Okuti Tuesukisa Okulikuambela Kono Sandu?

OVANTHU ovanyingi vakaleliale novitateka, avelitehelela okuti vesukisa okuita omunthu umwe opo evekuateseko. Tyitei kovitateka tuna, hamwe tuholovona epanga litutehelela nawa, hamwe wakaleliale notyitateka tuna. Epanga tuhanda oyouna una okankhenda, nounongo.

Vamwe vapondola okusoka ngotyo tyina velikuambela. Kavahande okulikuambela ku Huku mokonda omunene iya uvehuvisa, mahi velitehelela okuti otyiwa vali okulikuambela kono sandu. Vasoka okuti ono sandu, vakaleliale novitateka, nononkhumbi ovanthu vekahi nokumona, moluotyo mavakala vali nokankhenda. Mongeleka, ovanthu vokuavombesa tyimwe tyakolela unene kuvo, velikuambela ko “Sandu” Antônio de Pádua, omuameni wovipuka viavomba ine viavakwa. Inkha vena otyinyama tyimwe tyavela, velikuambela ko “Sandu” Francisco de Assis, iya inkha vehulilwa velikuambela ko “Sandu” Judas Tadeu.

Mahi, oñgeni matunoñgonoka inkha okulikuambela kono sandu tyelikuata netyi tyipopia Ovihonekwa? Mokonda okulikuambela okupopia na Huku, tyilityili tuesukisa okunoñgonoka: Okuti Huku utehelela umwe omalikuambelo etu? Tupu tuesukisa okulipula okuti: Oñgeni Huku elitehelela tyina tulikuambela kono sandu?

OITYI OMBIMBILIYA IPOPIA KONTHELE YOKULIKUAMBELA KONO SANDU

Otyituwa tyokulikuambela kono sandu tyapolwa melongeso Liongeleya yo Katolika lipopia okuti ono sandu mbutupopilako. O New Catholic Encyclopedia yati, “okuita okankhenda ka Huku menyina lio sandu, tyaviuka mokonda osandu ikahi popepi na Huku.” Ngotyo, una ulikuambela kono sandu una ekevelelo liokuti metyipewa mokonda ono sandu mbayambwa na Huku.

Okuti Ombimbiliya ilongesa ngotyo? Vamwe vapopia okuti apostolu Paulu wahonekele okuti okulikuambela kono sandu tyaviuka. Mongeleka, wahonekelele Ovakristau mo Roma okuti: “Vakuatate, ndyimupopila okuti menyina lia Tatekulu yetu Jesus Kristu, nohole yospilitu, lingei ononkhono kumwe naame mulikuambele ku Huku pala ame.” (Romanos 15:30) Okuti Paulu ankho ukahi nokuita Ovakristau vakuavo vemupopileko ku Huku? Au. Inkha ongotyo, ñgeno ovo vaitile Paulu evelingileko elikuambelo mokonda ankho o apostolu ya Kristu. Paulu ankho ukahi nokulekesa okuti katyapengele okuita Omukristau mukuetu opo etuitileko ku Huku. Mahi otyo tyelikalela unene nokulikuambela komunthu tutavela okuti ukahi keulu opo ahikiye omalikuambelo etu ku Huku. Omokonda yatyi?

Mo Evandyeliu ya apostolu João, Jesus wati: “Ame ndyila, ame tyili, ame muenyo. Nawike uya ku Tate ahapiti puame.” (João 14:6) Tupu wati: “Tate memuavela atyiho muiita menyina liange.” (João 15:16, A Bíblia de Jerusalém) Jesus kapopile okuti tuna okuviukisa omalikuambelo etu kwe iya eketupopilako ku Huku. Mahi, opo omalikuambelo etu atehelelwe, tuna okueviukisa ku Huku menyina lia Jesus, hamenyina liomunthu omukuavo vali.

Etyi ovalongwa va Jesus vemuita evelongese oñgeni vena okulikuambela, Jesus wakumbulula okuti: “Tyina mulikuambela, popiei okuti: ‘Tate, enyina liove lisukukiswe. Ouhamba wove uye.’” (Lucas 11:2) Tyotyili, “tyina” tulikuambela, tuna okulikuambela vala ku Huku, haku Jesus ine omunthu omukuavo vali. Nomalongeso oo a Jesus ayandyuluka nawa, tupondola okupopia okuti tuna okulikuambela vala ku Huku menyina lia Jesus Kristu, hakono “sandu” ko.

Okulikuambela tyakolela unene mefendelo lietu, iya okufenda omunthu mukuavo tyipona Huku tyotyili katyelikuatele netyi Ombimbiliya ilongesa. (João 4:23, 24; Revelação 19:9, 10) Otyo tuesukisila vala okulikuambela ku Huku.

OKUTI WESUKISA OKUKALA NOWOMA WOKULIKUAMBELA KU HUKU?

Jesus Melongomona liae lio Komphunda waavele ongeleka yomona wiita tyimwe ku tate yae opo alie. Okuti he maavela omona wae emanya, ehemuavela ombolo? Ine memuavela onyoka, ehemuavela ombisi? (Mateus 7:9, 10) He una oluembia kalingi ngotyo!

Soka kongeleka onkhuavo konthele yovohe. Soka komona uhanda okukuita tyimwe. Ove walinga ononkhono mbokukala noupanga omuwa nae, iya apeho utomphola nawa nae. Mahi, mokonda yowoma ena nove, ukaita omunthu mukuavo opo ekupopile etyi ahanda. Molitehela ñgeni? Inkha apeho tyina ahanda okutomphola nove ukaita omunthu mukuavo emupopileko, iya ulwete okuti ngoti uhanda okutualako okutyilinga? Mohambukwa? Tyotyili kumahambukwa! Ovohe vokuna oluembia, vahanda ovana vavo vatomphole navo, nokuveita atyiho vesukisa.

Pokuhangununa ongeleka yomona wiita okulia, Jesus wapopilile ovanthu okuti: “Moluotyo, inkha onwe namphila munondingavivi, mutyivila okuavela ovana venyi ovipuka oviwa, Tate yenyi yokeulu kamaavela vali unene ovipuka oviwa vana vemuiita?” (Mateus 7:11) Tyotyili, ovohe vena ehando enene liokuavela ovana vavo ovipuka oviwa. Tate yetu keulu una vali ehando enene liokutehelela, nokukumbulula omalikuambelo etu.

Huku uhanda tulikuambele kwe, namphila tualemenwa noviponyo tualinga. Kaavela omunthu mukuavo otyilinga tyokutehelela omalikuambelo etu. Ombimbiliya itupopila okuti: “Pakula omulemo wove ku Jeova, iya oe mekuvatela.” (Salmo 55:22) Tuesukisa okukala nolusoke luaviuka konthele ya Jeova Huku, atuhelikuambela kono sandu ine o komunthu omukuavo.

Tate yetu keulu wesuka nonthue. Uhanda okutukuatesako tyina tuna ovitateka, iya utuita tufuene kwe. (Tiago 4:8) Tuahambukwa unene mokonda tuna omphitilo yokulikuambela ku Huku Tate yetu, “Omuteheleli womalikuambelo”!—Salmo 65:2.