Otyilinga Tya Maliya Mehando Lia Huku
MOKUEENDA kuovilinga via Jesus viokuivisa, omukai umue ankho ukahi pokati kovanthu ovanyingi, wakaluluka okupopia okuti: “Eimo liekutyinda, lina elao nomavele wanyama!” Inkha Jesus ahandele ina afendwe, ñgeno otyo tyemuavela omphitilo ongwa yokutuma ovanthu opo vafende Maliya. Anthi, Jesus wakumbulula okuti: “Ovana-mbembwa ovava vatehelela ondaka ya Huku nokuendelamo!”—Lucas 11:27, 28.
Jesus kaavelele ina enkhimano liavilapo, tupu katolelele ovalanduli vae vemunkhimaneke. Oñgeni otyo tyelikuata nefendelo ovataveli ovanyingi vaavela Maliya? Tutalei etyi Ovihonekwa vipopia kombinga yomalongeso amue ayandyana konthele ya ina ya Jesus.
“Wapandua Unene” “Nokuna Ononkhano Onongwa . . . Pokati Kovakai”
Oandyu Gabrieli yapopile Maliya otyilinga tyae mehando lia Huku. Monthiki oyo, oandyu yemukukuinya okuti: “Okamene, ove wokuapandua unene, Jeova ukahi no ove.” (Lucas 1:28) Tupu onondaka ombo mbapitiyua okuti: “Wayovoka, ove wapandua unene na Huku, Tatekulu ukahi no ove.” Konyima, yononthiki mbehehi Elisabete akukuinya Maliya okuti: “Ove wapeua ononkhano onongua pokati kovakai, nauna matundu meimo liove apewe ononkhano onongwa!” (Lucas 1:42) Onondaka ombu kambulekesa okuti Maliya watokala okufendwa?
Au. Namphila onondaka ombo mbakutikinyua melikuambelo ova Katolika valingila Maliya, mahi, Ombimbiliya kaipopi okuti tuna okulikuambela ku Maliya. Gabrieli na Elisabete ankho vetyii nawa okuti Maliya una otyilinga otyinene, tyokukala ina ya Mesiya. Mahi, olusoke luokulikuambela ku Maliya kalukahi Movihonekwa. Anthi, etyi ovalongwa va Jesus vemuita opo evelongese okulikuambela, oe wapopile okuti vena okulikuambela vala ku Tate yae. Elikuambelo liankhimana Jesus alongesa, lihimbika nokuti: “Tate yetu ukahi keulu.” —Mateus 6:9.
Uli Pokati ka Vana Mavakatumina
Elongeso ekuavo liayandyana konthele ya Maliya, o liokuti pahe oe “Onkhai-Hamba keulu.” Ombimbiliya kaineavele Maliya enyina lienkhimano ngolio. Anthi, ilekesa okuti Maliya una omphangu yakolela moutumini wa Huku keulu. Omphangu patyi?
Jesus wapopile okuti vamue povalongwa vae vekolelo, mavakatumina nae Mouhamba wae. (Lucas 22:28-30) Jesus makaavela epondolo vana vaholovonwa opo vakakale ‘ovanakwa pala Huku yetu, iya avakatumina ngo Nohamba oohi aiho.’ (Revelação 5:10) Ombimbiliya itulekesa nawa okuti Maliya ukahi pokati ka vana vapewa elao alio. Omokonda yatyi tupopila ngotyo?
Hinangela okuti konyima yononkhia mba Jesus, Maliya “watuaileko nokulikuambela” kumue novalongwa va Jesus no nondenge mbae. Onthiki imue ovalongwa 120 kumue “novakai vamue,” veliongiya opo velikuambele. (Atos 1:12-15) Ombimbiliya yati: “Mokueenda kuotyipito tyo Pendekoste aveho ankho veliongiya pomphangu ike.” Iya ospilitu sandu aivelaukila aivepe epondolo liokupopia omalaka elikalela.—Atos 2:1-4.
Maliya ankho ukahi pokati ka vana vapewa ospilitu sandu. Otyo, tyilekesa okuti Maliya novakai vakuavo ankho vekahipo, waholovonua opo vakatumine na Jesus Mouhamba wae keulu. Moluotyo, tuna ehunga liokutavela okuti hono Maliya waumphama na Jesus menkhimano lio keulu. (Romanos 8:14-17) Soka otyilinga tyakolela Maliya na vakuavo mavakatumina na Jesus, mavakala natyo pala okufuisapo ehando lia Huku.
Makaava Ononkhano Onongwa
Omukanda wa Revelação upopia okuti ovanthu 144.000 mavatutiliswa opo vakaundape kumue na Jesus keulu, avakakala ovanakwa, novakoyesi, no nohamba. (Revelação 14:1, 4; 20:4, 6) Iya mokonda yotyilikutila tya Jesus, ovanakwa ovo mavakatuala ovanthu aveho vokutavela, komuenyo wafuapo molutu no mopamphepo. (Revelação 21:1-4) Matyikakala omuenyo omuwa unene pala ovafendeli aveho vekolelo va Jeova okutala omuvo oo uhuvisa!a
Maliya wali notyilinga tyakolela, nkhele unatyo movilinga viokufuisapo ehando lia Jeova. Maliya watokala okuhetekelwa mokonda yokweliola omutima, nekolelo liae, nokutavela, nohole ankho ena nomona wae, nekoleleyo liae mononkhumbi. Tupu watokala okuhumbwa unene, mokonda wakutula Mesiya, no kukahi pokati ka vana mavakaavela ovanthu ononkhano onongwa.
Mahi, otyipuka tyakolela unene tulilongesila ku Maliya okuti, oe kumue novaumbili ovakuavo vekolelo va Huku, vafenda vala Jeova, vetupu vali Huku omukuavo. Maliya, kumue na vakuavo mavakatumina na Kristu keulu, ukatula ondaka yae peulu okuti: “Una wapumphama kotyipundi [Jeova Huku] Nondyona [Jesus Kristu] apewe enkhimano, nehiviliko, nepondolo apeho.”—Revelação 5:13; 19:10.
[Onondaka Pokatoi]
a Opo unoñgonoke vali konthele yononkhano ombo onongwa, tala okapitulu 8 komukanda Oityi Ombimbiliya Tyili Ilongesa? walingua no Nombangi mba Jeova.
[Onondaka Mbavilapo pefo 4]
Maliya watokala okuhetekelwa mokonda yomutima wae weliola, nekolelo liae, nokutavela