Okuti Vokuankhia Tupondola Okuvemona Vali?

Okuti vokuankhia vapondola okukala vali nomuenyo?

EKUMBULULO LIOMBIMBILIYA: “Makuya oola aveho vekahi momalangalo mavekeiva ondaka ya [Jesus], iya avatundu-mo.”—João 5:28, 29.

Ngotyo, Jesus ankho ukahi nokupopia omuvo maukeya, moutumini Wouhamba wae, puetyi aveho veli Mondyembo mavakapolwa-mo. Fernando wapopiwa monthele yokualamba wati: “Nahuvile unene etyi natanga João 5:28, 29 otyikando tyo tete. Yankhuatesako okukala nekevelelo liotyotyili, andyihimbika okusoka komutwe nonthumbi.”

Kohale, Jobe omulume wekolelo, ankho ukevelela okuti tyina amankhi, Huku haa mekemukondola komuenyo. Jobe wapulile okuti: “Inkha omunthu unkhia, okuti upondola okukala vali nomuenyo?” Iya akumbulula nonthumbi okuti: “Mandyikevelela ononthiki ambuho mbovilinga viange viokukuluminyua [omuvo mandyikala Mondyembo], alo epiluluko liange liya. Ove moihana, iya ame andyikutavela.”—Jó 14:14, 15.

Etutilo ankho hatyipuka-ko otyipe ku Marta omphange ya Lazalu. Etyi Lazalu anyima, Jesus apopila Marta okuti: “Omphange yove mapinduka-po.” Marta emukumbulula okuti: “Ndyityii okuti mapinduka-po, petutilo monthiki yahulilila-ko”. Jesus emupopila okuti: “Ame, ame tutilo nomuenyo. Una ukala nekolelo muame, namphila ankhia, makala vali nomuenyo.” (João 11:23-25) Konyima, Jesus akondola Lazalu komuenyo! Ehipululo olio lihambukiswa, litulekesa nawa ovipuka ovinene mavikalingwa komutwe. Nkhele soka komuvo oo, ovanthu ouye auho mavakatutiliswa!

Okuti vamwe mavakatutila avaende keulu?

EKUMBULULO LIOMBIMBILIYA: Ondaka ya Huku ilekesa okuti etutilo lia Jesus lielikalela no liovanthu etyinana, vapopiwa mo Mbimbiliya. Ovanthu ovo vakondolelwe komuenyo pano pohi. Mahi konthele yetutilo lia Jesus tutanga okuti: “Jesus Kristu . . . ukahi kokulio kwa Huku, mokonda waya keulu.” (1 Pedro 3:21, 22) Okuti ankho o Jesus vala matutiliswa nomuenyo wo keulu? Jesus wapopilile ono apostolu mbae okuti: “Inkha ndyenda andyikemupongiyila omphangu, mandyiya vali okumupola mukakale name. Opo nonwe mukakale apa ame ndyikahi.”—João 14:3.

Kristu waya keulu iya apongiya omphangu pala ovalongwa vae vamwe. Ava mavatutiliswa nomuenyo wo keulu, vena 144.000. (Revelação [Apocalipse] 14:1, 3) Mahi oityi ovalanduli ovo va Jesus mavakalinga keulu?

Mavakakala novilinga ovinyingi unene! Ovihonekwa vitupopila okuti: “Kese umwe mapindulwa-po metutilo liotete, omuna-mbembwa, nomusukuki. Ononkhia mba vali mbutupu epondolo liokuveipaa. Anthi, mavakakala ovanakwa va Huku no va Kristu, avakatumina kumwe nae omanima 1.000.” (Revelação 20:6) Vana mavakatutiliswa avande keulu, mavakakala ovatumini novanakwa, avakatumina kumwe na Kristu ohi aiho.

Konyima ovalie mavatutiliswa?

EKUMBULULO LIOMBIMBILIYA: Movihonekwa muvasiwa onondaka mbo apostolu Paulu etyi ati: “Ame ndyina ekevelelo ku Huku, ekevelelo vakuetu ava navo vena, liokuti, makukakala etutilo liovaviuki na vana vehevaviuki.”—Atos 24:15.

Ovalie mavakutikinyua povanthu ovo Paulu apopia okuti “ovaviuki”? Tala ongeleka imwe. Omulume wekolelo Daniele, konthyulilo yomuenyo wae wapopililue okuti: “Ove mokapululukwa-po, mahi konthyulilo yononthiki mokapinduka-po opo utambule ondyambi yove.” (Daniel 12:13) Opi Daniele makatutilisilwa? “Ovaviuki mavakapiñgana ohi, avakakala-ko apeho.” (Salmo 37:29) Tupu Jesus wapopile okuti: “Vomutima wapoleya vena ehambu, mokonda mavakapiñgana ohi.” (Mateus 5:5) Daniele novanthu ovakuavo vekolelo, mavakapindulwa-po, opo vakale vali kombanda yohi apeho.

Ovalie mavakutikinyua povanthu “vehevaviuki” Paulu apopia? Ovanthu ovanyingi vali-ko, iya avankhi, tyiheneive, nokunoñgonoka otyili tyo Mbimbiliya. Tyina vamapindulwa-po, mavakala nomphitilo yokunoñgonoka nokupanda Jeovaa na Jesus. (João 17:3) Aveho mavaholovona okuumbila Huku, mavakakala nekevelelo liokukala apeho nomuenyo—nga Jeova.

Oñgeni ovanthu kombanda yohi mavakakala?

EKUMBULULO LIOMBIMBILIYA: Huku “makasekuna ononkhuka momaiho avo, ononkhia, nokulila, no nongembia kamavikakalako vali. Mokonda ovipuka ovio aviho mavikalamba.” (Revelação 21:4) “Mavakatunga onondyuo avakalamo, mavakatuika omiti avakalia ovinyango viavio.”—Isaías 65:21.

Nkhele soka okukakala mouye ngoo, novenyi uhole vatutiliswa! Mahi nkhele epulo litualako, liokuati Onthumbi patyi una yokuti tyotyili vokuanyima mavakatutila?