OmapulO Ovatangi
Omokonda yatyi ehipululo liomuenyo wa Jesus pouna likahi mu Mateus lielikalela nehipululo likahi momukanda wa Lucas?
Ehipululo lio mukanda wa Mateus lipopia okutyitwa kwa Jesus nomuenyo wae etyi ankho omona, lielikalela nehipululo lio mukanda wa Lucas. Mokonda kese muhoneki wahoneka omalusoke no nongeleka mbovanthu velikalaila.
Ehipululo lia Mateus lipopia vali konthele yomuenyo wa Jose. Lipopia oñgeni Jose akala etyi anoñgonoka okuti Maliya omulemi. Tupu lipopia etyi oandyu yapopila Jose mondyoi konthele yotyo netyi Jose alinga. (Mateus 1:19-25) Tupu lipopia oñgeni oandyu yalondolele Jose mondyoi opo akaholame ko Egitu kumwe nombunga yae. Omukanda wa Mateus konyima utupopila okuti oandyu aipopila vali Jose mondyoi opo akondoke ko Isilayeli iya akondoka, atokola okukala mo Nazare kumwe nombunga yae. (Mateus 2:13, 14, 19-23) Movikapitulu vivali vio tete vio Evandyeliu ya Mateus, vipopia enyina lia Jose ovikando etyinana, mahi lia Maliya liapopiwa-mo vala ovikando vikuana.
Mahi omukanda wa Lucas upopia vali konthele ya Maliya. Upopia konthele yetyi oandyu Gabiliyeli yakatalela-po Maliya, tupu upopia etyi Maliya akatalela-po Elisabete no nondaka mbokuhivilika Jeova. (Lucas 1:26-56) Tupu wahoneka etyi Simiau apopila Maliya konthele yononkhumbi Jesus makamona komutwe. Konyima, Luka ahoneka etyi Jesus vapita kondyuo ya Huku nombunga yae etyi ankho ena omanima 12. Mehipululo olio, Luka wahoneka onondaka mba Maliya, ha mba Jose iya utupopila oñgeni ovipuka ovio viakalesile Maliya. (Lucas 2:19, 34, 35, 48, 51) Movikapitulu vivali vio tete vio Evandyeliu ya Lucas, vipopia enyina lia Maliya ovikando 12 mahi lia Jose liapopiwa-mo vala ovikando 3. Ngotyo Mateus upopia vali konthele Jose netyi alinga. Mahi Lucas wapopia vali konthele ya Maliya nevi ankho alinga.
Otyipuka otyikuavo tyelikalela mono Evandyeliu ombo onombali, okonthele yomuhoko ine ombunga omu Jesus atyitilwa. Mateus upopia omanyina ovakuaukulu va Jose, tupu upopia okuti Jesus omona koutekuli wa Jose, watokala okupewa outumini wa David. Omokonda yatyi? Omokonda Jose ankho omutekula Wohamba David pokati komona wae Salomau. (Mateus 1:6, 16) Mahi, Lucas upopia omuhoko wombunga ya Maliya, tupu upopia okuti Jesus ankho watokala okupewa outumini wa David “kokuatyitwa.” (Romanos 1:3) Omokonda yatyi? Omokonda Maliya ankho omutekula wa David pokati komona wa David Natan. (Lucas 3:31) Mahi omokonda yatyi movakuaukulu va Jesus, Lucas ahapopile okuti Maliya omona wa Eli? Omokonda ankho omanyina omu vatuka mupopiwa vala ovalume kamuapopilwe omanyina ovakai. Tupu tyina Luka apopia konthele yomuhoko wa Jose ankho upopia okuti omona wa Eli, ovanthu ankho vanoñgonoka okuti otyo tyihangununa okuti Jose wanepela Eli.—Lucas 3:23.
Omuhoko wombunga ya Jesus mo Evandyeliu ya Mateus no ya Lucas mbulekesa okuti Jesus ankho o Mesiya walaelue. Okuti Jesus ankho omutekula wo Hamba David ankho tyiiwe nawa, alo umwe ova Faliseu nova Sanduseu ankho kapondola okutyianya. Ehipululo lia Mateus na Lucas konthele yomuhoko wombunga ya Jesus lipameka ekolelo lietu, tupu lituavela onthumbi yokuti omilao via Huku apeho mavifuisuapo.