Omutumini Wetu Wombili Hono

“Watunda nokufinda opo akamanuhule okufinda.”—REVELAÇÃO 6:2.

1, 2. (a) Oñgeni ovilinga via Kristu viouhamba tunde mo 1914 viapopiwa mo Mbimbiliya? (b) Ovilinga patyi ekahi nokulinga tunde etyi avialekwa?

KRISTU wavialekua ngo Hamba Youhamba wa Mesiya mo 1914. Ove usoka okuti Kristu ukahi ñgeni hono? Okuti umutala ngatyina Ohamba ipumphi kotyipundi tyayo, itala vala liwa-liwa pohi pamwe-pamwe, oñgeni ewaneno liae likahi nokuundapa? Inkha ongotyo tusoka, tuesukisa okupilulula omalusoke etu. Omukanda wa Salmu no wa Revelação vipopia okuti oe Ohamba yapama ipumphi konkhambe, ikahi nokuhateka pala “okufinda opo akamanuhule okufinda,” okutualako alo amanuhula “nawa.”—Revelação 6:2; Salmo 2:6-9; 45:1-4.

² Otyilinga tyotete Kristu alinga etyi avialekwa kouhamba, okufinda “enyoka no noandyu mbalio.” Mokonda Kristu o Arkandyu Mingeli, no noandyu mbae, oe wataha Satanasi novilulu viae keulu, okuvitahela popepi noohi. (Revelação 12:7-9) Konyima, motyilinga tyae apewa ‘tyomutumwa womphango’ ya Jeova, Jesus aveya na Tate yae okutala nawa ondyuo yopaspilitu. (Malaquias 3:1) Iya oe akoyesa onongeleya mbo Vakristau vouye, mbokuna vali onkhali onene mo “Mbambilonia Onene,” embuvasi nonkhali yohonde no yokulinga omaumbalehi mopaspilitu novatumini vouye uno.—Revelação 18:2, 3, 24.

Ukahi Nokusukukisa Ovapika Vae Pano Pohi

3, 4. (a) Ovilinga patyi Kristu “omutumwa” wa Jeova alinga? (b) Etyi veya okutala nawa ondyuo yopaspilitu oityi vavasamo? Iya Jesus Omutwe weuaneno, aave otyilinga patyi?

³ Pokutala nawa ondyuo yopaspilitu, Jeova “nomutumwa” wae, tupu vavasa pepata liondyuo oyo, onthumbo imwe yo Vakristau votyotyili, vahalingi onthele monongeleya mbo Vakristau vouye. Anthi, alo umwe Ovakristau ovo ovalembulwa, ine “ovana va Levi,” navo ankho vesukisa okusukukiswa. Ankho tyikahi ngetyi omuuli Malakia apopile okuti: “Oe [Jeova] mapumphama ngonkhulungu nomusukukisi wopalata, iya asukukisa ovana va Levi. Una okuvekangula ngoolu nopalata, iya avakala ovanthu vapakula nouviuki ovilikutila ku Jeova.” (Malaquias 3:3) Jeova atumu “omutumwa womphango,” Kristu Jesus opo asukukise ova Isilayeli vopaspilitu.

⁴ Ngotyo, tupu Jesus wavasa ovalembulwa Ovakristau vekolelo vekahi nokulinga ononkhono mbokuavela okulia kuopaspilitu veumbo liae vekolelo. Tunde menima lio 1879, vatualako okuyandyanesa otyili Tyombimbiliya konthele Youhamba wa Huku okuundapesa Omutala Womulavi alo umwe pomuvo wononkhumbi. Jesus waulile okuti tyina “ameya” pala okutala nawa vomeumbo liae mokueenda “konthyulilo youye uno,” oe mavasi omupika ukahi nokuveavela “okulia momuvo wanakua.” Oe maihana omupika oo okuti omuna-mbembwa, nokumuavela otyilinga “tyokuyunga omalumono ae aeho” pano pohi. (Mateus 24:3, 45-47) Iya Kristu Omutwe weuaneno lio Vakristau, ukahi nokuundapesa “omupika oo wekolelo nokualunguka” pala okuyunga omalumono Ouhamba wae pano pohi. Oe wavela ehongolelo “ovatekulwa” ovalembulwa, nomapanga avo ‘onongi mbae ononkhuavo,’ menyina lio Nonkhalamutwe mbo Nombangi mba Jeova.—João 10:16.

Ovilinga Viokuteya Pano Pohi

5. Otyilinga patyi otyinene apostolu João amuene memonekelo?

⁵ Apostolu João wakalele nemonekelo liotyipuka otyikuavo matyikalingwa Nohamba Mesiya “monthiki ya Tatekulu,” konyima yetyi Oe avialekwa mo 1914. João wahoneka okuti: “Ame namona ekaka limwe engonga, iya kekaka olio kuapumphama omunthu umwe ukahi ngo mona womulume, una ekolowa lioolu komutwe nofoso imwe yokuatwa peke.” (Revelação 1:10; 14:14) João weiva oandyu imwe yatunda ku Jeova ipopila Omuteyi oo, opo ahimbike okuteya , mokonda “ovikuna kombanda yoohi viayela.”—Revelação 14:15, 16.

6. Oityi Jesus apopile okuti matyikamoneka mokueenda kuomuvo?

⁶ Otyilinga otyo “tyokuteya pano pohi,” tyituhinangelesa onthengele popia ya Jesus yotiliku nevu. Jesus welieleka oe muene nomulume wakuna otiliku mepia liae nekevelelo liokuteyamo otiliku onyingi ongwa. Otyo tyilekesa “ovana vouhamba,” Ovakristau votyotyili valembulwa opo vakatumine nae Mouhamba wae. Mahi, mokueenda kuotyinthiki, ondyale imwe, “Eliapu,” akunu evu mepia olio, “ovana vondingavivi.” Omukuni atolela ovaundapi vae vayeke otiliku nevu vikulile kumwe alo pomuvo wokuteya, “konthyulilo youye wovivi.” Pomuvo oo, oe matumu onoandyu mbae opo mbuyapule otiliku nevu.—Mateus 13:24-30, 36-41.

7. Oñgeni Kristu ekahi nokuendesa “ovilinga viokuteya pano pohi”?

⁷ Okufuisapo emonekelo olio liapelwe João, Jesus ukahi nokuhongolela ovilinga viokuteya ouye auho. “Ovilinga viokuteya pano pohi” viahimbika etyi otyihupe tyo 144.000 “ovana vouhamba,” vahimbika okuongiyua “otiliku” Jesus apopiwa monthengele popia. Okuelikalela kuo Vakristau votyotyili no vomatutu, kuamoneka nawa konyima Yovita Ovinene Viotete Viouye auho. Kuamoneka unene monkhalelo ikahi nokuvatela ovilinga viokuongiya onongi ononkhuavo, onthele yavali ‘yovilinga viokuteya pano pohi.’ Ovanthu ovo “ha vana ko vouhamba,” anthi, “otyinyingi otyinene” tyovanthu vetavela Ouhamba oo. Ovanthu ovo vekahi nokupolwa pokati “kovanthu aveho, nomalongo, nomalaka.” Vetavela Ouhamba wa Mesiya, utuminwa na Kristu no 144.000 “onosandu” mavakatumina kumwe na Jesus moutumini oo wokeulu.—Revelação 7:9, 10; Daniel 7:13, 14, 18.

Uhongolela Omawaneno

8, 9. (a) Oityi tyilekesa okuti Kristu katale vala ovituwa viewaneno aliho, mahi tupu utala onkhalelo ya kese umwe mewaneno? (b) Ngetyi tyalekeswa pefo 26, ovipuka patyi “viaya kohi via Satanasi” tuesukisa okulityilika?

⁸ Monthele yalamba tuelilongesa oñgeni Kristu atalele nawa onkhalelo yopaspilitu ya kese umwe mewaneno kotyita tyotete P.K. Mononthiki mbetu, Omutumini wetu Kristu Ohamba yapewa “outumini auho keulu no pohi,” ukahi nokutumina nombili omawaneno ouye auho no nonkhalamutwe mbao. (Mateus 28:18; Colossenses 1:18) Jeova “emulingi omutwe wovipuka aviho pala ewaneno” liovalembulwa. (Efésios 1:22) Ngotyo, oe weete atyiho tyipita momawaneno Onombangi mba Jeova, alamba po 100.000.

⁹ Jesus watumine onondaka ombu kewaneno lio Tiatila kohale: “Omona wa Huku, una omaiho ngomutemo wotupia, . . . wati: ‘Ndyii ovipuka ulinga.’” (Revelação 2:18, 19) Oe waviyulile vewaneno olio mokonda yomaundalelapo avo, nomuenyo womalumono, okuvepopila okuti: “Ame, ame una wovolola monoso no momitima. Iya ame mandyimuavela kese umwe etyi tyatokala muevi mualinga.” (Revelação 2:23) Onondaka ombo mbulekesa okuti Kristu katale vala ovituwa viewaneno aliho, mahi tupu utala onkhalelo ya kese umwe mewaneno. Jesus wapandele Ovakristau mo Tiatila, “vana vehei ‘ovipuka viaya kohi via Satanasi.’” (Revelação 2:24) Hono, Jesus tupu utavela ovana ine ovakulu, velityilika okutala “ovipuka viaya kohi via Satanasi” mo Internete ine omo novideo game mboungangala ine okutavela omalusoke ovanthu vayekelela ovipuka ovivi. Oe uhambukwa unene okutala ononkhono ononene Ovakristau ovanyingi valinga hono pala okulandula ehongolelo liae mononkhalelo ambuho mbomuenyo wavo!

10. Onkhalelo Kristu ahongolela ovakulu vewaneno yaelekwa natyi? Mahi, oityi ovakulu ovo vewaneno vesukisa okuimbuka?

¹⁰ Kristu uhongolela nohole omawaneno ae pano pohi, mokuundapesa ovakulu vewaneno. (Efésios 4:8, 11, 12) Pomuwo wo no apostolu, ovakulu vomawaneno aveho ankho ovalembulwa. Ovakulu ovo vapopiwa mu Revelação okuti ononthungululu mbukahi peke liokulio kwa Kristu. (Revelação 1:16, 20) Hono, ovakulu vomawaneno, otyinyingi ovonongi ononkhuavo. Tyesukisa okulikuambela nokuhongolelwa nospilitu sandu pala okuholovona ovakulu ovo. Moluotyo, tupu navo vekahi nokuhongolelwa na Kristu. (Atos 20:28) Anthi, ovakulu ovo vaimbuka okuti Kristu ukahi nokuundapesa okanthumbo okatutu kovalume Ovakristau ovalembulwa, Ononkhalamutwe mbo Nombangi mba Jeova, pala okuhongolela ovalongwa vae pano pohi.—Tanga Atos 15:6, 28-30.

“Endyu Tatekulu Jesus”

11. Omokonda yatyi tuhandela unene Omutumini wetu eye liwa-liwa?

¹¹ Memonekelo apostolu João apelwe, Jesus wapopia ovikando ovinyingi okuti ukahi nokuya liwa-liwa. (Revelação 2:16; 3:11; 22:7, 20) Tyotyili, oe ankho ukahi nokupopia okuya kwae pala okukoyesa Ombambilonia Onene, nouye auho wovivi wa Satanasi. (2 Tessalonicenses 1:7, 8) Mokonda ankho uhanda unene okutala etyi ovipuka ovio aviho oviwa viaulwa mavifuisuapo, ombuale apostolu João wapopia nehambu okuti: “Amem! Endyu Tatekulu Jesus.” Onthue vokukahi momuwo wonthyulilo youye uno wovivi, tupu tuete Omutumini wetu Nohamba ukahi nokuya nounene Wouhamba pala okusukukisa enyina lia Tate yae nokuamena Ouhamba Wae.

12. Otyilinga patyi Kristu makamanuhula tyina nkhele onomphepo mbehanyu mbeheneyekwe?

¹² Tyina nkhele Jesus ehenehanyeko eongano lia Satanasi pano pohi, otyihupe tyo 144.000 vo Isilayeli yopaspilitu mavapakwa enyingilikilo liahulililako. Ombimbiliya ipopia nokuayandyuluka nawa okuti onomphepo mambuhanyeko ouye wa Satanasi kamambuyekwa alo aveho vo 144.000 vapakwa enyingilikilo.—Revelação 7:1-4.

13. Oñgeni Kristu makalekesa okuti weyale mokueenda kuonthele yotete “yononkhumbi ononene”?

¹³ Alo hono ovanthu ovanyingi kavetyii okuti Kristu ‘weyale’ mo 1914. (2 Pedro 3:3, 4) Anthi, apa katutu makalekesa okuti weyale mokulinga ekoyeso lia Jeova movanthu velikalaila vouye wa Satanasi. Tyina “omunthu watomba ovitumino,” ine ononkhalamutwe mbo Vakristau vouye, vamahanyuako, ‘matyikalekesa nawa okuti Kristu weyale.’ (Tanga 2 Tessalonicenses 2:3, 8.) Otyo matyikalekesa nawa okuti Kristu ukahi nokuundapa Ngomukoyesi waholovonwa na Jeova. (Tanga 2 Timóteo 4:1.) Okuhanyuako kuo Mbambilonia onene, onthele yokuna vali onkhali onene, matyituala kehanyu lionongeleya ambuho mbomatutu mbouye uno wovivi. Jeova mapake momitima viovatumini vopulitika olusoke luokuhanyako ekunga olio liopaspilitu. (Revelação 17:15-18) Otyo matyikakala onthele yotete “yononkhumbi ononene.”—Mateus 24:21.

14. (a) Omokonda yatyi onthele yotete yononkhumbi ononene kamaikaseta? (b) Oityi “enyingilikilo liomona womulume” malikaetela ovanthu va Jeova?

¹⁴ Jesus wapopile okuti ononthiki mbononkhumbi ombo, mambukatetwa mokonda ‘yovaholovonwa,’ otyihupe tyo Vakristau ovalembulwa vekahi pano pohi. (Mateus 24:22) Jeova kamayeke Ovakristau ovalembulwa no mapanga avo onongi ononkhuavo vahanyueko kumwe no nongeleya mbomatutu. Jesus wayawisako okuti, konyima yononkhumbi ononene mononthiki ombo, makukakala omanyingilikilo kekumbi no kohanyi no kononthungululu, “iya enyingilikilo lio Mona womulume malikamoneka meulu.” Otyo matyikatuala ovanthu vomalongo pano pohi “okuliveta ovo muene nokuliyavela.” Mahi, ovalembulwa vena ekevelelo liokukakala keulu, nomapanga avo vena ekevelelo liokukala pano pohi, kamavakakala ngotyo. ‘Mavakakatula omitwe viavo, mokonda eyovo liavo likahi popepi.’—Mateus 24:29, 30; Lucas 21:25-28.

15. Ovilinga patyi Kristu malingi tyina ameya?

¹⁵ Tyina amamanuhula okufinda, Omona womulume meya monkhalelo onkhuavo. Oe waula okuti: “Tyina Omona womulume amehiki menkhimano liae, no noandyu ambuho kumwe nae, oe mapumphama kotyipundi tyomunkhima wae woutumini. Iya omalongo aeho maakahongololelwa kolupala lwae, iya oe akayapula ovanthu pokati, ngetyi omunthita ayapula onongi kovikombo. Iya oe makapaka onongi kokulio kwae, mahi ovikombo ekevipaka kokumbili kwae.” (Mateus 25:31-33) Otyo tyilekesa okuya kwa Kristu ngo Mukoyesi pala okuyapula ovanthu “vomalongo aeho” ononthumbo onombali: “onongi,” vana vavatela ovakuatate vavo mopaspilitu (Ovakristau ovalembulwa pano pohi), “novikombo,” vana “vehetavela onondaka onongwa konthele ya Tatekulu yetu Jesus.” (2 Tessalonicenses 1:7, 8) Onongi, vapopiwa okuti “ovaviuki,” mavakatambula “omuenyo wahapu” pano pohi, mahi ovikombo “mavakaya kononkhia mbahapu” ine okuhanyuako.—Mateus 25:34, 40, 41, 45, 46.

Jesus Umanuhula Okufinda

16. Oñgeni Kristu Omutumini wetu mamanuhula okufinda?

¹⁶ Tyina vana mavakakala o nohamba novanakwa vamanyingilikwa aveho, iya onongi ambuimbukwa nokupakwa kokulio kwae pala okuyovolwa, Kristu “mamanuhula okufinda.” (Revelação 5:9, 10; 6:2) Oe makala komutwe wembamba lionoandyu mbepondolo, novakuatate vae vatutiliswa, akahanyako ovatumini aveho, nomafualali aeho, novakuavitanda aveho vouye wa Satanasi. (Revelação 2:26, 27; 19:11-21) Kristu mamanuhula okufinda tyina amahanyeko ouye wovivi wa Satanasi. Konyima apake Satanasi novilulu viae mokaleya omanima ovityita ekwi.—Revelação 20:1-3.

17. Opi Kristu makahongolela onongi mbae ononkhuavo mokueenda Kuoutumini Womanima Ovityita Ekwi? Tuesukisa okutokola okulinga tyi?

¹⁷ Okupopia “ounyingi omunene” wonongi ononkhuavo, vana mavakahupa kononkhumbi ononene, apostolu João waula okuti, “Ondyona, ikahi pokati komphangu youtumini, mekeventhita nokuvehongolela konondyivindyivi mbomeva omuenyo.” (Revelação 7:9, 17) Tyotyili, mokueenda Kuoutumini wae Womanima Ovityita Ekwi, Kristu matualako okuhongolela onongi ononkhuavo, vana vatavela tyotyili ondaka yae, nokuvetuala komuenyo uhapu. (Tanga João 10:16, 26-28.) Tutokolei okulandula nekolelo Omutimini wetu, pahe, no mouye omupe Jeova alaa!

Omapulo okupitulula

• Oityi Kristu alinga etyi avialekwa koutumini?

• Oityi Kristu ekahi nokuundapesa pano pohi pala okuhongolela ewaneno?

• Omononkhalelo patyi Kristu Omutumini wetu nkhele meya?

• Oñgeni Kristu matualako okutuhongolela mouye omupe?

[Ehangununo liolutalatu pefo 32]

Tyina ouye wovivi wa Satanasi wamahanyuako matyilekesa nawa okuti Kristu weyale