Onondonga Pala Vana Valinga Ononthele Meliongiyo Liovilinga
Okuhimbikila monthele ei Yovilinga Vietu Viouhamba, o programa Yeliongiyo Yovilinga ikahi vali nokupepukiswa. Onondonga mbulandulako, nomahinangeleso mambuhangununa vali nawa etyi tyikahi monthele yati “Oñgeni Matulipongiya Pala Eliongiyo Liovilinga” ivasiwa Movilinga Vietu Viouhamba ya Kapepo yo 2009.
◼ Elongomona: Olio elongomona lilingwa liapolwa monthele yaholovonwa, mahi kailingwa nomapulo otyo ovateheleli vakumbulula. Omulongomoni wesukisa okupopia etyi matyivatela ewaneno.
◼ Omapulo Nomakumbululo: Onthele ei mailingwa ngetyi tyilingwa elilongeso Liomutala Womulavi, ina onondaka mbehehi pokuhimbika no pokumanuhula, iya ono palagrafu ambuho mbuna omapulo. Omukuatate maendesa onthele oyo elityilike okupopia unene. Onotestu mbumwe mbupondola okutangwa inkha pena omuvo. Ono palagrafu kambutangwa, mahi, mutyilinga vala tyina muamapewa onondonga pala okumbutanga.
◼ Elongomona Otyo Ovateheleli Vakumbulula: Melongomona eli, omukuatate upondola okuita ovateheleli vakumbulule. Onthele ei kailingwa vala ngelongomona, tupu katyesukile okulinga omapulo onthele aiho.
◼ Omalekeso Nomakumbululo: Onondonga pala elekeso, omukuatate wapewa onthele oe una otyilinga tyokuhongolela ovanthu mavalingi elekeso, oe kapondola okulinga elekeso. Vana aholovona pala okumuvatela, vena okukala novituwa oviwa, nokuafwapo nawa, oe wesukisa okulipongiya nawa navo tyina nkhele onthiki yeliongiyo yehenehike. Otyiwa okuhaundapesa ovaivisi ovape vehena ounongo pala okulinga omalekeso, namphila vamwe vapondola okuundapeswa ngatyina omunthu tuavasa movilinga viokuivisa. Ovaivisi vekahi nokulinga elekeso vena okukala komutwe wovateheleli. Vana vaundapeswa pala okupulwa vakale komutwe, vahakale povipundi viavo. Omalekeso nomapulo esukisa okupongiyua nawa. Inkha omuwo weliongiyo ukahi nokupuapo iya omukuatate wesukisa okuteta onthele yae, omalekeso nomapulo ena okulingwa. Ovakuatesiko vovakulu vewaneno, vesukisa okuovola onkhalamutwe yovakulu vewaneno ine omukulu omukuavo weuaneno tyina nkhele eheneholovone vana mavalingi lekeso.
Inkha onthele imwe yeta onondonga mbakolela, ombo mbesukisa okulandulwa nawa. Okulinga ononthele Mbeliongiyo Liovilinga ngetyi tyapopiwa pombanda, ovakuatate mavakuatesako opo Eliongiyo Liovilinga “liende nawa, nokuaongana.”—1 Cor. 14:40.