Omikanda Viokulilongesa Omukanda Wovilinga Omuenyo Wetu Woukilisitau
6 - 12 YA MAIO
OLUMONO LUKAHI MONDAKA YA HUKU | 2 OVA KOLINDU 4-6
“Tuhayekei-ko”
(2 Ova Kolindu 4:16) Moluotyo, katuyeke-ko, mahi namphila olutu luetu kondye lukulupa aluvototela, mahi momutima tukaleswa ovape ononthiki ambuho.
A Sentinela 15/08/2004 pefo 25 §§ 16-17
Uhayeke-ko Namphila Waponua
16 Okupameka oupanga wetu na Siovaa otyipuka tyimwe tyakolela. Putyina oupanga tuna na Siovaa wapama, pamwe tuponwa, mahi nalumwe matuponwa atuyekepo okumuumbila. Siovaa “Oe ukahi nokuavela epondolo una wepuila, nokuavela ononkhono una uhenambo.” (Isaías 40:28, 29) Onondaka ombo mbafuisiluepo momuenyo wa Paulu otyo ahonekela okuti: “Moluotyo, tuhasoyei, namphila olutu luetu lukala tyehena ononkhono, mahi mokati tukahi nokukala ovape ononthiki ambuho.” — 2 Ova Kolindu 4:16.
17 Tala okuti ondaka “nthiki na nthiki”, ilekesa okuti tuna okupola ouwa momilao vya Siovaa. Omphange umwe una omanima 43 movilinga vioumisionaliu wakalele novitateka ovinyingi mahi no ngotyo watuaileko. Wati: “Nakala notyituwa tyokupinduka-po komuhuka tyina nkhele nehenelinge otyipuka natyike, opo ndyikale nomuvo wokulikuambela nokutanga Ondaka ya Huku. Otyituwa otyo tyankhuatesako okukoleleya aloo hono.” Nonthue tupondola okuyumba onthumbi mepondolo liononkhono mba Siovaa inkha tulikuambela “ononthiki ambuho,” nokusokolola movituwa viae vihuvisa iya no komilao viae.
(2 Ova Kolindu 4:17) Mokonda, namphila ononkhumbi mbukala omuvo uhehi iya mbapepuka, mahi mbutuetela omunkhima omunene, omunkhima umwe uhapu;
Perspicaz Vol. 3 pefo 255 § 1
Okukoleleya
Tupu otyipuka tyakolela okuhaombesa ekevelelo lietu liokukakala nomuenyo uhapu uhena onkhali. Nii ononkhia, mbukahi pomaoko onondyali mbetu kambupondola okunyona ekevelelo tuna. (Loma 5:4, 5; 1 Tes. 1:3; Ehol. 2:10) Ononkhumbi tumona hono mbukala tyihena esilivilo tyina tusoka kekevelelo matukakala nalio komutwe wandyila. (Loma 8:18-25) Tyina tusoka komilao matukamona komutwe wandyila, kese tyitateka tumona hono “katyikala ehimbwe”. (2 Kol. 4:16-18) Okusoka unene kovitateka tuna hono tyipondola okutusoyesa iya nokutepulula oupanga wetu na Siovaa Huku.
(2 Ova Kolindu 4:18) katupondola okusoka kovipuka vimoneka, mahi tusoka kovipuka vihamoneka. Mokonda ovipuka vimoneka kavisete okupwa, mahi ovipuka vihamoneka kavipu.
Ovola Olumono Lwa Huku
(2 Ova Kolindu 4:7) Mahi, onthue tuna olumono olo monombiya mboluma, opo epondolo liavilapo likale lya Huku, ha lietu.
A Sentinela 01/02/2012 pomafo 28-29
“Hambukiswa Otyipala Tya Siovaa”
David Splane, umwe Pononkhalamutwe mbo Nombangi, wapopia konthele yosapi oyo yapolwa Movihonekwa. (2 Ova Kolindu 4:7) Olumono patyi olu? Okuti luiwe okuti enoñgonoko, ounongo? Omulongomoni akumbulula okuti “au”. “Olumono Paulu ankho ekahi nokupopia ‘otyilinga’ tyokuivisa onondaka onongwa Mbouhamba.’” (2 Ova Kolindu 4:1, 2, 5) Omukuatate Splane wahinangelesile ovalongwa onohanyi ononthano ankho vekahi nokulongeswa opo vetyivile okuundapa motyilinga tyakolela mavapewa tyokuivisa. Wati muna okukala nesuko enene notyilinga otyipe mamupewa.
Omulongomoni wapopia okuti “onombiya mboluma” mbulekesa olutu luetu. Waeleka onombiya mboluma no mboolu. Onombiya mboolu kambuundapeswa unene. Iya onombiya mboluma, movikando ovinyingi mbalingwa opo mbuundapeswe ononthiki ambuho. Inkha tupaka olumono mombiya yoolu, tyafuile tupondola okutala vala kombiya yatyo atuhatale muetyi tyikahi mokati. Omukuatate Splane wati: “Onwe kamuhande okuliavela omunkhima pala onwe muene.” “Ngo nomisionaliu, mamuhande okuhongolela ovanthu ku Siovaa. Iya onwe munombiya mboluma mbeliola omutima.”
(2 Ova Kolindu 6:13) Ngotyo, ndyipopia no onwe ngatyina muvana vange — tulingei ngetyi onthue tukahi nokumulinga — ikulei omitima vienyi.
Omutala Womulavi 01/11/2009 pefo 25 § 7
Tualako Okuyawisa Ohole Yove Novakuatate
7 Iya onthue? Oñgeni “matuyawisa” ohole yetu novakuatate? Ovanthu vokuatyitwa enima like, no vomuhoko wike, tyipondola okuhevepuiya okukala omapanga kese umwe na mukuavo. Iya vana vokuna omahando elifwa movitalukilo, ovikando ovinyingi vakala kumwe omuvo omunyingi. Mahi, inkha oupanga tuna no Vakilisitau vamwe utuyapula ku vakuetu, tuesukisa “okuyawisa” oupanga wetu. Otyiwa tulipule okuti: ‘Okuti pamwe ndyiundapa movilinga viokuivisa ine movilinga ovikuavo novakuatate no nomphange, vehemapanga ange? Okuti Mondyuo Yomaliongiyo, ndyitomphola vala novape, ndyisoka okuti nthiki imwe mavakala omapanga ange? Okuti ove ukukunya aveho, ovakulu novakuendye mewaneno?’
Okutanga Ombimbiliya
(2 Ova Kolindu 4:1-15) Ngotyo, tyetyi tuna otyilinga etyi mokonda tualingwa okankhenda, katuyeke-ko. 2 Onthue tuayekapo ovipuka vikundisa, viokulingilwa pokamphengi iya katulingi omaandambeyo, katuyawisa natyike mondaka ya Huku, tupu katupolo-mo natyike; mahi mokunoñgonokesa otyili, onthue tulilekesa ku Huku okuti tuaava ongeleka ongwa komitima viovanthu aveho. 3 Inkha onondaka onongwa tuivisa mbaholama, mbaholama ku vana vekahi nokuenda no kehanyauno, 4 vokuhetavela, vana huku youye uno ahika omalusoke opo otyimimi tyomunkhima wonondaka onongwa konthele ya Kilisitu, otyifuika tya Huku, tyihamimikile muvo. 5 Onthue katukahi nokuivisa konthele yetu muene, tuivisa konthele ya Kilisitu Sesusi, okuti o Tatekulu iya tukahi ngatyina tuvapika venyi mokonda ya Sesusi. 6 Mokonda o Huku wapopile okuti: “Menthiki muliaime otyimimi” iya ukahi nokuliaima momitima vietu opo amimikile notyipala tya Kilisitu, nomunkhima wenoñgonoko lya Huku. 7 Mahi, onthue tuna olumono olo monombiya mboluma, opo epondolo liavilapo likale lya Huku, ha lietu. 8 Tuna ovitateka ovinene mononkhalelo ambuho, mahi katuahitikinyinwe tyihetyivili okuliviya; tuasukalala, mahi katukala tyihena omphitilo; 9 tuhataikiswa, mahi katuasilwe-po; tutokesilwa pohi, mahi katuhanyua-ko. 10 Kese apa tuenda tukahi motyiponga tyononkhia nga Sesusi, okulekesa kovanthu okuti tumoneswa ononkhumbi ngo ombu Sesusi amonesilwe. 11 Onthue tuna omuenyo, mahi apeho tukahi motyiponga mokonda tuvalanduli va Sesusi, otyo tyilekesa kovanthu okuti tumoneswa ononkhumbi ngo ombu Sesusi amonesilwe. 12 Ngotyo, onthue tukahi motyiponga tyononkhia, mahi otyo onwe tyimuetela omuenyo. 13 Tyahonekwa okuti: “Nakala nekolelo otyo napopila.” No onthue tualekesa okuti tuna ekolelo ngo olio otyo tupopila. 14 Tutyii okuti Una wapindula-po Sesusi no onthue meketupindula-po kumwe na Sesusi etutuala kwe kumwe no onwe. 15 Mokonda ovipuka ovio aviho, omokonda yenyi, opo okankhenda okanene ka Huku katualeko okuliyawisa vali unene, mokonda ovanthu ovanyingi vekahi nokupandula pala omunkhima wa Huku.
13 - 19 YA MAIO
OLUMONO LUKAHI MONDAKA YA HUKU | 2 Ova Kolindu 7-10
“Ovilinga Viokuava Ekuateso Poviponga”
(2 Ova Kolindu 8:1-3) Pahe onthue vakuatate, tuhanda munoñgonoke okankhenda okanene Huku alinga omawaneno oko Masedonia. 2 Ankho vekahi nokulolwa unene mononkhumbi ankho valambela. Iya namphila ankho vahepa unene, ankho valundwa nehambu enene iya valekesa okuti vena oupanga omuwa na Huku notyali tyavo otyinene. 3 Vaava atyiho vevila, alo umwe avaave vali unene tyilamba puetyi vevila okuava. Ame muene ndyimbangi yotyo,
A Sentinela 01/11/1998 pefo 25 § 1
“Huku Uhole una Wava Tyahakuluminyua”
Tete, Paulu wapopia konthele yo voko Masedonia, ankho valinga oviawa nomutima auho. Paulu wahoneka okuti: “Ankho valambela mononkhumbi” namphila ankho vahepa unene, ankho valundwa “nehambu iya valekesa okuti vena oupanga omuwa na Huku notyali tyavo otyinene.” Voko Masedonia ankho kavakuluminyua opo valinge oviawa. Tyelikalela notyo Paulu wati: “Muene vatualako okulivondela ku onthue opo valinge otyiawa tyokankhenda”. Oviawa vilingwa no voko Masedonia ankho vimoneka nawa mokonda “ankho vahepa unene”. — 2 Ova Kolindu 8:2-4.
Ouhamba Utumina pefo 209 § 1
Ovilinga Viokuava Ekuateso Poviponga
MENIMA lyo 46 P.K., o Sundeia ankho ikahi mondyala onene. Mokonda ovilia kavihi, ankho vilanda onombongo ononyingi, iya ovalongwa va Kilisitu ova Sundeu kavetyivili okuvilanda. Ankho vekahi mondyala onene, ipondola okuveipaa. Mahi, Siovaa evekuatesako monkhalelo ovalongwa ovakuavo va Kilisitu vehe-nemone. Oityi matyiende-po?
(2 Ova Kolindu 8:4) muene vatualako okulivondela ku onthue opo valinge otyiawa tyokankhenda, navo na vaundape movilinga viokukuatesako ovasukuki.
Ouhamba Utumina pomafo 209-210 §§ 4-6
Ovilinga Viokuava Ekuateso Poviponga
4 Momukanda wavali Paulu ahonekela ova Kolindu, wahangununa okuti ovilinga vyo Vakilisitau vina ononthele onombali. Namphila omukanda oo Paulu euhonekela Ovakilisitau ovalembulwa, tupu onondaka ombo hono mbupopia “onongi onokhuavo” mba Kilisitu. (Suau 10:16) Onthele yotete, “ovilinga viokuwaneka,” ine ovilinga viokuivisa nokulongesa. (2 Kol. 5:18-20; 1 Tim. 2:3-6) Onthele yavali yovilinga vietu, ekuateso tuavela ovakuatate vetu. Mahi, Paulu wapopia haunene “viokuava ekuateso.” (2 Kol. 8:4) Ondaka “ovilinga,” ivasiwa ponondaka mbati, “ovilinga viokuwaneka” “novilinga viokuava ekuateso,” yapolwa mo yo Geleku di·a·ko·niʹa. Otyo tyakolela mokonda yatyi?
5 Paulu waundapesa ondaka ike yo Geleku, pala ovilinga ovio vivali. Ngotyo wawaneka ovilinga viokuava ekuateso, kumwe novikuavo ankho vilingwa mewaneno Liovakilisitau. Tete Paulu wati: “Kuna ovilinga vielikalaila, mahi kuna vala Tatekulu wike. Kuna ovilinga vielikalaila, . . . mahi [ovilinga ovio] vilingwa nononkhono mbuike vala mba Huku.” (1 Kol. 12:4-6, 11) Ngotyo, Paulu wawaneka ovilinga vielikalaila vilingwa mewaneno okuti “ovilinga vya Huku.” (Loma 12:1, 6-8) Moluotyo, waundapesa omuvo wae, opo “akuateseko ono sandu”! — Loma 15:25, 26.
6 Paulu wakuatesako ova Kolindu okunoñgonoka oityi ovilinga viokuava ekuateso vilingila onthele movilinga viavo viokuivisa no mefendelo valingila Siovaa. Tala etyi apopia: Ovakilisitau vakuatesako vakuavo, vetyilinga mokonda “vetavela onondaka onongwa konthele ya Kilisitu.” (2 Kol. 9:13) Ngotyo, ehando Liovakilisitau liokuendela monondonga mba Kilisitu, livelunda okukuatesako ovakuatate vavo. Paulu wati, tyivelunda okukuatesako ovakuatate vavo, “okankhenda okanene ka Huku vahatokalele.” (2 Kol. 9:14; 1 Pet. 4:10) Ngotyo, o Sentinela 1 ya Dezembro yo 1975, yapopia konthele yokuundapela ovakuatate vena omasuka-suka okukutikinyamo ovilinga viokuava ekuateso, okuti: “Tuhakalei nonkhango yokuti ku Siovaa Huku no Mona wae Sesusi Kilisitu ovilinga ovio viakolela unene.” Tyotyili, ovilinga viokuava ekuateso onthele imwe yakolela yovilinga vya Huku. — Loma 12:1, 7; 2 Kol. 8:7; Heb. 13:16.
(2 Ova Kolindu 9:7) Kese munthu alinge ngetyi atokola momutima wae, ahalingi tyihahandele ine tyakuluminyua, mokonda Huku uhole una waava nehambu.
Ouhamba Utumina pefo 196 § 10
Opi Kutunda Onombongo Mbuvatela Ovilinga Viouhamba
10 Tete, tuava tyahakuluminyua mokonda tuhole Siovaa iya tuhanda okulinga “etyi tyimuhambukiswa.” (1 Suau 3:22) Tyotyili, Siovaa uhambukwa tyina una umufenda aava nomutima wae auho. Tutalei etyi apositolu Paulu apopia konthele yoviawa Ovakilisitau valinga. (Tanga 2 Ova Kolindu 9:7) Omukilisitau wotyotyili, kakuluminyua okuava. Mahi, ulinga oviawa mokonda otyo “atokola momutima wae.” Otyo tyilekesa okuti, Omukilisitau ulinga otyiawa tyina atala okuti wesukisa okutyilinga iya upondola okutyilinga. Omuavi oo upandwa na Siovaa, mokonda “Huku uhole una waava nehambu.” Ombimbiliya ipopia okuti: “Huku uhole ovanthu vetyihole tyokuava.”
Ovola Olumono Lwa Huku
(2 Ova Kolindu 9:15) Tupandulei Huku mokonda yotyiawa tyae otyinene aava.
Omutala Womulavi 16.01 pefo 12 § 2
Lundua “Notyiawa Otyinene tya Huku”
2 Paulu ankho utyii okuti otyilikutila tya Sesusi tyilekesa okuti omilao aviho vya Huku mavikafuisuapo. (Tanga 2 Ova Kolindu 1:20.) “Otyiawa otyinene” Huku aava ovipuka aviho oviwa etuavela mokonda ya Sesusi, nouwa-tima, noluembia luotyotyili Siovaa etulekesa. Otyiawa otyo tyakolela katyitavela okutyihangununa monkhalelo tunoñgonoka nawa-nawa. Oñgeni otyiawa otyo tyakolela tyitukalesa? Iya oñgeni otyiawa otyo tyitulunda opo tulipongiye pala Ehinangelo liononkhia mba Kilisitu mu Tatu, 23 ya Março yo 2016?
(2 Ova Kolindu 10:17) “Mahi una ulipanda, elipandele mu Siovaa.”
Despertai! 08/07/1999 pomafo 20-21
Okuti Tyapenga Okulimphanda?
Movihonekua Viovakilisitau vyo Geleku, ondaka kau·khá·o·mai, yapitiyua okuti “okulimphanda, ine okulisapa motyipuka tyimwe”, ondaka oyo iundapeswa monkhalelo ikahi nawa ine omonkhalelo yapenga. Paulu wati, mongeleka tupondola “okulimphanda mekevelelo no menkhimano lya Huku”. Tupu wapopia okuti: “Mahi una ulipanda, elipandele mu Siovaa.” (Ova Loma 5:2; 2 Ova Kolindu 10:17) Otyo tyihangununa okulimphandela mu Siovaa mokonda o Huku yetu, iya tupondola okulipanda mokonda yenyina liae ewa.
Okutanga Ombimbiliya
(2 Ova Kolindu 7:1-12) Moluotyo nonthyolwe, mokonda tuna omilao ovio, tulisukulei onkhako aiho mohitu no momalusoke, opo tukale vali ovasukuki mokonda yonthilo na Huku. 2 Tuavelei omphangu momitima vienyi. Onthue tutupu nawike tualinga omapita, tutupu nawike tuanyona, katuapolele natyike komunthu nawike. 3 Ame hapopile ngotyo pala okumuvela onombei. Mokonda ngetyi napopia-le, onwe mukahi momitima vietu, tyilinge tunkhia tyilinge tukala nomuenyo. 4 Ame tyina ndyipopia no onwe hiholeka natyike. Ndyilipanda unene mokonda yenyi. Ame napamekwa unene; ndyihambukwa unene mononkhumbi mbetu ambuho. 5 Ngotyo, etyi tuehika ko Masedonia, katuakalele nombembwa, tuatualako okumoneswa ononkhumbi mononkhalelo ambuho, kondye ankho tuna ovilwa iya mokati tuatila owoma. 6 Mahi Huku upameka ovanthu vokuasoya, wetupameka etyi Titu eya. 7 Iya ha mokonda vala yetyi eya, mahi tupu tuapamekwa mokonda wakondoka tyapama, mokonda yenyi. Wetupopila okuti muhanda tulimone-po, nokuti muanumana, nokuasukalala na ame, iya otyo tyiyawisa kehambu liange. 8 Mokonda alo umwe inkha nemunumanesa nomukanda wange, ame hilivele. Potete ankho tyanumanesa mokonda nemunumanesa. (Mahi ndyityii okuti muanumana vala omuvo uhehi). 9 Pahe ndyihambukwa ha mokonda yetyi nemunumanesa, mahi omokonda muanumana amulivele. Onwe muanumaneswa monkhalelo Huku ahanda, opo muhapeseke kotyipuka natyike mokonda yetu. 10 Okunumaneswa ngetyi Huku ahanda, tyilunda ovanthu okulivela ononkhali iya avakamona eyovo; mahi okunumana monkhalelo youye, tyituala kononkhia. 11 Tyimoneka nawa okuti muanumaneswa ngetyi Huku apanda, iya moluotyo mualinga ononkhono mbokulinga etyi tyaviuka. Muasukukisa omanyina enyi, muanumana notyivi tyalingwa, mokonda muna onthilo na Huku, ankho muhanda okulivela, amuumbila Huku nomutima auho, iya amuviukisa otyivi tyalingwa. Ovipuka aviho vialingwa nawa pala okutetulula otyitateka otyo. 12 Namphila nemuhonekela, hahonekele mokonda ya una wapengesa, tupu ha mokonda yo wokualingwa omapita, mahi opala tyimoneke komaiho a Huku okuti muesuka nokutehelela etyi tupopia.
20 - 26 YA MAIO
OLUMONO LUKAHI MONDAKA YA HUKU | 2 OVA KOLINDU 11-13
“Paulu Wakoleleyile ‘Ekete Mohitu’”
(2 Ova Kolindu 12:7) mokonda yonondaka ombo napopilwa. Opo nehelimphande unene, napakwa ekete mohitu, oandyu ya Satanasi na itualeko okumbeta opo nehelipake-ko unene.
A Sentinela 15/06/2008 pomafo 3-4
Tualako Okukoleleya Namphila una Ovitateka
Omuumbili omukuavo wekolelo, waitile ku Siovaa opo “emupole ekete mohitu,” o apositolu Paulu. Waita ovikando vitatu ku Huku opo emuyovole motyitateka otyo. Kese otyitateka tyelifwa notyo tyikahi ngekete litoma, ekete olio ankho lipondola okutyilika ehambu Paulu ena liokuumbila Siovaa. Paulu waeleka otyitateka otyo ngatyina ankho ekahi nokuvetwa ononthiki ambuho. Siovaa emukumbulula okuti: “Okankhenda kange okanene, katuuka pala ove, epondolo liange likahi nokufuiswapo mokuhapamene.” Pahe ame mandyilipande mokonda yokuhapamene kwange opo epondolo lya Kilisitu litualeko mu ame ngekaka.” (2 Kol. 12:7-10) Oityi ankho ahanda okupopia konthele yotyo?
(2 Ova Kolindu 12:8, 9) Nelivondela ovikando vitatu ku Tatekulu okuita opo amphole ekete olio. 9 Mahi ngwe amphopila okuti: “Okankhenda kange okanene, katuuka pala ove, epondolo liange likahi nokufuiswapo mokuhapamene.” Pahe ame mandyilipande mokonda yokuhapamene kwange opo epondolo lya Kilisitu litualeko mu ame ngekaka.
A Sentinela 15/12/2006 pefo 24 §§ 17-18
Siovaa Waavela “Ononkhono Mbae una Umuita”
17 Huku wakumbulula elikuambelo lya Paulu etyi ati: “Okankhenda kange okanene, katuuka pala ove, epondolo liange likahi nokufuiswapo mokuhapamene.” Paulu ahoneka okuti: “Pahe ame mandyilipande mokonda yokuhapamene kwange opo epondolo lya Kilisitu litualeko mu ame ngekaka.” (2 Ova Kolindu 12:9; Salmo 147:5) Ngotyo, Paulu elitehelela okuti pokati ka Kilisitu, ondyakulilo onene ya Huku itualako mwe ngekaka. Hono, Siovaa ukumbulula omalikuambelo etu monkhalelo yelifwa noyo. Siovaa utandaveka ekaka liae opo ayakulile ovaumbili vae.
18 Moluotyo ekaka kalituyakulila kombila nii komphepo, mahi lipondola okutuyakulila kovipuka ovikuavo. Tyelifwa notyo ondyakulilo tupewa “nononkhono mba Kilisitu” kambututyilika kovitateka nononkhumbi tumona. Mahi, ondyakulilo oyo tyotyili ituyakulila moupanga wetu tuna na Huku no momaliva omutumini wouye uno Satanasi. (Eholololo 7:9, 15, 16) Ngotyo, namphila una otyitateka tyimwe tyikahi ngoti ‘katyikahi nokulamba’ mahi nongotyo kala nonthumbi yokuti Siovaa weete ononkhono ukahi nokulinga iya “ukahi nokukumbulula omalikuambelo ove”. (Isaías 30:19; 2 Ova Kolindu 1:3, 4) Paulu wahoneka okuti: “Mahi Huku omukuatyili iya kamemuyeke mulolwe notyipuka muhevili okukoleleya, mahi tyina mulolwa ngwe memuavela omphitilo opo mutyivile okukoleleya.” — 1 Ova Kolindu 10:13; Ova Filipu 4:6, 7.
(2 Ova Kolindu 12:10) Ngotyo, mokonda ya Kilisitu ame ndyihambukilwa okuhapamene, nokupenyua, nokumoneswa ononkhumbi, nokukala novitateka. Mokonda tyina nahapamene, opo ndyina vali epondolo enene.
Omutala Womulavi 18.01 pefo 9 §§ 8-9
“Huku Waavela Epondolo una Wepuila”
8 Tanga Isaías 40:30. Tupondola okukala nounongo wokulinga ovipuka ovinyingi, mahi katutyivili okulinga ovipuka aviho kononkhono mbetu muene. Otyo otyipuka onthue atuho tuna okunoñgonoka. Apositolu Paulu ankho una ounongo wokulinga ovipuka ovinyingi, mahi ankho kapondola okulinga vala etyi ankho ahanda. Etyi apopila Siovaa oñgeni elitehelela, Siovaa emupopila okuti: “Ononkhono mbange mbukahi nokupamekwa mokuanama.” Paulu ankho wanoñgonokele etyi Siovaa emupopila. Mokonda yotyo apopi okuti: “Tyina nasoya, opo ndyina ononkhono.” (2 Kol. 12:7-10) Otyo ankho tyihangununa-tyi?
9 Paulu waimbuka okuti ankho pena ovipuka ehevili okulinga kononkhono mbae muene. Ankho wesukisa ekuateso lya umwe una vali epondolo tyipona-e. Ononkhono mba Huku ankho mbupondola okuavela Paulu ononkhono tyina ekahi tyasoya. Ankho mbupondola okumukuatesako unene. Tupu ankho mbupondola okuavela Paulu epondolo liokulinga ovipuka ankho ehevili okulinga kononkhono mbae muene. Otyo tyipondola okumoneka nonthue hono. Tyina Siovaa etuavela ononkhono mbae, tukale vali tyapama!
Ovola Olumono Lwa Huku
(2 Ova Kolindu 12:2-4) Ndyii omunthu umwe ukahi kumwe na Kilisitu. Palambale omanima 14 atualwa no keulu lya tatu — tyilinge waya nolutu, tyilinge waya tyihena olutu, ame hityii — utyii o Huku. 3 Ame ndyii omulume oo — mahi tyilinge molutu, tyilinge wayapuka kolutu; ame hityii, utyii o Huku — 4 watualua no momphangu yombembwa, eivi onondaka mbahapopiwa iya omulume kayekwa embupopie.
Omutala Womulavi 18.12 pefo 8 §§ 10-12
Omapulo Ovatangi
“Eulu liatatu” liapopiwa mu 2 Ova Kolindu 12:2, mokutala lilekesa Outumini wa Mesiya ukahi pomaoko a Sesusi Kilisitu novo 144.000, tupu liihanwa okuti “Eulu Epe.” — 2 Pet. 3:13.
Olio “Eulu liatatu” Ouhamba wavilapo maukatumina.
“Omphango yombembwa” omu Paulu “atuailwe pokati kemonekelo” ilekesa (1) omphangu yombembwa maikakala pano pohi, (2) nomphangu yombembwa yopasipilitu maikakala-ko komutwe wandyila yavilapo tyipona ei tuna hono tupu (3) “nomphangu yombembwa ya Huku keulu.” Omapongiyo aeho maakakala-ko mouye omupe.
(2 Ova Kolindu 13:12) Likukunyei pokati na vakuenyi nombesinyu onthyukuki.
Perspicaz Vol. 1 pefo 325
Ombesu
“Ombesu Onthyukuki.” Ovakuatate vo potyita tyotete pokati kavo ankho pena “ombesu onthyukuki” (Loma 16:16; 1 Kol. 16:20; 2 Kol. 13:12; 1 Tes. 5:26), ine “ombesu yohole” (1 Pet. 5:14), ankho ipewa ovanthu aveho tyilinge ovakai ine ovalume. Onkhalelo oyo ankho ilingwa novakuatate vo potyita tyotete. Mahi ova Geleku ovo vena otyituwa tyokulikukunya no nombesu. Namphila Ombimbiliya kaipopi nawa konthele yo “ombesu onthyukuki” ine “ombesu yohole” mahi ilekesa ohole newaneko litualako pokati kovakuatate mewaneno. — Suau 13:34, 35.
Okutanga Ombimbiliya
(2 Ova Kolindu 11:1-15) Alo umwe inkha pamwe ndyilinga ngotyova, nahanda ñgeno mukoleleya movipuka ovitutu ndyilinga vioutyova. Mahi, mukahi nokuvikoleleya! 2 Mokonda ame ndyina onkhuelume no onwe, onkhuelume ngo ya Huku, mokonda muene ame nemulaa okunepwa vala nomulume wike Kilisitu, opo ndyimupakule kwe ngatyina muvamphembela ovasukuki. 3 Mahi nalinga otyiho, mokonda ngetyi onyoka yayondyele Eva nounkhembi, tupu omalusoko enyi apondola okusiliswa, amuyeke-po otyili nousukuki Kilisitu akevela ku onthue. 4 Mokonda inkha omunthu umwe uya aivisa konthele ya Sesusi omukuavo, tyihe una onthue tuaivisa, ine emuetela ononkhono mbelikalela no ombu onwe muatambula, ine emupopila onondaka onongwa ononkhuavo tyihe ombu muetavela, onwe liwa-liwa mutavela etyi apopia. 5 Ame hisoko okuti ndyimututu vali kono apositolu mbavo mbulitala ngatyina mbukahi nawa. 6 Namphila ame nehena ounongo wokupopia, mahi hikahi ngo otyo menoñgonoko, onthue tuemulekesa-tyo nawa mononkhalelo ambuho no movipuka aviho. 7 Ine ame nalinga onkhali mokueliola omutima, opo onwe mukale ovanene, mokonda ame nemupopila onondaka onongwa mba Huku tyihafetwa? 8 Ame netavela ekuateso napewa nomawaneno omakuavo iya otyo tyikahi ngatyina nevevaka opo ndyimuundapele. 9 Ngotyo, puetyi ankho ndyikahi no onwe iya andyisukisa ovipuka vimwe, hakalele omulemo komunthu na wike, mokonda ovakuatate ankho vatunda ko Masedonia vankhuatesako unene movipuka ankho nesukisa. Iya andyilingi atyiho ndyipondola opo nehemuiite natyike, iya mandyitualako okulinga ngo otyo. 10 Tyotyili, ngetyi otyili tya Kilisitu tyikahi mu ame, ame himayekepo okulimphanda konthele yotyo motyilongo tyo Akaia atyiho. 11 Omokonda yatyi? Okuti omokonda himuhole? Huku utyii okuti ame ndyimuhole. 12 Mahi etyi ndyikahi nokulinga, mandyitualako okutyilinga opo ndyilityilike vana vaovola ehunga liokulieleka no onthue movipuka velimphandela. 13 Mokonda ovalume ovo ono apositolu mbomatutu, ovaundapi vakemba, velilingisa ngatyina ono apositolu mba Kilisitu. 14 Iya otyo katyihuvisa mokonda Satanasi utualako okulilekesa ngatyina oandyu yotyitei. 15 Tupu katyihuvisa inkha ovaumbili vae navo vatualako okulilekesa ngatyina ovaumbili vouviuki. Mahi onthyulilo yavo maikelikuata novilinga viavo.
27 YA MAIO ALO 2 YA JUNHO
OLUMONO LUKAHI MONDAKA YA HUKU | OVA GALATA 1-3
“Napopia Nae Tyipala na Tyipala”
(Ova Galata 2:11-13) Mahi etyi Sefa eya ko Antiokia, andyimupopila umwe tyipala na tyipala okuti etyi alinga katyaviukile. 12 Mokonda puetyi ovalume vamwe vatumwa na Tiaku veheneye, ankho ulia novanthu veheva Sundeu; mahi etyi vehika, etyiyeke-po ahondovoka-po, mokonda ankho watila owoma vokuapita ekuendye.13 Ova Sundeu ovakuavo navo avelihonyeka kumwe nae mokulikembesa ngotyo, alo umwe na Balanabe elipake kumwe navo mokulikembesa kuavo.
Omutala Womulavi 17.04 pefo 27 § 16
Okuti Ukoyesa Ovipuka Nga Siovaa?
16 Tanga Ova Galata 2:11-14. Petulu wakalele nowoma novanthu. (Pro. 29:25) Petulu ankho utyii oñgeni Siovaa atala ova Sindiyu. No ngotyo, wakalele nowoma wokuti Ovakilisitau ova Sundeu vapita ekuendye, atalelapo mo Selusalei, vapondola okusoka omapita konthele yae mokonda yokuelihonyeka no Vakilisitau ova Sindiyu. Apositolu Paulu apopila Petulu okuti etyi alinga emphinia. Omokonda yatyi? Omokonda Paulu ankho weivile okuti Petulu waamenene ova Sindiyu meliongiyo lialingilwe mo Selusalei menima 49 P.K. (Ovil. 15:12; okatoi Gal. 2:13) Oñgeni Ovakilisitau Onosindiyu vakalele etyi Petulu ayekapo okuliwaneka navo? Okuti ankho tyipondola okuvepundukisa? Okuti oviponyo vya Petulu ankho vipondola okumupolesa ovilinga viae?
(Ova Galata 2:14) Mahi etyi netyimona okuti kavekahi nokuendela monkhalelo yotyili tyonondaka onongwa, andyipopila Sefa komutwe wa aveho okuti: “Inkha ove, namphila umu Sundeu, ulinga ngetyi ovanthu veheva Sundeu valinga, omokonda yatyi uhandela ñgeno ovanthu veheva Sundeu vaendela movituwa viova Sundeu?”
Omutala Womulavi 01/03/2013 pefo 9 § 12
“Petupu Natyike Tyipundukisa” Vana Vehole Siovaa
12 Petulu ankho una owoma netyi ovanthu mavasoko konthele yae. Watuaileko okukala omukuatyili ku Sesusi noku Siovaa, mahi walingile oviponyo mokonda yowoma. Mongeleka, waanyene ovikando vitatu okuti wii Sesusi. (Luka 22:54-62) Tupu, watalele Ovakilisitau vamwe ngatyina vakolela vali ko Vakilisitau ovakuavo. Olusoke lwa Petulu ankho kaluaviukile, iya vakuavo mewaneno ñgeno vemuhetekelele. Moluotyo, Paulu emulondola nonondaka mbapama. (Gal. 2:11-14) Okuti Petulu wanumanene, ayekepo okuhatekela mondyila yomuenyo? Au. Wasokele nawa konthele yetyi apopilwa na Paulu, apilulula onkhalelo yae, iya atualako nokuhateka.
Ovola Olumono Lwa Huku
(Ova Galata 2:20) Napapelwa momuti na Kilisitu. Hameko vali ndyina omuenyo, mahi o Kilisitu una omuenyo kumwe na ame. Tyotyili, omuenyo ndyina-o pehepano, omokonda yekolelo Momona wa Huku, wakala noluembia na ame, aave omuenyo wae mokonda yange.
Omutala Womulavi 15/09/2014 pefo 14 §§ 20-21
Umbila Huku Noukuatyili Namphila Umoneswa “Ononkhumbi Ononyingi”
20 Iya konthele yokuyondyua? Mongeleka, oñgeni tupondola okuliyakulila komalusoke etusoyesa? Onkhalelo imwe ikuatesako unene, okusokolola kofeto yeyovo yotyilikutila tya Sesusi. Ongotyo apositolu Paulu alingile. Pamwe ankho ulitehela okuti epongo. Ankho utyii okuti Kilisitu kankhile pala ovanthu vehena onkhali, mahi opala ovakuankhali ngae. Wahoneka okuti: “Ndyikahiko mokonda yekolelo Momona wa Huku, una unthyole iya welipakula pala ame.” (Gal. 2:20) Tyotyili, Paulu wetavelele ofeto yeyovo iya ankho una onthumbi yokuti ofeto oyo opala-e.
21 Onthue tupondola okupolako ouwa omunene kotyali Huku etuavela pokati kofeto yeyovo. Otyo katyilekesa okuti kamatukala vali tyasoya. Vamwe nkhele pamwe mavatualako okulitehela okuti vasoya alo ouye omupe uya. Mahi hinangela okuti: Mavakapewa ondyambi ovo vana vahayekepo okuumbila Huku. Apa katutu Ouhamba wa Huku mauya. Tyina wameya, pano pohi mapakakala ombembwa, iya ovanthu aveho kamavakakala vali nonkhali. Linga ononkhono opo unyingile Mouhamba, namphila umoneswa ononkhumbi ononyingi.
(Ova Galata 3:1) Onwe va Galata muvityova! Olie wemuhongiliya movivi evi? Mokonda onwe muatetekela okupopilwa nawa-nawa oñgeni Sesusi Kilisitu apapelelwa momuti.
Perspicaz Vol. 2 pefo 170
Omukanda Paulu Ahonekela Ova Galata
Paulu wapopia okuti: “Onwe va Galata muvityova”, ankho kekahi nokusoka kovivala ine komihoko, viovanthu vatuka mo va Galasia vakala koutundilo lwo Galasia (Gal. 3:1)) Mahi, Paulu ankho ukahi nokuviyula vamwe mewaneno ankho vekahi nokuhongiliyua novituwa ovivi vyo va sundeu velilekesa okuti ovaviuki pokati kovilolo, mahi kavekahi nokulandula ‘ouviuki wekolelo’ vapewa pokati komphangu omphe. (2:15–3:14; 4:9, 10) Konthele yomalaka “omawaneno oko Galasia” (1:2) ana Paulu ahonekela, ankho ova Sundeu vahonya na vana vehe va Sundeu, ava vahulilila tyilinge no proselitu vapita ekuendye na vana vahapitile ekuendye, aveho ovo ankho vatuka ko Celtica. (Ovil. 13:14, 43; 16:1; Gal. 5:2) Aveho ankho vaihanwa okuti Ovakilisitau voko Galata mokonda otyilongo ankho vakala tyiihanwa okuti o Galasia. Atyiho ankho Paulu ahoneka, ankho uhonekela vana vei nawa otyilongo tyo koutundilo liepunda-umbo lyo Loma haunene vana ankho ehei nawa na vana ankho ehene katalele-po.
Okutanga Ombimbiliya
(Ova Galata 2:11-21) Mahi etyi Sefa eya ko Antiokia, andyimupopila umwe tyipala na tyipala okuti etyi alinga katyaviukile. 12 Mokonda puetyi ovalume vamwe vatumwa na Tiaku veheneye, ankho ulia novanthu veheva Sundeu; mahi etyi vehika, etyiyeke-po ahondovoka-po, mokonda ankho watila owoma vokuapita ekuendye. 13 Ova Sundeu ovakuavo navo avelihonyeka kumwe nae mokulikembesa ngotyo, alo umwe na Balanabe elipake kumwe navo mokulikembesa kuavo. 14 Mahi etyi netyimona okuti kavekahi nokuendela monkhalelo yotyili tyonondaka onongwa, andyipopila Sefa komutwe wa aveho okuti: “Inkha ove, namphila umu Sundeu, ulinga ngetyi ovanthu veheva Sundeu valinga, omokonda yatyi uhandela ñgeno ovanthu veheva Sundeu vaendela movituwa viova Sundeu?” 15 Onthue va Sundeu kokuatyitwa, tuhekahi ngovanthu veheva Sundeu vokulinga onkhali, 16 tuanoñgonoka okuti omunthu kakala omuviuki mokonda yokulinga ovipuka viitwa movitumino, mahi omokonda vala yekolelo mu Sesusi Kilisitu. Ngotyo tuna ekolelo lietu mu Kilisitu Sesusi, opo tuihanwe okuti tuvaviuki mokonda yekolelo mu Kilisitu, hamokonda yovilinga viitwa novitumino ovio, tyetyi nawike makaihanwa okuti omuviuki mokonda yovilinga viitwa novitumino. 17 Pahe inkha no onthue tulinga onkhali putyina tuovola okuihanwa okuti ovaviuki mokonda ya Kilisitu, okuti opo Kilisitu ukahi nokutulingisa onkhali? Au! 18 Inkha ndyikondoka kovipuka nayekele-po, opo ndyilekesa okuti hitavela ovitumino. 19 Mokonda yovitumino ame nankhia pala ovitumino ovio opo ndyikale nomuenyo pala Huku. 20 Napapelwa momuti na Kilisitu. Hameko vali ndyina omuenyo, mahi o Kilisitu una omuenyo kumwe na ame. Tyotyili, omuenyo ndyina-o pehepano, omokonda yekolelo Momona wa Huku, wakala noluembia na ame, aave omuenyo wae mokonda yange. 21 Ame hianye okankhenda okanene ka Huku, mokonda inkha ouviuki uya mokonda yovitumino viapelwe Moisesi, opo ononkhia mba Kilisitu mbutupu esilivilo.