Okuti Huku Omunthu Wotyotyili?
Omakumbululo ovanthu vehole okuava:
◼ “Huku ukahi ponomphangu ambuho, nomovipuka aviho. Oe ukahi ngomphepo.”
◼ “Oe ononkhono mbokuna epondolo enene, mahi mbuhemunthu wotyotyili.”
Oityi Jesus apopile?
◼ “Meumbo lia Tate yange muna onondyuo ononyingi.” (João 14:2) Jesus wapopile konthele ya Huku ngatyina ena eumbo, ine omphangu pala okukala.
◼ “Natunda ku Tate andyiya mouye. Pahe mandyisipo ouye andyiende ku Tate.” (João 16:28) Jesus ankho utavela okuti Huku Omunthu wotyotyili nokuna omphangu apa akala.
JESUS nalumue apopile konthele ya Huku ngatyina otyipuka tyimue vala tyina ononkhono mahi, tyihemunthu. Jesus wapopile na Huku nokulikuambela kwe. Ovikando ovinyingi, Jesus waihanene Jeova Tate yae keulu monkhalelo imue ilekesa okuti oe ankho una oupanga umue omuwa na Huku.—Mateus 6:14, 26, 32.
Tyotyili, “nawike omunthu wamuene Huku,” mokonda “Huku ospilitu.” (João 1:18; 4:24) Mahi, otyo katyilekesa okuti oe utupu olutu. Ombimbiliya itutolela okuti: “Ngetyi kuna olutu luopahitu, tupu kuna olutu luopaspilitu.” (1 Coríntios 15:44) Okuti Jeova una olutu luopaspilitu?
Enga. Etyi Jesus atutiliswa, “wanyingila . . . keulu, opo akamoneke komaiho a Huku mokonda yetu.” (Hebreus 9:24) Otyo tyitulongesa ovipuka vivali viakolela konthele ya Huku. Tete, una omphangu apa akala. Vali, oe Omunthu, hanonkhono vala mbukahi ponomphangu ambuho.
Mahi, oñgeni Huku ena epondolo pala okutumina ovipuka aviho? Huku upondola okutuma kononthele ambuho mbouye ospilitu sandu yae, ine ononkhono mbuundapa. Ngetyi tate, atandaveka okuoko kuae opo aungumanese, nokuvatela omona wae, Huku nae uundapesa ospilitu sandu yae opo afuisepo ehando liae.—Salmo 104:30; 139:7.
Mokonda Huku Omunthu, oe una ovituwa. Tupu pena ovipuka ehole nevi eyele, nokuna omutima. Ombimbiliya itutolela okuti Huku uhole ovanthu vae, uhambukilwa ovilinga viae, nokuyele vana vafenda ovilolo, novivi aviho. (Gênesis 6:6; Deuteronômio 16:22; 1 Reis 10:9; Salmo 104:31) Mu 1 Timóteo 1:11 oe wihanua okuti “o Huku wombembua.” Tyotyili, Jesus wapopile okuti tupondola okulilongesa okukala nohole na Huku nomutima wetu auho!—Marcos 12:30.a
[Onondaka Pokatoi]
a Opo unoñgonoke vali nawa onthele oyo, tala okapitulu 1 komukanda Oityi Ombimbiliya Tyili Ilongesa? walingua no Nombangi mba Jeova.
[Onondaka Mbavilapo pefo 5]
Ngetyi tate, atandaveka okuoko kuae, Huku nae uundapesa ospilitu sandu yae opo afuisepo ehando liae