Omihe 17:17 — “Epanga Liotyotyili, Oyou Ukuhole Umwe Apeho”

Etyi tyipopia omukanda Omihe 17:17

Epanga liotyotyili uyumbwa onthumbi. Ngo vanthu velikwai, omapanga otyotyili elikwatapo umwe, kaeliyeke haunene povitateka.

“Epanga liotyotyili, oyou ukuhole umwe apeho.” Onondaka ombo mbupondola okuhangununa okuti, “omapanga apeho elihumba.” Mo Hembeleu onadaka “ohole” yapopiwa pomuhaho oo, kaipopi vala etyi omunthu ekahi hamwe otyetyi elitehelela. Ohole yehe yomaandambeyo omunthu alekesa mweevi alinga. (1 Ova Kolindu 13:4-7.) Omapanga elihole ngooyo velikwatapo keveliyeke, natyina pena atyi tyahanda okuteyapo oupanga wavo, natyina hamwe velipona mu tyimwe. Tupu velievela tyahakuluminywa. (Omihe 10:12) Epanga liotyotyili kakala notyipululu tyina mukwavo ena otyipuka otyiwa. Mahi tyina epanga liae liamahambukwa, nae uhambukwa. — Ova Loma 12:15.

“Epanga liotyotyili. . . ulinga omukulu wove, ondenge yove, owove no putyina tyatokota.” Omuhe ou, uhanda okupopia okuti vokulikwai velikwatapo umwe. Tyina onthwe tulinga umwe atyiho tuvila, tukwateseko omapanga etu alambela movitateka, opo tuli nokulinga lwa ava velikwai umwe. Tyehe otyo vala, emphu lihonyeka oupanga oo, kaliyapulwa novitateka. Mahi, emphu olio lipama vali unene mokonda yolwembia olunene velilinga nonthilo.

Etyi tyipopia Omihe 17:17

Momukanda Omihe, muna ounongo waya kohi, muna omihaho vionondaka visokesa omutangi. Ohamba Salomau oe wahoneka vali unene momukanda oo. Omu euhonekela, waendela umwe omu ova Hembeleu vapopila omihe, mahi kapopile onondaka mbuhimbika otyipuka tyike, nokuvituka otyipuka tyike, wapopia onondaka mbuliyaka nononkhavo. Omihe 17:17 o imwe ina onondaka mbupopia etyi tyelifwa, monthele ya vali yovelesikulo oyo mwayawiswa onondaka mbuyaka, mbutoneka onthele yo tete. Omihe 18:24 o imwe ina ovipuka vivali ipopia vielikalela. “Kuna vamwe, okukala omapanga velilia vala omwenyo, mahi kuna vamwe, okukala omapanga velikwata-po umwe avapono pu vana velikwai.”

Tyina Salomau ena nokuhoneka omukanda Omihe 17:17, mokutala ankho uli nokusoka koupanga tate yae Ndaviti vali nao na Sonataa, omona Wohamba Saulu. (1 Samuwele 13:16; 18:1; 19:1-3; 20:30-34, 41, 42; 23:16-18) Namphila Ndaviti na Sonataa vehelikwai, mahi ankho velikwatapo umwe atyilambe pwaava velikwai. Aloo umwe Sonataa wapakele omwenyo wae motyiponga ayakulile epanga liae.a

Omihe 17:17 Mon’Ombimbiliya Ononkhwavo

“Epanga oyou ukuhole pomivo aviho, ulinga omukulu wove, ulinga ondenge yove watyitwa pononkhumbi.” — Almeida Século 21.

“Epanga, apeho epanga, tyina wehulilwa ukala umwe omukulu wove.” — Nova Tradução na Linguagem de Hoje.

“Epanga ulekesa umwe oupanga wae pomivo aviho — watyitilwa umwe omivo vialema.” — Sociedade Bíblica Portuguesa.

Tala ovindiu ei, utale vali etyi tyipopia omukanda Omihe.