ovape okulongoka nawa motyili. Otyo tyitulongesa tyi? Nga Apolu, tulingei ononkhono mbokunoñgonoka etyi tutanga Mombimbiliya. Mahi tupu tuesukisa okuliola omutima opo tutavele nolupandu onondonga tupewa opo tukale vali ovalongesi ovawa.
KUATESAKO VAKUENYI NETYI UKAHI NOKULILONGESA
12, 13. Oñgeni matuundapesa Ovihonekwa noluembia opo tukuateseko omulongwa Wombimbiliya okukula mopaspilitu?
12 Nga Prisila, na Akila, na Apolu, nonthue tukuateseiko vakuetu. Oñgeni ulitehelela tyina ukuatesako omunthu una esuko opo alinge omapiluluko momuenyo wae, atualako okukula mopaspilitu? Ine hamwe umukulu weuaneno, oñgeni ulitehelela tyina Omukristau mukuenyi ekupandula mokonda yelondolo Liombimbiliya wemuavelele tyina ankho ena ovitateka? Tyotyili, tyituhambukiswa unene tyina tuundapesa Ombimbiliya opo tukuateseko vakuetu okulinga omapiluluko momuenyo wavo.a Oñgeni matutyilingi?
13 Kononthiki mba Eliya, ova Isilayeli ovanyingi ankho kavatokolele inkha mavalandula efendelo liotyotyili ine oliomatutu. Etyi Eliya apopilile ova Isilayeli ovo tyipondola okukuatesako ovalongwa Vombimbiliya nkhele vehenetokole okuumbila Jeova. (Tanga 1 Reis 18:21.) Ine hamwe omunthu una owoma wokuti omapanga ae ine ombunga mavemupopi mokonda yokulilongesa Ombimbiliya. Upondola okutomphola nae konthele yonondaka mbukahi mu Isaías 51:12, 13 (Tanga) opo umukuatesako okutokola okufenda Jeova.
14. Oityi matyikukuatesako okuhinangela onoversikulu Mbombimbiliya opo utyivile okukuatesako vakuenyi?
14 Mombimbiliya muna onondaka ononyingi mbupondola okutuavela ondundo, nokutuviukisa, nokutupameka. Mahi hamwe ulipula okuti: ‘Oñgeni mandyihinangela onotestu natanga tyina namesuku nambo?’ Tanga Ombimbiliya ononthiki ambuho, nokusokolola kuetyi watanga. Okulinga ngotyo, monoñgonoka vali nawa Ombimbiliya, iya Jeova upondola okukuavela ospilitu sandu yae opo ikukuateseko okuhinangela etyi ipopia.—Marcos 13:11; tanga João 14:26.b
15. Oityi matyikukuatesako okunoñgonoka vali nawa Ondaka ya Huku?
15 Ngo Hamba Salomau, likuambela ku Jeova okuita ounongo opo ufuisepo ovilinga viokuivisa, novio mewaneno. (2 Crônicas 1:7-10) Hetekela ovauli, nokuovolola nawa Mondaka ya Huku. Otyo matyikukuatesako okunoñgonoka otyili konthele ya Jeova nehando liae. (1 Pedro 1:10-12) Apostolu Paulu wapopilile Timoteo atange “onondaka mbekolelo nondongeso ongwa.” (1 Timóteo 4:6) Inkha ulinga ngotyo, motyivili okukuatesako vakuenyi mopaspilitu. Tupu ekolelo liove malipame.
OKUTANGA OMBIMBILIYA TYITUYAKULILA
16. (a) Ouwa patyi ova Bereia vapolele “kokutanga Ovihonekwa ononthiki ambuho”? (b) Omokonda yatyi okutanga Ombimbiliya ononthiki ambuho tyakolela unene kuonthue hono?
16 Ova Judeu ankho vakala mo Bereia ankho “vatanga nawa Ovihonekwa ononthiki ambuho.” Etyi Paulu evepopila onondaka onongwa, vahimbika okueleka onondaka mbae netyi ankho vei konthele Yovihonekwa. Ovanyingi puvo avaimbuka okuti Paulu ankho ukahi nokulongesa otyili, iya “avetavela.” (Atos 17:10-12) Otyo tyilekesa okuti okutanga apeho Ombimbiliya tyipameka ekolelo lietu mu Jeova. Tuna okukala nekolelo liapama inkha tuhanda okunyingila mouye omupe wa Huku.—Hebreus 11:1.
17, 18. (a) Oñgeni ekolelo liapama, noluembia viyakulila omutima wetu wotyilekeso? (b) Oñgeni ekevelelo lituyakulila?
17 Paulu wapopile okuti tuesukisa okukala nekolelo, noluembia, nekevelelo. Wati: “Onthue vokuaama komutenya, tutualeiko okukala tyalunguka, nokuvala ondyakulilo yekolelo no yoluembia, no kapasete kekevelelo lieyovo.” (1 Tessalonicenses 5:8) Efualali liesukisa okuyakulila omutima walio kondyale. Tupu, omutima wetu wotyilekeso wesukisa okuyakulilwa. Tyina Omukristau akala nekolelo liapama momilao via Huku, nohole onene Nae, navakuavo, uyakulila omutima wae wotyilekeso. Malingi atyiho evila opo atualeko okupandwa na Huku.
18 Tupu Paulu wapopile okapasete, “ekevelelo lieyovo.” Omafualali kohale ankho avala okapasete opo ayakulile omutwe. Tyina tupameka ekevelelo mounongo wa Jeova wokutuyovola, ekevelelo lietu maliyakulila omalusoke etu. Ekevelelo lietu liapama litukuatesako okuanya onondaka onombi mbavana vayapuka motyili, mbupondola okuliyandyana liwa mewaneno ngatyina ouvela. (2 Timóteo 2:16-19) Tupu ekevelelo lietu malitupameka, nokutukuatesako okulityilika ovituwa ovivi.
OKUTANGA OMBIMBILIYA MATYITUKUATESAKO OKUHUPA
19, 20. Omokonda yatyi tupandulila unene Ondaka ya Huku? Oñgeni matulekesa okuti tueipanda? (Tala okakasa “Jeova Wampha Umwe Etyi Nesukisa.”)
19 Putyina tuhika konthyulilo youye uno, tuesukisa okuyumba vali onthumbi Mondaka ya Jeova. Otyo matyitukatesako okuyekapo ovituwa ovivi, nokulwa nomahando etu okulinga onkhali. Matyituavela ondundo, nokutupameka opo tukoleleye mu kese tyitateka tuetelwa na Satanasi, nouye wae. Onondonga mbukahi Mondaka ya Jeova mambutukuatesako okukala mondyila yomuenyo.
20 Hinangela okuti Huku uhanda “ovanthu vatyo aveho vayovolwe.” Otyo tyakutikinya ovaumbili vae aveho, navana vatehelela tyina tuvepopila onondaka onongwa, nokuvelongesa. Mahi aveho vahanda okuhupa konthyulilo youye uno vena okukala “nenoñgonoko liafuapo konthele yotyili.” (1 Timóteo 2:4) Inkha tuhanda okuhupa, tuna okutanga Ombimbiliya, nokuendela monondonga mbayo. Okutanga Ombimbiliya ononthiki ambuho tyilekesa okuti tuapanda Ondaka ya Jeova.—João 17:17.
a Katuesukisile okuundapesa Ombimbiliya opo tukuluminye omunthu okupiluluka ine okumupopila okuti omukalavi. Tuesukisa okuhetekela Jeova, nokukala noumphwa-lundo, noluembia navana tulongesa Ombimbiliya.—Salmo 103:8.
b Mahi, inkha uhinangela vala onondaka, ohahinangela oversikulu yatyo? Upondola okuivasa mo Índice konyima Yombimbiliya, mo Watchtower Library, ine mo Concordância yo Tradução do Novo Mundo.