Omokonda Yatyi Ombimbiliya Yakolela Pala Ononthiki Mbetu
“Ovihonekwa aviho o Huku watuma vihonekwe, iya vipondola okuundapeswa nesilivilo . . . liokuhongolela omienyo viovanthu.”—2 TIMÓTEO 3:16, A Bíblia de Jerusalém.
MOKUEENDA kuovityita viomanima, Ombimbiliya yalunda ovanthu vonontheto ononyingi, okupilulula ovituwa viavo avakala nomuenyo omuwa. Oversikulu yapopiwa pombanda, ilekesa omokonda yatyi Ombimbiliya yakolela konthele oyo. Omokonda Ounongo wayo utunda ku Huku. Namphila Ombimbiliya yahonekwa novanthu, itupopila omalusoke a Huku. Ombimbiliya ihangununa okuti: “Ovanthu vapopia onondaka mba Huku nombatelo yononkhono mbae.”—2 Pedro 1:21.
Ombimbiliya ituhongolela mononkhalelo onombali. Tete, itulekesa nawa onkhalelo yaviuka yomuenyo. Vali, ina ononkhono mbokulunda ovanthu pala okulinga omapiluluko esukisa opo vavase onkhalelo oyo yaviuka yomuenyo. Tutalei ononkhalelo ombo onombali.
Ovihonekwa Vitulekesa Ovipuka Viakolela
Mombimbiliya, Huku walaa okuti: “Ame mandyikulongo onondunge, mandyikulekesa ondyila una okuendela. Mandyikuavela onondonga neiho liange litala kuove.” (Salmo 32:8) Tala okuti Huku kaave vala omalondolo, tupu, wava enoñgonoko, ine ounongo utukuatesako okupunga ovipuka. Okukala nounongo wokupunga ovipuka viakolela tyotyili, tyituyakulila opo tuhapesele omuenyo wetu okuovola ovipuka vihasilivila.
Mongeleka, ovanthu ovanyingi ehando liavo momuenyo, okuovola enkhimano ine omalumono. Omikanda viokuava onondonga vihongiliya unene ovanthu oñgeni mavakala nomunkhima ine okukala ovahona. Anthi Ombimbiliya, itupopila okuti: “Elulu omunthu ena na mukuavo . . . tyitupu esilivilo, okuhatekela vala momphepo.” “Una uhole onombongo kamatuuka onombongo.” (Eclesiastes 4:4; 5:10) Okuti elondolo olio liakolela pala onthue hono?
Opo tutale oñgeni onondonga mbo Mbimbiliya mbakolela, tutalei ongeleka ya Akinori ko Japau. Akinori walinga ononkhono onene mbokulilongesa, wapita monosikola onene, etyivili okuvasa ovilinga mondyuo yankhimana. Ovipuka aviho ankho ngoti vikahi nokumueenda nawa. Mahi, omunkhima oo auho kawemuetelele ehambu ankho akevelela. Emone neponwa vianyona ekongoko liae. Ombatelo omapanga ae kovilinga ankho vemupa kaihi. Nokuasoya, elipake movikunwa asoko alo umue okuliipaa. Konyima wahimbika okulilongesa Ombimbiliya no Nombangi mba Jeova. Etyi alongeswa tyapilulula olusoke lwae konthele yovipuka viakolela vali momuenyo. Mokamuvo kehehi, onongembia mbae ambuhimbika okutepuluka. Mokonda Akinori wayekapo okukala nomalityindailo nelungavi, wahimbika okulitehelela ngetyi Ombimbiliya ipopia mu proverbio okuti: “Omutima wokuna ombembwa wavela omuenyo olutu.”—Provérbios 14:30, Bíblia Sagrada— Nova Versão Internacional.
Otyipuka patyi tyakolela vali momuenyo wove? Oityi tyipondola okukuetela ombembwa yotyotyili? Okuti okukala nomuenyo omuwa motyinepo? Ine okuavela ovana vove onthyimbi ongwa momuenyo? Okuti okukala nomapanga omanyingi? Ine okuvasa ehambu momuenyo? Ovipuka ovio aviho viakolela. Tyotyili, Ombimbiliya yati otyiwa okuviovola, mahi hatyoko tyakolela vali momuenyo wetu. Ombimbiliya, itulekesa nounongo otyipuka tyakolela opo tukale nombembwa momuenyo. Yati: “Tila Huku yotyotyili, nokutualako okuendela movitumino viae. Mokonda etyi, otyo ovanthu aveho vena okulinga.” (Eclesiastes 12:13) Tyina tutomba ovitumino ovio, tyituetela onongembia, nokulinyengwa, nokusoya. Anthi, Ombimbiliya itulaa okuti: “Una uyumba onthumbi mu Jeova omuna-mbembwa.”—Provérbios 16:20.
Oñgeni Ombimbiliya Ilunda Ovanthu Okulinga Omapiluluko
Apostolu Paulu wahoneka okuti: “Ondaka ya Huku ina omuenyo nononkhono ononene.” Ngomutunga watuwa ononthele onombali, inyingila alo komalusoke omunthu nomahando ae. (Hebreus 4:12) Ombimbiliya ina epondolo liokupilulula omuenyo wovanthu, mokonda ivekuatesako okutala oñgeni tyotyili vatuwa, hangetyiko ovo muene vasoka. Vana vena omutima waviuka, mavaimbuka okuti vesukisa okulinga omapiluluko. Mongeleka, Paulu wapopia konthele yo Vakristau mewaneno lio Korintu kohale ankho vali ovimphulu, nononkholwa, nokulinga omaundalelapo, okuti: “Vamue puonwe otyo muali ngotyo. Mahi, pahe muasukulwa . . . nononkhono mba Huku yetu.” (1 Coríntios 6:9-11) Ononkhono mba Jeova no hono mbuundapa, nokuna epondolo liokulunda ovanthu okulinga omapiluluko esukisa.
Mario ukala ko Europa, wali omulume umue ongangala ankho usipa epangwe nokulilandesa. Onthiki imue, epulisa liakuata epangwe liae, oe anumana unene alwisa epulisa olio, ahanyauna etukutuku liae. Tupu, Mario ankho una onongele ononyingi mokonda ankho kaundapa. Aimbuka okuti kametyivili okutetulula ovitateka viae aike, iya etavela okulilongesa Ombimbiliya. Etyi Mario anoñgonoka ovihonekwa, ahimbika okulisukula nokuvala nawa, ayekepo otyituwa tyokulandesa epangwe noungangala. Ovanyingi ankho vokwi ovituwa viae, avahuvu. Vehimbika okumutalameka mondyila avemupulu okuti, “ove umue Mario?”
Oityi tyalunda Akinori na Mario okupilulula omienyo viavo, nokuvasa ombembwa nehambu lio tyotyili momuenyo? Tyimoneka nawa okuti tyevevatela enoñgonoko epe konthele ya Huku, vavasa mokulilongesa Ombimbiliya. Huku oe vala wava onondonga mbakolela tuesukisa, opo tukale nomuenyo omuwa pahe, nekevelo liomuenyo wahapu komutue. Mokonda Jeova Huku o Tate, utupopila no Mbimbiliya okuti: “Tehelela mona wange, nokutavela onondaka mbange. Ngotyo, omanima omuenyo wove maakala omanyingi. . . . Tyina weenda, omphai yove kamailingi otyinkhonya-nkhonya, iya inkha uhateka, kumelipunduka. Kakatela monondonga, uhembuyeke. Mbukoneka nawa, mokonda ombo omuenyo wove.” (Provérbios 4:10-13) Onondonga patyi mbakolela vali tyipona mbokuovola ehongolelo Liomupakeko wetu?
[Ehangununo liolutalatu pefo 5]
(Kokumbili) O Akinori etyi ankho omukuavitanda pahe nomukai wae vaivisa otyili tyo Mbimbiliya nehambu
[Okakasa/pefo 7]
Onondonga Mbakolela Hono
Ombimbiliya yava ovitumino viakolela, vipondola okutuhongolela mononthele ambuho mbomuenyo hono. Tala ovitumino vimue:
• Okukala noupanga omuwa na vakuenyi
“Ovipuka aviho muhanda ovanthu vemulingile, tupu nonue ovio muvelingila.”—Mateus 7:12.
“Una ulipaka koututu pokati kenyi, oe omunene.”—Lucas 9:48.
“Landulei otyituwa tyokuyakula ovaenda.”—Romanos 12:13.
• Okufinda Ovituwa Vinyona
“Una weenda novanongo, nae makala omunongo, mahi una ulinga oupanga nomalai makala novitateka.”—Provérbios 13:20.
“Uhakale pokati kononkholwa.”—Provérbios 23:20.
“Uhalinge oupanga nomunthu wononyengo.”—Provérbios 22:24.
• Okupameka Otyinepo
“Kese umue puonwe, akale nohole nomukai wae, ngetyi oe muene elihole. Tupu, omukai akale nehumbilo enene nomulume wae.”—Efésios 5:33.
“Livalekei okankhenda, nouwa-tima, nehiliyo, nomutima weliola, noumphua-lundo. Tualeiko okulikoleleya pokati na vakuenyi, nokulievela pokati tyihakuluminyua.”—Colossenses 3:12, 13.
• Okukuatesako Ovana
“Longesa omukuendye ondyila yaviuka atokala, opo ahayapukemo tyina amakulupa.”—Provérbios 22:6.
“Onwe vohe, muhanumanesei ovana venyi, anthi tualeiko okuvetekula montheto no movitumino via Jeova.”—Efésios 6:4.
• Okulityilika Omalutañgu
“Tyina ekumbululo liapoleya, likondola onyengo, anthi, ondaka iihamesa iyawisa onyengo.”—Provérbios 15:1.
“Kalei ovatete kokulekesa ehumbilo kese umue na mukuavo.”—Romanos 12:10.
Alo umue pokati komapanga, tyina velilandesa tyimue, tyesukisa okutyihoneka opo velityilike omalutañgu. Moluotyo, Jeremia omuumbili wa Huku, wahoneka okuti: “Nahoneka omukanda andyiupake oselu, andyiihana onombangi pokupeyala onombongo kotyipeyalo.”—Jeremias 32:10.
• Okukala nolusoke luaviuka
“Ovipuka aviho viotyotyili, . . . viholwe, . . . vipopiwa nawa, omalusoke aeho novituwa aviho oviwa vikahiko, novipuka aviho viapandwa vikahiko, tualeiko okulinga ovipuka ovio.”—Filipenses 4:8.
Ombimbiliya yava ondundo yokulityilika omalusoke ahaviukile, nokuviyula “vokuliyava onkhalelo yavo yomuenyo.” Yati: “Hambukwei nekevelelo.”—Judas 4, 16; Romanos 12:12.
Okuendela movitumino ovio oviwa, katyituetela vala ombembwa nehambu, tupu tyituvatela okuendela movitumino via Huku nokupewa ononkhano onongwa. Ombimbiliya yati: “Ovaviuki mavapiñgana oohi, iya avakakalamo apeho.”—Salmo 37:29.