Panda Jeova Mokonda Omutungi Wetu

1. Omokonda yatyi Jeova Omuhongi wavilapo?

Mu Kuhuhu yo 2010, ko, Inglaterra kuaawa nondolale onomiliau 70 pala okulinga ombiya yoluma ko China. Tyihuvisa okutala okuti omuhongi una ounongo wokulinga onombiya mbulanda onombongo ononyingi nambuna mbulanda onombongo mbehehi. Jeova Omuhongi wetu, wavilapo vali komuhongi wonombiya. Ombimbiliya ipopia okuti Jeova watunga omulume wehena onkhali “nonthata.” (Gênesis 2:7) Omulume oo, Andau wakala “omona wa Huku” iya watungwa nounongo wokuhetekela ovituwa via Huku.​—Lucas 3:38.

2, 3. Oñgeni tupondola okuhetekela ova Isilayeli velivelele?

² Etyi Andau atyitukilapo Omutungi wae, ahakala vali omona wa Huku. Mahi ovanyingi povana va Andau vaholovona Jeova opo akale Omutumini wavo. (Hebreus 12:1) Mokonda velikondola koututu kavetavela ku Satanasi, mahi vahanda Huku akale Tate yavo Nomutungi wavo. (João 8:44) Oukuatyili wavo ku Huku utuhinangelesa etyi tyapopile ova Isilayeli vokuelivela okuti: “Jeova, ove Tate yetu. Onthue tunthata iya ove, Umuhongi wetu. Iya onthue atuho, tuvilinga viomaoko ove.”​—Isaías 64:8.

³ Ovafendi votyotyili va Jeova hono valinga ononkhono mbokuliola omutima nokutavela. Vaimbuka okuti elao limwe enene okuihana Jeova okuti Tate, tupu vahanda akale Omuhongi wavo. Okuti tuafwapo opo tutavele okuviyulwa na Huku? Okuti tyina tutala ovakuatate vetu no nomphange tuimbuka okuti vetavela okuviyulwa na Huku? Tyina tulilongesa oñgeni Jeova aholovona vana aviyula iya omokonda watyi eveviyulila, noñgeni etyilinga, matyitukuatesako okutala vakuetu monkhalelo yaviuka.

JEOVA UHOLOVONA VANA AVIYULA

4.Oñgeni Jeova aholovona omapanga ae? Ava ongeleka.

⁴ Jeova katale ovanthu ngetyi onthue tuvetala. Mahi, utala momutima wa kese munthu. (Tanga 1 Samuel 16:7b.) Jeova wetyilekesa etyi aonganeka ewaneno lio Vakristau. Huku no Mona wae valinga oupanga navana vatalwa ngoti vetupu esilivilo. (João 6:44) Ongeleka imwe, o yomunthu umwe ankho omu Faliseu utiwa Saulu, “omuhingani, wokumonesa vakuavo ononkhumbi, nokuatomba ovanthu.” (1 Timóteo 1:13) Mahi Jeova atale momutima wa Saulu, iya etyimono okuti hanthatako yehesilivila. (Provérbios 17:3) Jeova atale okuti ankho upondola okuviyula Saulu “ngomunthu wae aholovona” pala okuivisa ‘opo atuale enyina liae kovanthu vouye, no konohamba, no kova Isilayeli.’ (Atos 9:15) Jeova tupu uholovona ovanthu ovakuavo opo eveviyule “pala ouwa wavo” okukutikinyamo ononkholwa, navana valinga oundalelapo, novimphulu. (Romanos 9:21; 1 Coríntios 6:9-11) Putyina vatanga Ovihonekwa, vapameka ekolelo liavo mu Jeova iya atyiavela Jeova omphitilo yokuveviyula.

5, 6. Okuyumba onthumbi mu Jeova mokonda Omutungi wetu, matyitulundu okulinga ñgeni (a) Ovanthu tuvasa movilinga viokuivisa? (b) Ovakuatate no nomphange?

⁵ Onthue tuna onthumbi yokuti Jeova uholovona ovanthu ovaviuki opo vakale omapanga ae. Otyo tuhakoyesila ovanthu tuvasa movilinga viokuivisa ine ovanthu vomewaneno. Tala etyi tyalingile omulume umwe utiwa Michael etyi ataleluapo Nonombangi mba Jeova. Wati: “Ame ankho ndyipondola okuvenianga. Ame ankho ndyimukalavi! Konyima, andyipiluluka, navasa ombunga imwe inthyuvisa mokonda yo vituwa viavo oviwa. Andyihuvu unene etyi nanoñgonoka okuti Onombangi mba Jeova! Ovituwa venavio viandyavela ondundo yokutala nawa omokonda yatyi ndyilingila okapungulula. Andyiimbuka okuti ankho ndyiveyele mokonda hivei nawa nomatutu ndyiiva konthele yavo.” Michael ahimbika okulilongesa Ombimbiliya. Konyima ambatisalwa iya anyingila movilinga viomuvo auho.

⁶ Tyina tuimbuka okuti Jeova Omuhongi wetu, onkhalelo tutala ovakuatate no nomphange ipiluluka. Onthue matutale kese tyilinga valinga. Ongotyo Jeova evetala. Jeova utala etyi tyili momitima viavo iya utyii okuti kamavatualako okukala ovakuankhali. Tupu wii omunthu patyi mapiluluka. (Salmo 130:3) Onthue tupondola okuhetekela Jeova inkha tupilulula onkhalelo tutala ovakuatate vetu. Tuundapela kumwe Nomuhongi wetu putyina tukuatesako ovakuatate vetu no nomphange okuovola ovilinga meongano. (1 Tessalonicenses 5:14, 15) Ovakulu vewaneno vena okuava ongeleka ongwa konthele oyo.​—Efésios 4:8, 11-13.

OMOKONDA YATYI JEOVA ETUVIYULILA?

7. Omokonda watyi upandulila onondonga mba Jeova?

⁷ Ovanthu vamwe vapopia okuti: ‘Ame ankho hesukile netyi ovo tate vandongesa alo nakala novana vange.’ Tyina tuamekulu, onthue tutala okuti onondonga ankho tupewa, mbakolela. (Tanga Hebreus 12:5, 6, 11.) Jeova utulongesa noumphwa-lundo mokonda tuvana vae. Uhanda tukale ovanongo, nehambu, nohole nae mokonda o Tate yetu. (Provérbios 23:15) Ngwe kahande tumone ononkhumbi, tupu kahande tunkhie mahi uhanda tulivele.—Efésios 2:2, 3.

8, 9. Hono Jeova utulongesa ñgeni? Iya oñgeni malitualako komutwe?

⁸ Puetyi ankho tuhenenoñgonoke Jeova, tyipondola hamwe ankho tuna ovituwa ovivi. Mahi Jeova wetuviyula, wetukuatesako okulinga omapiluluko, pahe tuna ovituwa oviwa. (Isaías 11:6-8; Colossenses 3:9, 10) Pahe tuli meongano liae. Olio epongiyo Jeova alinga opo etuviyule. Tulitehelela okuti tuapama namphila tuli mouye una ovivi. Ovanthu ovanyingi vekulila mombunga yehena oluembia, pahe veete okuti ovakuatate nonomphange velihole unene meongano liae. (João 13:35) Tuesukisa okulilongesa okulekesa ohole kuvakuetu. Mahi otyipuka tyakolela vali, okunoñgonoka Jeova nokuimbuka okuti utuhole unene.—Tiago 4:8.

⁹ Mouye omupe, matukakala vali unene nonkhalelo ongwa yomuenyo. Matukala nehambu momphangu yombembwa maituminwa Nouhamba wa Huku. Mokuenda kwo muvo oo Jeova matualako okutuviyula nokutulongesa monkhalelo imwe tuehevili okusoka. (Isaías 11:9) Jeova meketukalesa tyihena nkhali. Otyo matyitukuatesako okumunoñgonoka vali nawa, atutyivili okufuisapo nawa onondonga mbae. Tuyekei Jeova etulongese, atulekesa okuti tuna onthilo nae, tupu tulekesei okuti tumuhole.​—Provérbios 3:11, 12.

OÑGENI JEOVA ETUVIYULA

10. Oñgeni Jesus alekesa ounongo nokankhenda Komutungi Omunene?

¹⁰ Ngomuhongi omunongo, tupu na Jeova utwii nawa. Jeova wii eyembelo lietu netyi tulinga, iya utukuatesako tyina tuna ovitateka, tupu utuviyula okutalela konkhalelo yetu. (Tanga Salmo 103:10-14.) Onthue tupondola okulilongesa oñgeni Jeova etutala tyina tunoñgonoka onkhalelo Jesus ankho atala oviponyo viono apostolu mbae. Onthiki imwe, ono apostolu ankho vekahi nokutañguna konthele olie makala vali omunene. Ankho walipo ñgeno watala ñgeni otyituwa otyo tyono apostolu? Hamwe ñgeno wasoka okuti kavekahi ngonthata yaneñgena. Jesus, ankho utyii okuti upondola okuveviyula inkha vemutehelela noumphwa-lundo nokuhetekela otyituwa tyae tyokuliola omutima. (Marcos 9:33-37; 10:37, 41-45; Lucas 22:24-27) Konyima etyi Jesus atutiliswa, ovalongwa avatambula ospilitu ya Huku iya avehelipulu vali olie omunene vali pokati kavo. Mahi avatale vali unene kovilinga Jesus eveavela.​—Atos 5:42.

11. Omononkhalelo patyi David alekesa okuti onthata yaneñgena, iya oñgeni tupondola okumuhetekela?

¹¹ Hono, Jeova undapesa Ombimbiliya, nospilitu sandu, newaneno opo etuviyule. Oñgeni Ombimbiliya ituviyula? Tuesukisa okuitanga, nokusokolola kuetyi tuatanga, nokuita ku Jeova etukuateseko okuendela muetyi tuelilongesa. Ohamba David wahoneka okuti: “Tyina ndyikahi moula ndyisokolola kuove otyinthiki atyiho.” (Salmo 63:6) Tupu wahoneka okuti: “Ame mandyihilivika Jeova, umpha onondonga. Mokueenda kotyinthiki omalusoke ange ambiyula.” (Salmo 16:7) Tyotyili, David ankho usokolola konondonga mba Jeova ayeke mbupilulule omalusoke ae alo umwe tyina mbahapepukile okumbutavela. (2 Samuel 12:1-13) David wetusila ongeleka ongwa yokuliola omutima nokutavela. Pahe lipula okuti: ‘Tyina ndyitanga Ombimbiliya, okuti ndyisokolola kuetyi natanga nokuyeka onondonga mba Huku mbuhike komutima wange? Okuti ndyina vali etyi nesukisa okulinga?’​—Salmo 1:2, 3.

12, 13. Oñgeni Jeova aundapesa ospilitu sandu newaneno opo etuviyule?

¹² Ospilitu sandu ituviyula mononkhalelo ononyingi. Mongeleka, itukuatesako okuhetekela ovituwa via Jesus, nokulekesa ovinyango viospilitu. (Gálatas 5:22, 23) Tyimwe po vinyango ovio ohole. Onthue tuhole Huku iya tuhanda okumutavela nokuviyulwa nae mokonda tutyii okuti ovitumino viae vituetela ouwa. Tupu, ospilitu sandu ituavela ononkhono mbokulityilika okuhongiliyua nouye uno wovivi. (Efésios 2:2) Puetyi Apostolu Paulu omukuendye ankho uhongiliyua nomalongeso omatutu ova Judeu. Mahi ospilitu aimukuatesako okupiluluka. Konyima ahoneka okuti: “Ame ndyina ononkhono movipuka aviho, mokonda ya una umpha epondolo.” (Filipenses 4:13) Nonthue tuesukisa okuita ospilitu sandu nonthumbi yokuti Jeova makumbulula omalikuambelo etu.​—Salmo 10:17.

¹³ Tupu Jeova undapesa ewaneno novakulu vewaneno opo vetuviyule. Mongeleka, tyina ovakulu vewaneno vaimbuka okuti tuasoya valinga atyiho opo vetukuateseko. Mahi kavalongesa vala onondonga mbetyi vasoka. (Gálatas 6:1) Mahi, nomutima weliola velikuambela ku Jeova opo eveavele enoñgonoko nounongo. Konyima, avaovolola Mombimbiliya no momikanda vietu opo vavase onondonga mbutukuatesako. Inkha ovakulu vewaneno veya kuove iya avekuavela onondonga konthele yomuvalo, hinangela okuti otyo otyilekeso tyokuti Huku ukuhole. Tyina wendela monondonga upewa, mokala onthata yaneñgena pomaoko a Jeova iya otyo matyikuetela ouwa.

14. Namphila ena epondolo liokutupilulula, oñgeni Jeova alekesa okuti una onthilo nepondolo lietu liokuholovona

¹⁴ Inkha tunoñgonoka oñgeni Jeova etuviyula, matyitukuatesako okukala noupanga omuwa novakuatate vetu no nomphange. Tupu matukala nolusoke luaviuka konthele yovanthu tuivisa, navana tulongesa Ombimbiliya. Omuhongi tete wesukisa okukoha nawa onthata nokupolamo omamanya novipuka ovikuavo. Omuhongi wetu Omunene Jeova, ukuatesako ovanthu vahanda okuviyulwa nae. Kakuluminya ovanthu vapiluluke, mahi uvelekesa ovitumino viaviuka. Konyima ovo muene vena okutokola inkha mavalingi omapiluluko esukisa.

15, 16. Oñgeni ovalongwa Vombimbiliya valekesa okuti vahanda okulongeswa na Jeova? Ava ongeleka.

¹⁵ Tala etyi tyamonekele nomphange utiwa Tessie ukala ko Austrália. Tyapepukile unene kwe okulilongesa etyi Ombimbiliya ipopia. Mahi ankho utupu esuko notyili tupu ankho kaende komaliongiyo. Omphange ankho umulongesa ombimbiliya elikuambela ku Jeova iya atokola okuyekapo okumulongesa Ombimbiliya. Ngotyo ahuvu netyi tyamonekelepo. Tessie aovola omulongesi wae emutolela omokonda yatyi ahaila komaliongiyo. Emutolela okuti kelitehelela nawa mokonda ankho uhumba omawela ehekahi nawa. Mahi pahe watokola okuyekapo okuyumba omawela oo.

¹⁶ Pakala vala katutu Tessie ahimbika okuenda komaliongiyo akala novituwa vio Vakristau namphila omapanga ae emukuela. Mokueenda kuomuvo, Tessie ambatisalwa akala omukokoli ndyila, namphila ankho ena ovana ovatutu. Otyo tyayandyuluka nawa okuti tyina ovalongwa Vombimbiliya vahimbika okulinga omapiluluko opo vahambukiswe Huku, Huku mafuene kuvo iya eveviyula opo vakala onombiya mbakolela.

17. (a) Oityi uhole vali ku Jeova tyina wimbuka okuti Omuhongi wetu? (b) Oityi matulilongesa monthele mailandulako?

¹⁷ Hono, ovahongi ovanyingi valinga onombiya onongwa. Tyilifwa notyo, Jeova noumphwa-lundo utuviyula nonondonga mbae, iya pahe atale oñgeni matulingi. (Tanga Salmo 32:8.) Oñgeni wimbuka okuti Jeova wesuka nove? Okuti uhole okuimbuka oñgeni Jeova ekuviyula? Inkha ongotyo, ovituwa patyi vikukuatesako okukala onthata yaneñgena pomaoko a Jeova? Oityi upondola okulityilika inkha wimbuka okuti kukahi nokuendela muetyi ukahi nokulongeswa na Jeova? Iya oñgeni ovohe vapondola okuundapela kumwe na Jeova opo vaviyule ovana vavo? Onthele mailandulako maikumbulula omapulo.