Okuti Tyitavela Umwe Okukala Ovakuatyili Mouye Uno Wounkhembi?
“Tuhanda okukala ovakuatyili movipuka aviho.”—HEBREUS 13:18.
NAMPHILA tuvakuankhali, iya ouye tukahi, Neliapu vipondola okutuhongiliya unene, nongotyo tupondola okuhetavela okuhongiliyua! Ñgeni? Mokufuena ku Huku, nokulandula onondonga mbo Ndaka yae, Ombimbiliya. Tutalei onongeleka onombali.
ONDONGA YOMBIMBILIYA: “Muahakalei ngovanthu vouye uno.”—Romanos 12:2, Nova Tradução na Linguagem de Hoje.
Etyi tyamonekelele umwe: Guilherme ukala ko Brasil utyivila okulinga nawa onondando. Waimbuka okuti katyapepukile okukala omukuatyili. Wati: “omunthu wonondando upondola liwa okuhakala omukuatyili, hamwe omokonda uhanda okuyawisa konombongo mbae ine kahande okusala monyima yavakuavo, mouye uno ulipombwa. Pala ovanthu ovanyingi, okutambula onombongo ine okufeta omunthu opo akembe, hatyiviko. Tyina omunthu ena ondando yalanda onombongo ononyingi, tyipuilisa okukala omukuatyili.”
Nongotyo, Guilherme wetyivila okuanya okuhongoliyua navakuavo opo ahakale omukuatyili. Wati: “Namphila ovanthu ovanyingi vonondando havakuatyili, nongotyo tyitavela okukala omukuatyili. Tyesukisa okukala nomatavelo apama. Ombimbiliya yankhuatesako okutala ouwa utundilila koukuatyili. Omunthu omukuatyili, una omalusoke asukuka, nombembwa momutima, nehambu. Upondola okukuatesako vakuavo okukala novituwa oviwa.”
ONDONGA YOMBIMBILIYA: “Vana vapanga okukala ovahona, vatokela mokulinga onkhali, tyina vahongiliyua, iya avatokela meliva liomahando omanyingi omavi, alinga omapita, nokutuala ovanthu mehanyauno. Okuhumba onombongo tyieta ovipuka aviho vimonesa ononkhumbi.”—1 Timóteo 6:9, 10, Nova Tradução na Linguagem de Hoje.
Etyi tyamonekelele umwe: André ohekulu yeongano limwe lilandesa onomakina mbuundapeswa pala okuyunga. Umwe povokumulanda, ohekulu yondyuo imwe onene yokuyumbila ombola. Otyikando tyimwe, etyi vamana okuyumba ombola, André waile moseketa yovilinga, iya eveavela otyipapelo ankho tyilekesa ovilinga alinga mondyuo yokuyumbila ombola. Voseketa yonombongo ankho nkhele vekahi nokuvalula onombongo vafetwa na vana veile okutala vokuyumba ombola. Mahi, mokonda ankho lietaka, vafeta vala liwa vana veveundapela, okukutikinyamo André.
André wati: “Etyi nehika keumbo, natala okuti nafetwa onombongo ononyingi vali. Ankho ndyityii okuti omulume una kamahinangela okuti wampha onombongo ononyingi. Mahi tupu ankho ndyityii okuti oe mapolo momboloso yae muene opo afete komuhona wae onombongo mbakambapo! Andyitokola okukondokako. Mokonda ankho pena ovanthu ovanyingi veile okutala ombola, nalinga ononkhono mbokukuata pokati kavo, andyikondola onombongo. Omulume ahuvo unene. Kenekondolelwe onombongo nomunthu nawike.”
André wayauisako okuti: “Mokonda youkuatyili, hekulu yondyuo ina, una onthilo naame. Palambale omanima omanyingi, mahi puaveho ankho veveundapela, ame vala nkhele ndyitualako. Ndyipandula unene mokonda okulandula onondonga Mbombimbiliya, tyankhuatesako opo ovanthu vakale nonthilo naame.”
Tyipameka unene okunoñgonoka okuti, Huku upondola okutukuatesako okulityilika ovituwa ovivi. Mahi, kamatutyivili okumanako ounkhembi kononkhono mbetu. Otyitateka otyo, otyinene unene, iya ovanthu kamavetyivili okutyitetulula kounongo wavo muene. Mahi, okuti otyo tyilekesa okuti ounkhembi mautualako apeho? Onthele yahulililako, maiyave omakumbululo Ombimbiliya apameka.