Omukanda wo Nonkhalamutwe mb’Onombangi mba Siovaa

Vanthu vetu tuhole:

Onthwe atuho tufenda Siovaa, tupu tuhole Ondaka yae, Ombimbiliya. Tuna onthumbi yokuti omahipululo tuvasa Mondaka ya Huku ootyotyili, tupu onondunge mbukahi-mo mbuyumbwa onthumbi, mbulekesa Siovaa utuhole unene. (Oviimbo 119:105; Luka 1:3; 1 Swau 4:19) Tuhanda unene okukwatesako ovanthu aveho okunoñgonoka otyili tyikahi Mondaka ya Huku. Opo tutyivile, twalinga omukanda ou una osapi yati, “Lilongesila Komahipululo Ombimbiliya”. Matupopi katutu ovipuka vikahi momukanda ou.

Pokuhoneka omukanda ou haunene twasoka kovana. Mahi, tupondola okukwatesako nao ovakulu vahanda okunoñgonoka vali Ombimbiliya. Mokonda Ombimbiliya omukanda walingilwa ovanthu aveho, ovipuka ilongesa atuho vitukwatesako okukala nehambu.

Muna onotesitu mb’Ombimbiliya, tupu upopia konthele yovanthu tundee apa vatungwa. Kwalingwa ononkhono ononene opo omahipululo Ombimbiliya apopiwe monkhalelo imwe yapepuka nokwayandyuluka, nokupopia monkhalelo ovipuka viaenda.

Mahi, omukanda ou kaupopi vala omahipululo Ombimbiliya. Onondaka nomalutalatu ekahi-mo, vialingwa opo vikwateseko omunthu ukahi nokutanga, elitehelele ngatyina nae ankho opo ekahi nokulitehelela ngeetyi tyelitehelele ovanthu vapopiwa mehipululo.

Omukanda ou tupu utukwatesako okutala okuti m’Ombimbiliya mwapopiwa ovanthu vetavevele Siovaa na vana vehemutavelele. Tupu mautukwatesako okutala oityi tulilongesila kovanthu ovo. (Ova Loma 15:4; 1 Ova Kolindu 10:6) Omukanda ou una ononthele 14. Konthyimbi ya kese nthele kuna onondaka mbupopia etyi matulilongesa mu kese kapitulu.

Inkha una ovana, vetangela ovikapitulu viomukanda ou otyo mutomphola konthele yavio. Konyima upondola okutanga ono tesitu m’Ombimbiliya omu mwapolwa ehipululo. Kwatesako ovana vove opo vamone okuti otesitu oyo yelikwata neetyi omukanda upopia. Tupu upondola okulinga ngootyo inkha ukahi nokukwatesako omukulu umwe opo anoñgonoke nawa Ombimbiliya.

Tuhanda unene omukanda ou ukwateseko ovanthu ovanyingi—ovana novakulu—opo velilongese Ondaka ya Huku nokwendela mweetyi velilongesa. Inkha valinga ngootyo, tupu navo mavafende Siovaa kumwe novanthu vae.