Ononthele Mbutukuatesako Movilinga Vietu Viokuivisa
1. Ononthele “Etompho Konthele Yombimbiliya,” mbulingilwa ovipuka patyi vivali?
1 Omutala Womulavi wounyingi nkhele moputu, uhole okueta ononthele mbati: “Etompho Konthele Yombimbiliya.” Ononthele ombo mbalingilwa ovipuka vivali, okulongesa Ombimbiliya monkhalelo ihambukiswa nokutulekesa oñgeni tupondola okutomphola nomunthu konthele Yombimbiliya. (1 Ped. 3:15) Oñgeni tupondola okuundapesa nawa ononthele ombo?
2. Oñgeni tupondola okuundapesa ononthele ombo movilinga vietu viokuivisa?
2 Mbuundapesa Movilinga Viokuivisa: Ove upondola okupaka nawa ononthele mbumwe Mbomutala Womulavi okukutikinyamo ononthele ombo. Tyina omunthu umwe alekesa esuko, ine omulongwa Wombimbiliya wapula ine wapopia onthele imwe yapopiwa mononthele ombo, omuavelao ine amutomphola konthele oyo. Inkha utupu Omutala Womulavi muna onthele oyo, upondola okuipola mo Internete mo jw.org.
3. Oñgeni tupondola okutomphola ononthele ombo nomunthu umwe?
3 Okuti upondola okutomphola nomunthu umwe konthele yononthele ombo? Vamwe vaita omunthu opo vatangele peulu ononthele ombo, ngwe avatange onondaka Mbombangi. Okulinga ngotyo tyikuatesako mokonda omunthu ulitehelela oñgeni apondola okutala nawa omatavelo etu monkhalelo ihanumanesa.—Deut. 32:2.
4. Oñgeni tupondola okuundapesa ononthele ombo tyina tulilongesa onthwe muene?
4 Lilongesa Ove Muene Nokulongesa Vakuenyi: Tyina utanga ononthele ombo, tala nawa onotestu, no nongeleka, nomu etompho liaendela. Tehelela ondaka omu yapopilwa. Nove hetekela okutyilinga tyina ukahi nokuivisa. (Pro. 1:5; 9:9) Omphange umwe wati: “Okutanga ononthele ombo tyikahi ngatyina ulilongesila komukokoli-ndyila ‘omunongo’, una apeho wii nawa oñgeni mapopi ovipuka monkhalelo yaviuka!”
5. Oñgeni tupondola okukuatesako omulongwa wetu Wombimbiliya okulifuiika opo aave oumbangi?
5 Upondola okuundapesa onotestu mbukahi monongeleka ombo opo ukuateseko omulongwa wove Wombimbiliya okulifuiika opo aave oumbangi. Tangelei kumwe onthele, omulongwa Wombimbiliya akala ngatyina oe omuivisi. Okulinga ngotyo, tyikuatesako omulongwa okupopia omatavelo ae monkhalelo ikahi nawa. (Col. 4:6) Tyotyili, ononthele ombo onkhalelo imwe Jeova etukuatesako “okufuisapo” ovilinga vietu viokuivisa.—2 Tim. 4:5.