Omapulo Akumbululwa
◼ Oityi tuesukisa okulinga opo ononthele momaliongiyo mbahalambe momuwo?
Omuwo ulamba liwa tyina tutomphola nomapanga otyipuka tyimwe otyiwa. Moluotyo, tyipondola okupuiya okulinga ononthele momaliongiyo momuvo waitua. Oityi tyipondola okutukuatesako konthele oyo?
Okuhimbika omaliongiyo moola. Tyina ewaneno liliongiya, otyiwa okuita ovanthu vaumphame ponomphangu mbavo tyina kuakamba ominutu ike ine onombali opo eliongiyo lihimbike moola yatyo, monkhalelo yaongana. (Ecl. 3:1) Omaliongiyo omatutu, ngetyi omaliongiyo okuenda movilinga viokuivisa, tupu ena okuhimbika moola amuhakevelela vana hamwe vekahi mondyila.
Lipongiyei nawa. Otyipuka tyimwe tyakolela pala okulinga ononthele mbetu momuwo waitua okulipongiya. Soka omokonda yatyi onthele yalingilwa. Holovona ononthele mbakolela iya ombupopi. Lityilika okupopia ovipuka viehelikuatele nonthele, vihesukisile unene. Popia monkhalelo yapepuka. Inkha onthele yakutikinya omalekeso ine omapulo, lipongiya nawa tyina onthiki yehenehike. Tyina upongiya onthele yove nondaka yaya peulu, tala pomuvo.
Yapula nawa onthele yove. Tyilinge onthele yove elongomona ine ilingwa nomapulo otyo ovateheleli vakumbulula, otyiwa okuiyapula nawa. Holovona omuvo patyi molingi pu kese sapi ohoneka ponthele. Mokueenda kuonthele yunga omuvo. Tyina ulinga onthele nomapulo otyo ovateheleli vakumbulula lityilika okupopia unene monondaka mbokuhimbika, opo uhakuluminye unene tyina wamehiki pononthele mbakolela. Vokuendesa Omutala Womulavi vena okuhupisa omuvo utuuka pala okulilongesa okakasa kokupitulula. Tupu vesukisa okutala nawa opo vahamane omuwo wotyiimbo tyokuhulililako nelikuambelo.
Okumanuhula momuvo. Inkha eliongiyo limwe lina ononthele ononyingi, ngetyi Eliongiyo Liovilinga, kese mukuatate una okunoñgonoka omuvo wokuhimbika nokumanuhula onthele yae. Oityi muna okulinga inkha eliongiyo likahi nokulamba momuwo? Hamwe omukuatate wike ine vevali vapondola okuhapopi ononthele mbumwe avapopi vala mbuna mbakolela opo eliongiyo limanuhuke momuwo watyo. Ounongo wokulinga ngotyo tyilekesa okuti omunthu omulongesi omuwa.
Ovateheleli vapondola okukuatesako omukuatate ukahi nokuendesa onthele mokuava omakumbululo apameka monondaka mbehehi. Ngotyo, atuho tupondola okuvatela opo omaliongiyo alingwe ‘monkhalelo yaongana.’— 1 Cor. 14:40.