Longesa Ovana Vove Vakale Ovaivisi
1. Oityi Salmo 148:12, 13 ilunda ovohe Ovakristau okulinga?
1 Jeova ukonga ovakuendye vemuhivilike. (Sal. 148:12, 13) Mahi, ovohe Ovakristau valinga vali tyipona vala okulongesa ovana vavo otyili Tyombimbiliya novitumino via Huku konthele yovituwa oviwa. Tupu, ovo vevelongesa opo vakale ovaivisi vonondaka onongwa. Oñgeni otyo tyipondola okulingwa?
2. Oñgeni ongeleka ongwa yovohe ipondola okuvatela ovana vavo?
2 Ongeleka Ongwa: Omukoyesi Gideau wapopila ovalume vae 300 okuti: “Lilongesilei mokutala kuame.” (Juíz. 7:17) Tyotyili, ovana vatala nokuhetekela ovohe. He umwe uundapa kounthiki, mahi tyina oe akondoka keumbo Tyasapalo komuhuka, oe kalangalapo mahi upopila ovana vae vaye nae movilinga viokuivisa namphila epwila. Tyihapopi ondaka naike, oe ukahi nokuvelongesa okuti vesukisa okupaka tete momuenyo ovilinga viokuivisa. (Mat. 6:33) Okuti ovana vove vatala okuti ove una ombili movilinga viokuivisa, okulikuambela, okutanga Ombimbiliya, nokukumbulula momaliongiyo? Tyotyili, ove kumaave ongeleka yavilapo. Mahi, ovana vove mavetavela vala etyi uvelongesa opo vafende Jeova inkha vatala ombili yove yokumuumbila.—Deut. 6:6, 7; Rom. 2:21, 22.
3. Oityi ovohe vena okulinga opo vavatele ovana vavo okuovola nokuvasa ovilinga mewaneno?
3 Okuovola Ovilinga Mewaneno: Ovohe apeho valongesa ovana vavo okueenda, nokupopia, nokuvala, novipuka ovikuavo vali. Tyina ovana vamekulu, ovohe vevekuatesako okulinga ovipuka ovikuavo ovipe. Inkha ovohe Ovakristau, tupu vena okuvatela ovana vavo okuovola nokuvasa ovilinga mewaneno, okutala komanima avo nounongo. (1 Cor. 9:26) Okuti ukahi nokulongesa ovana vove okuava omakumbululo monondaka mbavo muene nokupongiya omalongomona avo muene Mosikola Yovilinga Via Huku? (Sal. 35:18) Okuti ukahi nokuvelongesa okuundapa nombili movilinga viokuivisa? Ukahi nokuvekuatesako okusoka kombatisimu nomovilinga viomuvo auho? Okuti ukahi nokuvevatela okulinga oupanga novaivisi vena ombili nehambu vapondola okuvepameka?—Pro. 13:20.
4. Tyina ovohe valongesa ovana okuenda movilinga viokuivisa tyina nkhele ovatutu, tyiveetela ouwa patyi?
4 Omuhoneki wono salmu wati: “Huku yange, ove wandongesa tunde poukuendye, pahe ndyikahi nokuvalula ovilinga viove vihuvisa.” (Sal. 71:17) Himbika okulongesa ovana vove tyina nkhele ovatutu opo vakale ovaivisi. Tyotyili, okulongesa nawa ovana matyivekuatesako tyina vamekulu!—Pro. 22:6.