Filemo
1 Ame Paulu, onkhuatwa mokonda ya Kilisitu Sesusi, na Timotiu omukuatate wetu, tuahonekela ove Filemo omuundapi mukuetu onthyolwe, 2 na Afia omphange yetu, na Alukipu mukuetu movilwa, newaneno liliongiyila meumbo liove:
3 Okankhenda okanene ka Huku nombembwa itunda ku Huku Tate yetu no ku Tatekulu Sesusi Kilisitu, vikale no onwe.
4 Mukuatate wange Filemo, ame apeho ndyipandula Huku yange tyina ndyikutumbula momalikuambelo ange, 5 putyina ndyitualako okuiva ekolelo liove nohole una na Tatekulu Sesusi novasukuki aveho. 6 Ame ndyilikuambela opo ekolelo ove una no liovataveli vakuenyi, likukuateseko okuimbuka ononkhano onongwa ambuho tuna menyina lya Kilisitu. 7 Mokonda nakala nehambu enene, nepameko etyi neiva ohole* yove, tyetyi omitima viovasukuki viapamekwa mokonda yove, mukuatate.
8 Moluotyo, namphila ndyina epondolo enene mu Kilisitu, liokukutuma okulinga etyi tyaviuka, 9 mahi ku ame hahe vali okukuita, mokonda yoluembia ove una, tyetyi ame Paulu, pahe nakulupa, tupu ndyinkhuatwa mokonda ya Kilisitu Sesusi. 10 Ndyikuita pala omona wange Onesimu, una wakala omona wange puetyi ndyili mokaleya.* 11 Kohale ankho utupu esilivilo pala ove, mahi pahe una esilivilo pala ove na ame. 12 Ame ndyikahi nokumutuma akondoke ku ove, una ame ndyihole unene.
13 Ame nahandele okukala nae opo ankhuateseko muetyi ñgeno ove undingila omuvo ndyikahi mokaleya mokonda yonondaka onongwa. 14 Mahi ame hahandele okulinga otyipuka natyike ove ohetyitavelele, opo otyiwa ulinga uhetyilinge tyakuluminyua, mahi utyilinge kehando liove muene. 15 Hamwe etyi otyo atundila katutu* pu ove, opo akondoke ku ove pala apeho, 16 ahakondoka vali omupika, mahi ukondoka wapona pomupika, omukuatate onthyolwe, haunene pala ame, mahi unene vali pala ove, omupika tupu omukuatate mu Tatekulu. 17 Ngotyo, inkha unthala okuti ndyipanga liove, mutambula nohole ngetyi ñgeno watambula ame. 18 Tupu, inkha una etyi ekulingile tyapenga ine una etyi ekulevala, ame mandyikufete-tyo. 19 Ame Paulu ndyikahi nokukuhonekela nokuvoko kuange muene okuti: Ame mandyityifete — tyotyili ove utyii okuti una ongele na ame konthele yomuenyo wove. 20 Mukuatate, mokonda atuho tuvalongwa va Tatekulu, ndyipola ouwa ku ove mokukuita upameke omutima wange ame mulongwa wa Kilisitu.
21 Ame ndyina onthumbi yokuti ove motavela, moluotyo ame ndyikahi nokukuhonekela, mokonda ndyityii okuti molingi vali unene tyipona etyi napopia. 22 Mahi tyihe-otyo vala, tupu mphongiyile omphangu apa mandyihikila, tyetyi ame ndyina ekevelelo liokuti mokonda yomalikuambelo enyi mandyikondoka ku onwe.*
23 Epafala, onkhuatwa mukuetu mokonda yekolelo mu Kilisitu Sesusi, utuma okukukukunya-po, 24 tupu na Maluku na Alisitaluku na Dema na Luka ovaundapi kumwe na ame, vekukukunya-po.
25 Okankhenda okanene ka Tatekulu Sesusi Kilisitu kakale notyituwa otyiwa mulekesa.