OVAKWENDYE VAPULA
Oityi Mandyilingi Ine Hetavelele Kovo Tate?
Momaumbo aeho muna umwe evi vilingwamo neevi viahalingwamo, ngeetyi ovitumino vipopia oola yokuhika meumbo, omuvo una okukala nokumanga po telefone, neetyi tyilingwa ovipuka.
Ya pahe ankho una tyimwe wehetavelele? Kamatyitavela-le vali okutyipilulula, mahi una tyimwe upondola okulinga opo tyahavilepo. Onthele ei maipopi ovipuka vimwe una okulinga.
Etyi wahapondola okulinga
Ankho ovo tate yove kavamwene okuti una tyimwe wehetavele, okuti hahe vali okutyinkhinkha vehetyimone umwe?
Ya ankho ovo tate yove vetyi-ale okuti una tyimwe wehetavelele? Okuti hahe vali okutatesa, okuti hatyo otatesila momunthu omukwavo?
Povipuka ovio petupu natyike tyaviuka. Omokonda yatyi? Omokonda omunthu wakola kaholeka etyi alinga, katatesa, nokutatesila movanthu. Ine uholaika, nokutataisa opo ovo tate yove mavasoko okuti naina nkhele wakamba una ovinyingi una okulongeswa.
“Okukemba tyitupu-ale. Mokonda mapakala vala katutu ovo tate yove avanoñgonoka otyili, pahe atyikulingi umwe navi tyipona ankho wapopile vala otyili.” — Diana.
Etyi tyikahi nawa una okulinga
Tavela okuti wapengasa. Ombimbiliya yati: “Una uumba kononkhali mbae kakaviuka.” (Omihe 28:13) Ovo tate yove kavakevela okuti ove kumapengesa, mahi upondola okuyumbwa onthumbi.
“Ankho upopia otyili, opo ovo tate yove mavakala vali nokankhenda noove. Tyina upopia umwe etyi walinga ovo tate yove mavekuyumbu vali onthumbi.” — Olivia.
Ita Otyiponyo. Ombimbiliya yati: “Valei okulikondola koututu.” (1 Petulu 5:5) Una umwe okulikondola koututu “wiite otyiponyo,” ohelipindaulapo.
“Omunthu wokulipindaulapo naapa alinga etyi tyapenga onondunge mbae mbulemana umwe. Pahe haa nokulinga vala etyi tyapenga ehesuku-ale vali.” — Heather.
Tavela evi viatuka-ko. Ombimbiliya yati: “Tehelelei onondunge.” (Omihe 8:33) Wahaone-one, etyi ovo tate yove vamekupopila mokonda ya tyimwe wahalingile, tyitavela.
“Ankho woona-ona mokonda yeetyi vekupopila, opo vapondola okukuyawisilako vali. Hahe okutavela vala ohesuku unene neetyi wapengesa.” — Jason.
Likwatehila ovo tate yove vekuyumbe vali onthumbi. Ombimbiliya yati: ‘Lulei-mo omunthu omukulu uyemba vala ku evi ankho mulinga-linga.’ (Ova Efesu 4:22) Ine ovo tate yove vekumona ñga uli nokulikwatehila okukoya okulinga evi vikahi nawa, mavekuyumbu vali onthumbi.
“Ine ukoya okulinga vali evi vikahi nawa ohawane vali evi walingaile-ale, opo ovo tate yove mavekuyumbu vali onthumbi.” — Karen.
LINGA ÑGA: Likwatehila umwe mwevi ulinga tyimoneke okuti uyumbwa onthumbi. Tyimwe upondola okulinga okuti tyina wamatundupo, popila ovo tate yove ovola mohiki meumbo. Velikalela tyina wehenehike uvetie unale nokuhika naankho umwe kumasete-ale. Oko ovo tate yove mavatalela, avetyimono okuti uhanda okuyumbwa vali onthumbi.’