Otyilinga Tyakolela Vali

1. Oityi olupandu luetu olunene malutulundu okulinga movilinga viokuivisa?

¹ Omokonda yatyi apeho tuavelwa ondundo opo tuave omuwo wetu, nononkhono, nomalumono movilinga viokuivisa? Omokonda kutupu otyilinga tyakolela vali tyipona otyo! Okusoka kesilivilo yotyilinga otyo, matyiyawisa ehando lietu liokuundapa movilinga ovio vihakalingwa vali.​—⁠Atos 20:⁠24.

2. Oñgeni ovilinga viokuivisa vitukuatesako okuhivilika enyina enene lia Jeova?

² Vihivilika Enyina Lia Jeova: Ovilinga viokuivisa vilekesa okuti Ouhamba wa Jeova menyina lia Kristu Jesus maukapinga omautumini aeho, nokumanako ovitateka aviho viovanthu. (Mat. 6:​9, 10) Jeova oe vala meketuyovola komauvela nokononkhia. (Isa. 25:8; 33:​24) Mokonda tuatyinda enyina liae, vana vatala ovituwa vietu oviwa nombili, vapondola okumuhivilika. (1 Ped. 2:​12) Tyituavela ehambu enene okunoñgonokesa ohi aiho enyina Liohamba Tatekulu Jeova!​—⁠Sal. 83:⁠18.

3. Ononkhano patyi onongwa vana vetavela onondaka Mbouhamba vakala nambo?

³ Viyovola Omuenyo Wovanthu: Jeova “kahande na umwe ahanyueko, mahi uhanda ovanthu aveho velivele.” (2 Ped. 3:⁠9) Ngotyo, inkha petupu nawike uvelongesa, oñgeni ovanthu mavanoñgonoka etyi Jeova apopia okuti katyaviukile? (Jonas 4:11; Rom. 10:​13-​15) Tyina ovanthu vetavela onondaka onongwa, onkhalelo yavo yomuenyo ikala nawa putyina vasapo ovituwa ovivi. (Miq. 4:​1-4) Tupu, ovo vena ekevelelo enene liokukakala nomuenyo wahapu. Ovilinga vietu viokuivisa viyovola onthue muene na vana vetutehelela. (1 Tim. 4:​16) Onthue tuna elao limwe enene liokuundapa movilinga ovio viakolela unene!

4. Omokonda yatyi tyesukisa okulinga ononkhono pala okuivisa Ouhamba nokulinga ovalongwa?

⁴ Apa katutu ononkhumbi onene mambukamanako ouye uno wovivi. Vana vafenda Jeova mavakahupa. Ngotyo, okuivisa nokulinga ovalongwa, ovilinga viakolela unene vikahi nokulingwa hono nondyanga. Tupakei ovilinga ovio tete momuenyo wetu!​—⁠Mat. 6:⁠33.