OMAPULO OMBIMBILIYA AKUMBULULWA
Okuti tyitavela umwe okukala nomuenyo wahapu?
Oityi Huku alinga opo etuyovole kononkhia?
Omulume wotete, Andau, wakaleleko omanima omanyingi. Mahi, konyima akulupa iya ankhi. Tunde opo, ovanthu valinga ovipuka ovinyingi pala okulityilika okukulupa. Mahi nkhele ononkhia mbutualako. Mokonda yatyi? Andau wakulupa ankhi mokonda walingile onkhali etyi ehetavelele ku Huku. Tukulupa atunkhi mokonda tuapiñgana onkhali ku Andau.—Tanga Gênesis 5:5; Romanos 5:12.
Opo tukale nomuenyo wahapu, tuesukisa omunthu umwe utufetelako ofeto yeyovo. (Jó 33:24, 25) Ofeto yeyovo otyetyi tyifetwa pala okuyovola omunthu, iya onthue tuesukisa okuyovolwa kononkhia. (Êxodo 21:29, 30) Jesus waava ofeto yeyovo etyi ankhia mokonda yonthue.—Tanga João 3:16.
Oñgeni tupondola okukala nomuenyo wahapu?
Haveho mavayovolwa kouvela no kokukulupa. Tyotyili, ovanthu vehetavela Huku, ngetyi tyalingile Andau, kamavakakala nomuenyo wahapu. Ovovana vala vaevelwa ononkhali mbavo mavakakala nomuenyo wahapu.—Tanga Isaías 33:24; 35:3-6.
Opo tuevelwe, tuna etyi tuesukisa okulinga. Tuesukisa okunoñgonoka Huku, mokulilongesa Ondaka yae Ombimbiliya. Itulongesa oñgeni matukala nomuenyo omuwa, netyi tuna okulinga opo tupandwe na Huku, nokukala nomuenyo wahapu.—Tanga João 17:3; Atos 3:19.