Jesus Kristu Oe Mesiya Wokualaelwe

OPO etukuateseko okuimbuka Mesiya, Jeova watuma ovauli ovanyingi valekese nawa okutyitwa, novilinga, nononkhia mbo Muyovoli oo wokualaelwe. Omaulo oo aeho Ombimbiliya afuiswapo mu Jesus Kristu. Ovipuka aviho viahonekwa mo Mbimbiliya konthele yae viafuiswapo. Pahe tutalei omaulo amue apopia konthele yokutyitwa kua Mesiya, no pouna wae.

Omuuli Isaia wapopile okuti Mesiya makatunda mombuto Yohamba David. (Isaías 9:7) Tyotyili, Jesus watyitua mombunga ya David.—Mateus 1:1, 6-17.

Mikeia, omuuli omukuavo wa Huku, wapopile okuti omona oo, makakala omutumini iya makatyitilwa ko “Mbelei Efrata”. (Miquéias 5:2) Pomuwo Jesus atyitwa, ankho kuna omapundaumbo evali atiwa o Mbelei. Epundaumbo limue ankho likala popepi no Nazare. Iya ekuavo ankho likala popepi no Jelusalei mo Judeia. O Mbelei ikala popepi no Jelusalei ankho itiwa Efrata. Jesus watyitilua umue mepundaumbo olio, ngetyi tyapopiwa meulo.—Mateus 2:1.

Eulo ekuavo lio Mbimbiliya liapopile okuti Omona wa Huku makaihanwa ko ‘Egitu’. Puetyi Jesus ankho omona, watuailue ko Egitu. Iya Jesus waihanuako etyi Herode ankhia, ngotyo eulo olio liafuisuapo.—Oséias 11:1; Mateus 2:15.

Pefo 200 pahonekwa onotestu mbomaulo apopia konthele ya Mesiya. Eleka onotestu ombo, nombu mbukahi pombuelo yondaka yati ‘okufuiswapo’. Okulinga ngotyo, matyipameka ekolelo liove konthele yotyili Tyondaka ya Huku.

Putyina utanga onotestu ombu, hinangela okuti omaulo amue ahonekwale omanima omanyingi puetyi Kristu nkhele ehenetyitwe. Jesus wapopia okuti: “Ovipuka aviho viahonekwa novauli, no movitumino via Moisesi, nomo no Salmu vipopia konthele yange, vina yokufuiswapo”. (Lucas 24:44) Ngetyi motyimono mo Mbimbiliya yove muene, omaulo oo aeho afuiswapo.