Kala Noluembia Nokuliola Omutima Nga Jesus

1. Omokonda yatyi tyina tuhetekela Jesus tufuena vali ku Jeova?

OVIKANDO ovinyingi, tuovola okuhetekela ovanthu vetuhuvisa. Kovanthu aveho vakaleleko kohale, Jesus Kristu omunthu wavilapo tuna okuhetekela. Omokonda yatyi? Jesus wapopile okuti: “Una uluete ame, tupu uluete Tate.” (João 14:9) Jesus wapopile ngotyo mokonda uhetekela nawa Tate yae. Ngotyo, tyina tulilongesa konthele ya Jesus, tukahi nokulilongesa konthele ya Jeova. Iya tyina tuhetekela Jesus, tufuena vali ku Jeova, Omunthu wavilapo mouye auho. Olio elao limwe enene!

2, 3. (a) Omokonda yatyi Jeova utupopila ovipuka ovinyingi konthele yomuenyo wa Jesus, iya oityi Huku akevelela tulinge? (b) Oityi matulilongesa monthele ei nonkhuavo mailandulako?​

² Mombimbiliya, Jeova utupopila ovipuka ovinyingi konthele yomuenyo wa Jesus. Omokonda yatyi? Omokonda Huku uhanda tunoñgonoke Omona wae opo tutyivile okumuhetekela nawa-nawa. (Tanga 1 Pedro 2:21.) Mombimbiliya, ongeleka Jesus etusila yelekwa nononthambo. Oityi otyo tyihangununa? Jeova uhanda tulandule ononthambo mbo Mona wae, otyo tyihangununa okuhetekela Jesus movipuka aviho alingile. Tyotyili, Jesus ankho utupu onkhali, ngotyo, Jeova kakevelela tuhetekele Omona wae monkhalelo yafuapo. Mahi, Huku uhanda tulinge ononkhono ononene mbokuhetekela Jesus.

³ Matulilongesa ovituwa vimwe oviwa via Jesus. Monthele ei, matupopi ovituwa vivali via Jesus, okueliola omutima noluembia. Monthele onkhuavo, matupopi omutima wakola, nounongo wokupunga nawa ovipuka. Matukumbulula omapulo etatu konthele ya kese tyituwa: Oityi tyihangununa? Oñgeni Jesus etyilekesa? Oñgeni tupondola okumuhetekela?

JESUS WELIOLA OMUTIMA

4. Oityi tyihangununa okuliola omutima?

⁴ Okuliola omutima oityi? Ovanthu vokulipakako vasoka okuti okuliola omutima otyilekeso tyokuti omunthu watopa ine keliyumbu onthumbi. Okuti otyo otyili? Hono, opo omunthu eliole omutima wesukisa okulinga ononkhono, nokukola omutima. Okuliola omutima tyelikalela nokulipakako nomalityindailo. Opo tuliole omutima, tete tuesukisa okukala nolusoke luaviuka konthele yetu muene. Mongeleka, o disionaliu imwe Yombimbiliya yati: “Okuliola omutima okunoñgonoka okuti onthue tuvatutu unene kolupala lwa Huku.” Tupu, inkha tueliola omutima kamatusoko okuti tuvanene vali ku vakuetu. (Romanos 12:3; Filipenses 2:3) Katyapepukile kovanthu ovakuankhali okulekesa otyituwa otyo. Mahi tupondola okulilongesa okuliola omutima, inkha tusokolola kounene wa Jeova nokuhetekela ongeleka ya Jesus.

5, 6. (a) Mingeli arkandyu olie? (b) Oñgeni Mingeli alekesile okuti weliola omutima?

⁵ Oñgeni Jesus alekesa okuti weliola omutima? Omona wa Huku apeho walekesile okuti weliola omutima, tyilinge etyi ankho oandyu yepondolo keulu, netyi eile pano pohi. Matutale onongeleka mbumwe.

⁶ Otyituwa tyae. Omukanda wa Judas, utulongesa konthele yomuenyo wa Jesus puetyi nkhele eheneye pano pohi. (Tanga Judas 9.) Jesus, onkhalamutwe yonoandyu, utiwa Mingeli arkandyu, “velipatana Neliapu okupopia konthele yolutu lwa Moisesi.” Etyi Moisesi ankhia, Jeova apake olutu lwae pomphangu imwe pahavasiwa novanthu. (Deuteronômio 34:5, 6) Tyafuile Eliapu ankho lihanda ova Isilayeli vafende olutu lwa Moisesi. Namphila Eliapu ankho lihanda okulinga ngotyo, Mingeli nomutima wakola emutyilika. Omukanda umwe wapopia okuti ondaka “velipatana” tupu ipopia okulipatana “mombonge,” iya ilekesa okuti “Mingeli watyilika Eliapu okulinga etyi ankho ahanda okulinga nolutu lwa Moisesi.” Mahi, Mingeli ankho utyii okuti epondolo liae lina apa lihulila. Ngotyo, atuala omphela ku Jeova, Omukoyesi Wavilapo, mokonda oe vala una otyilinga tyokukoyesa Satanasi. Mokualinga ngotyo, Jesus walekesa okuti weliola omutima!

7. Oñgeni Jesus alekesile okuti weliola omutima muetyi apopia, netyi alinga?

⁷ Puetyi Jesus ankho ekahi pano pohi, tupu walekesile okuti weliola omutima muetyi apopia netyi alinga. Pokupopia. Jesus nalumwe ahandele vakuavo vemunkhimaneke. Mahi, ankho uhanda Tate yae apewe omunkhima auho. (Marcos 10:17, 18; João 7:16) Jesus ankho kapopi novalongwa vae monkhalelo velitehelela okuti vatombwa ine kavesilivila. Mahi, ankho una onthilo navo nokulekesa okuti uveyumba onthumbi pokuvehivilika movituwa viavo oviwa. (Lucas 22:31, 32; João 1:47) Muetyi alinga. Jesus waholovonene okukala nomuenyo wapola pokati tyehena omalumono. (Mateus 8:20) Ankho wafuapo pala okulinga ovilinga vakuavo vehetavela okulinga. (João 13:3-15) Jesus tupu waava ongeleka ongwa yokuliola omutima mokonda yokutavela. (Tanga Filipenses 2:5-8.) Tyelikalela novanthu vokulipakako, veyele okutavela vakuavo, Jesus nomutima weliola walingile atyiho Jeova emupopila, alo “kononkhia.” Tyayandyuluka nawa okuti Jesus, Omona womulume, ankho “weliola omutima.”—Mateus 11:29.

KALA NOMUTIMA WELIOLA NGA JESUS

8, 9. Oñgeni tupondola okulekesa okuti tueliola omutima?

⁸ Oñgeni tupondola okukala nomutima weliola nga Jesus? Ovituwa vietu. Putyina tueliola omutima, tutyii okuti outumini wetu una apa woyela. Ngotyo, tutyii okuti katupondola okukoyesa vakuetu. Kamatuvepopi omapita ine okukala nondima navo. (Lucas 6:37; Tiago 4:12) Okuliola omutima, matyitukuatesako okulityilika okukala “ovaviuki unene.” Otyo tyilekesa okuti kamatusoko okuti tuvanene vali kuvakuetu vehena ovilinga ine ounongo ngo wetu. (Eclesiastes 7:16) Ovakulu vewaneno veliola omutima, kavasoko okuti ovanene vali kovakuatate vavo no nomphange. Mahi, ovanthita ovo voluembia “vatala vakuavo ngatyina ovanene vali kuvo,” ine vakolela vali kuvo.—Filipenses 2:3; Lucas 9:48.

⁹ Soka ku W. J. Thorn, wehimbika ovilinga viokutalelapo omawaneno mo 1894. Etyi palamba omanima omanyingi, apewa otyilinga tyokuyunga oviufwa mo Ngalandya Youhamba ko Nova York. Tyina asoka okuti ñgeno ankho ulinga ovilinga vikahi vali nawa, Omukuatate Thorn ulipopila okuti: “Ame nalingwa vala nonthata. Oityi ndyina opo ndyilipakeko?” (Tanga Isaías 40:12-15.) Ankho weliola omutima!

10. Oñgeni tulekesa okuti tueliola omutima muetyi tupopia netyi tulinga?

¹⁰ Muetyi tupopia. Inkha tyilityili tueliola omutima, matyitalelwa konkhalelo tupopia na vakuetu. (Lucas 6:45) Tyina tutomphola navo, kamatupopi vala unene ovilinga vietu novipuka tulinga. (Provérbios 27:2) Mahi, matuhivilika ovakuatate vetu nonomphange mokonda yovipuka oviwa valinga, novituwa viavo oviwa, nounongo vena. (Provérbios 15:23) Muetyi tulinga. Ovakristau veliola omutima kavaovola omunkhima ine okukala ovanene mouye uno. Mahi, vaholovona okutyinda omuenyo wapola pokati, alo umwe valinga ovilinga vihankhimanene, opo vetyivile okuundapa vali unene movilinga via Jeova. (1 Timóteo 6:6, 8) Haunene, tulekesa okuti tueliola omutima putyina tutavela. Tuesukisa okuliola omutima “pokutavela ku vana vekahi komutwe” mewaneno, nokulandula, nokutavela ehongolelo lieongano lia Jeova.—Hebreus 13:17.

JESUS UNA OLUEMBIA

11. Oluembia oityi?

¹¹ Oluembia luelikuata kumwe nokankhenda. Ovihonekwa vipopia okuti Jeova na Jesus vena okankhenda okanene noluembia. (Lucas 1:78; 2 Coríntios 1:3; Filipenses 1:8) Ombimbiliya imwe yapopia konthele yoluembia okuti: “Oluembia hankhalelo vala tulitehelela konthele ya vana vesukisa okukuatesiwako. Mahi otyituwa tyitulunda okusuka unene na vakuetu, iya atulingi atyiho tuvila opo tuvekuateseko okupilulula omuenyo wavo.” Oluembia otyituwa tyilunda omunthu okukuatesako vakuavo okukala nomuenyo ukahi nawa.

12. Oityi tyilekesa okuti Jesus ankho una okankhenda okanene na vakuavo, iya oityi oluembia luemulundile okulinga?

¹² Oñgeni Jesus alekesile oluembia? Onkhalelo ankho elitehelela, novipuka alinga. Jesus ankho una okankhenda okanene na vakuavo. Etyi amona epanga liae Maliya na vakuavo ankho valila Lasalu wanyima, Jesus nae alili. (Tanga João 11:32-35.) Okankhenda akala nako opo atutilise omona womuhepe, oko kemulundile opo atutilise Lasalu. (Lucas 7:11-15; João 11:38-44) Otyituwa otyo, hamwe tyaavela Lasalu omphitilo yokuenda keulu. Jesus “wakalele noluembia” novanthu ovanyingi veile kwe. Okankhenda kae okanene akemulundu “okuvelongesa ovipuka ovinyingi.” (Marcos 6:34) Ovanthu ovo, valandulile omalongeso a Jesus avapilulula omuenyo wavo. Oluembia olunene lwa Jesus luemulundile okukuatesako ovanthu.—Mateus 15:32-38; 20:29-34; Marcos 1:40-42.

13. Oñgeni ankho Jesus apopia na vakuavo noluembia? (Tala olutalatu pefo pahimbikila onthele.)

¹³ Onondaka mbae mboluembia. Okankhenda ka Jesus kemulundile okupopia navakuavo noluembia, haunene vana valingwa onya. Apostolu Mateus wapopile onondaka mba Isaia konthele ya Jesus. Isaia wati: “Kamamiangula olumbungu luatyopwa-tyopwa, nokanyanga katuima kamekenyimi.” (Isaías 42:3; Mateus 12:20) Otyo tyilekesa tyi? Jesus kalingile onya ovanthu. Mahi ankho upopia monkhalelo ivepameka. Waivisile onondaka mbekevelelo ‘ku vana vena omutima watekateka.’ (Isaías 61:1) Jesus wakongele ovanthu ankho “valemenwa, nokuaponwa” veye kwe opo “vavase epameko.” (Mateus 11:28-30) Wapopilile ovalongwa vae okuti Huku una oluembia olunene novaumbili Vae aveho, alo umwe vana vatalwa nouye ngatyina vehesilivila.—Mateus 18:12-14; Lucas 12:6, 7.

HETEKELA OLUEMBIA LWA JESUS

14. Oñgeni tupondola okulekesa okuti tuna oluembia na vakuetu?

¹⁴ Oñgeni tupondola okukala noluembia nga Jesus? Onkhalelo tulitehelela. Ombimbiliya itupopila tulinge ononkhono mokukala “nokankhenda okanene,” mokonda onthue katuatyitilwe notyituwa otyo. Tukala vala notyituwa otyo tyina “tukala ovanthu ovape” ngetyi Jeova akevelela Kovakristau aveho. (Tanga Colossenses 3:9, 10, 12.) Oñgeni upondola okulekesa oluembia? Ombimbiliya yati: “Oluembia luenyi luliyandyane.” (2 Coríntios 6:11-13) Tehelela nawa tyina omunthu ekupopila oñgeni elitehelela, novipuka vimusukalalesa. (Tiago 1:19) Putyina apopia lipula okuti: ‘Inkha ame ndyili motyitateka otyo, ñgeno nalinga ñgeni? Oityi ñgeno nesukisa?’—1 Pedro 3:8.

15. Oityi matulingi opo tukuateseko vana vekahi nokumona ononkhumbi?

¹⁵ Okulinga ovipuka noluembia. Oluembia malutulundu okukuatesako vakuetu, haunene vana vekahi nokumona ononkhumbi. Oñgeni tupondola okuvekuatesako? Romanos 12:15 yati: “Lilei na vana valila.” Ovikando ovinyingi, ovanthu vahanda vali okupamekwa tyipona okutetulula otyitateka tyavo. Vahanda epanga lisuka navo nokuvetehelela. Omphange umwe wapamekelue novakuatate no nomphange etyi anyimisa omona wae omukainthu wati: “Napandulile unene etyi omapanga ange veya, avandilisako.” Nonthue tupondola okulekesa oluembia pokulinga ovipuka vikuatesako vakuetu. Tupondola okukuatesako omuhepe okuviukisa otyitunge tyae. Ine hamwe okukapola omukuatate wakulupa opo eye komaliongiyo, no movilinga viokuivisa ine okumutuala kosipitali. Okulekesa okankhenda namphila pamwe tualinga vala otyipuka otyitutu, tyikuatesako unene omunthu. (1 João 3:17, 18) Haunene, tulekesa okuti tuna okankhenda na vakuetu putyina tuundapa unene movilinga viokuivisa onondaka onongwa. Oyo, onkhalelo ongwa yokukuatesako ovanthu vokuna omutima waviuka!

16. Oityi tupondola okupopia opo tupameke vana vasoya?

¹⁶ Onondaka mbetu mboluembia. Oluembia malutulundu “okupopia onondaka mbuungumanesa vana vasoya.” (1 Tessalonicenses 5:14) Oityi tupondola okupopia opo tuvepameke? Tupondola okuvepopila okuti tuesuka unene navo. Tupondola okuvepandula, nokuvekuatesako okunoñgonoka ovituwa viavo oviwa, nounongo. Tupondola okuvehinangelesa okuti Jeova uvepanda, otyo evekuatesilako okuvasa otyili. (João 6:44) Tupondola okuvepopila okuti Jeova usuka unene novaumbili vae “vaihamenwa komutima” ine “vamona ononkhumbi.” (Salmo 34:18) Onondaka mbetu mboluembia mbupondola okukuatesako vana vesukisa okupamekwa.—Provérbios 16:24.

17, 18. (a) Oñgeni Jeova ahanda ovakulu vewaneno vatekule onongi mbae? (b) Oityi matulilongesa monthele mailandulako?

¹⁷ Vakulu vewaneno, Jeova uhanda mutekule onongi mbae noluembia. (Atos 20:28, 29) Hinangela okuti otyilinga tyove, okulongesa, nokupameka, nokuavela ondundo onongi mbae. (Isaías 32:1, 2; 1 Pedro 5:2-4) Ngotyo, omukulu weuaneno una okankhenda kayungu etyi ovakuatate vae valinga, nokuhinda ovitumino ine okuvekuluminya okulinga etyi vehevili. Mahi, omukulu wewaneno uhanda ovakuatate vae no nomphange vakale nehambu liotyotyili, nokuyumba onthumbi yokuti ohole vena na Jeova oyo ivelunda okulingila Huku nononkhono mbavo ambuho.—Mateus 22:37.

¹⁸ Okusokolola koluembia lwa Jesus nokueliola kwae omutima, matyitulundu okumuhetekela. Monthele mailandulako, matulilongesa oñgeni tupondola okukala nomutima wakola, nounongo wokupunga nawa ovipuka nga Jesus.