Omukanda wo Nonkhalamutwe Mbo Nombangi Mba Jeova

Notyolwe Vaivisi Vouhamba wa Huku:

SOKA ñgeno u-wombunga yo Mbetele mo Brooklyn. O Mutano komuhuka monthiki 2 ya Kulindi yo 1914. Upumphi pomphangu yove komesa pala okulia, mukevelela Omukuatate C. T. Russell ukahi nokuya. Liwa-liwa, epito aliikuka iya Omukuatate Russell anyingila. Atalama-po katutu, ngetyi ehole okulinga, iya akukuinya ombunga yo Mbetele nehambu okuti “Okamenei amuho.” Aha-pumphama liwa pomphangu yae, ati tehelelei, iya alingi eiviso lihambukiswa okuti: “Omuvo wono Sindiyu wapua; ononthiki mbo nohamba mbavo tupu mbapwa!” Ove ñgeno wahambukwa unene, mokonda ankho utyikevelelale ehimbwe! Kumwe nombunga yo Mbetele onwe muetavela eiviso olio epe amuhakela nehambu.

Palambale omanima omanyingi tunde etyi Omukuatate Russell alinga eiviso olio. Oityi Ouhamba wa Huku ukahi nokulinga tunde opo? Ovipuka ovinyingi! Tunde apa Ouhamba oo wavialekua, Jeova ukahi nokusukukisa nokulongesa ovanthu vae, ankho vena ovityita vihehi mo 1914, pahe vehungi ko nomiliau 8. Omononkhalelo patyi ove uhole okupola ouwa kelongeso olio?

Hono tuhole okuiva ovakuatate vati: “Etuku-tuku lia Jeova keulu litualako okueenda!” Iya otyo otyili. Anthi, tunde mo 1914 etuku-tuku lia Jeova, eongano liae keulu, likahi nokuhateka unene, ngetyi motale tyina wamatange nawa omukanda ou. Opo vaivise onondaka onongwa mouye auho, ovaivisi Vouhamba wa Huku vehole okuundapesa ononkhalelo ononyingi mbokuivisa, okukutikinya-mo ono jornale, nokuenda-enda ovikundyi no nopapelo mbahonekwa, nosinema, novikalatau viokuivisa, no nofonografu, nolaliu alo umwe o Internete.

Nekuateso lia Jeova movilinga ovio, pahe tukahi nokulinga omikanda vietu oviwa viapolwa Mombimbiliya, momalaka alamba po 670, nokuviava otyali kovanthu aveho. Ovanyingi veliava pala okutunga Onondyuo mbo Maliongiyo, no Nondyuo mbo Vionge, nono filiyale, movilongo viokuamona no viokuna olumono luhehi. Iya tyina pamoneka oviponga, ovakuatate vetu no nomphange voluembia valumbana okukakuatesako vana vapita motyiponga, okulekesa okuti “vatyitwa pala okuvatela vakuavo pomuvo wononkhumbi.”​— Pro. 17:17.

Pamwe, ononkhalamutwe mbonongeleya novakuavo vetuyele, vetuhindila “ononkhumbi menyina liovitumino,” mahi tyipameka ekolelo lietu tyina tutala okuti ononkhono valinga mbokutalameka ovilinga viokuivisa mbukahi “nokuvatela okuyandyanesa vali onondaka onongwa.”​— Sal 94:20; Fil 1:12.

Tyituhambukiswa unene okuliwaneka kumwe nonwe, mokonda “tu-vomeumbo” like. Mbambavo, noñgonokei okuti onthue tumuhole unene amuho. Tulikuambela opo onondonga mbukahi momukanda omu, mbumukuateseko okupanda vali unene oupanga wenyi na Jeova.​—Mat. 24:45.

Eli olio ehando lietu enene, onthue

Ovakuatate venyi,

Ononkhalamutwe mbo Nombangi mba Jeova