Omokonda Yatyi Ovanthu Velipulila Ngotyo?

“Okuti nove usoka okuti kuesukisile Huku? Ovanyingi otyo vasoka.” Onondaka ombo mbapopiwa novanthu vo kotyilongo tyimwe vehetavela okuti kuna Huku. Movilongo ovinyingi, ovanthu vokusoka okuti kavesukisile Huku vekahi nokuliyawisa.

Tupu, ovanyingi vetavela okuti Huku okuekahi, omatokolo valinga kaalekesa okuti vetavela okuti kuna Huku. Onkhalamutwe yo Katolika, Salvatore Fisichella, wapopia konthele yovanthu vongeleya yae okuti: “Hono ovanthu tyina vetutala kavasoko okuti Tuvakristau mokonda onkhalelo yomuenyo wetu yelifwa no yavana vehetavela okuti kuna Huku.”

Ovakuavo vasukalala unene novipuka ovikuavo iya vetupu omuvo wokusoka ku Huku. Vasoka okuti Huku ukahi kokule, nawike upondola okupopia nae iya ketukuatesako. Mahi, ovanthu ovo vasoka vala ku Huku tyina vena ovitateka ine vesuka notyipuka tyimwe, ngatyina Huku omuundapi wavo.

Ovakuavo kavalandula etyi valongeswa mo nongeleya mbavo, hamwe omokonda vasoka okuti tyitupu esilivilo. Mongeleka, ova Katolika ovanyingi ko Alemanha, vetavela okuti omukai nomulume okulala kumwe tyehelinepele katyapengele, mahi otyo katyelikuatele netyi valongeswa mongeleya yavo, netyi Ombimbiliya ipopia. (1 Coríntios 6:18; Hebreus 13:4) Tyotyili, hava Katolika vala vahalandula etyi valongeswa. Ononkhalamutwe mbonongeleya ononyingi mbuliyava okuti ovanthu vomo nongeleya mbavo, vena ovituwa ngo viavana “vehetavela okuti kuna Huku.”

Onongeleka ombo mbukatula epulo eli: Okuti tyilityili tuesukisa umwe Huku? Epulo olio hepeko. Omukanda wotete Wombimbiliya upopia konthele yotyo. Opo tuvase ekumbululo liepulo olio, tutalei etyi tyipopia Ombimbiliya momukanda wa Gênesis.