Etyi Andau na Eva vataatwa motyitaka tyo Endene, avakala novana. Omona wavo wotete Kaii, wakalele omulimi, omona wavali Ambele akala omunthita.

Onthiki imwe Kaii na Ambele vaavele ovilikutila ku Siovaa. Okuti ove wii oityi otyilikutila? Otyilikutila otyiawa tyimwe otyiwa. Siovaa ahambukilwa otyilikutila tya Ambele, mahi kahambukililwe otyilikutila tya Kaii. Otyo atyinumanesa Kaii. Siovaa alondola Kaii okuti ankho utwalako nonyengo malingi otyipuka otyivi. Mahi Kaii ketavelele.

Kaii apopila Ambele okuti: ‘Twende kepia.’ Pweetyi vekahi aveke kepia, Kaii autukila ondenge yae emwipaa. Oityi Siovaa alingile? Siovaa atumu Kaii akakale kokule nombunga yae. Kaii kakondokele vali.

Oityi tulilongesila-ko? Pamwe ovipuka kaviende ngeetyi ankho tuhanda, otyo atyitunumanesa. Inkha tutala okuti onyengo ikahi nokukula momutima wetu, okuti hatyo vakwetu vetyimona avetulondola, tusukisa okuyeka-po onyengo, opo yehekulile momutima wetu.

Mokonda Ambele ankho uhole Siovaa walingile etyi tyaviuka, Siovaa kemulimbilwe. Huku makatutilisa Ambele tyina amapilulula ohi aikala omphangu yombembwa.

Etyi pakala, ohi aikala novanthu ovanyingi. Ovanyingi puvo ankho valinga ovipuka ovivi. Onoandyu mbumwe keulu ambukala onondingavivi. Ambusi-po eumbo liambo keulu ambuya pano pohi. Ove utyii omokonda yatyi mbalingila ngootyo? Omokonda ankho mbuhanda okunepa.

Onoandyu ombo ambukala novana onondingavivi. Etyi ovana ovo vekula avakala nononkhono ononene. Ankho vaveta ovanthu. Siovaa ovanthu ovo eheveyeke vala ngootyo. Ahanye-ko onondingavivi nombila Onene.

Mahi ankho kuna omulume umwe welikalela. Ankho uhole Siovaa. Enyina liae o Nowee. Ankho una omukai novana vetatu, Sei na Kaa na Safee, kese umwe ankho una omukai wae. Siovaa apopila Nowee opo atunge otyikasa tyimwe otyinene, ahupe nombunga yae Kombila Onene. Otyikasa atyiyalala kombanda yomeva. Tupu Siovaa wapopilile Nowee apake motyikasa ovinyama opo navio vihupe.

Nowee ahimbika okutunga otyikasa. Nowee nombunga yae avetyitungu omanima 50. Vetyitungile umwe ngeetyi Siovaa evepopilile. Etyi veli nokutunga, Nowee otyo apopila ovanthu okuti makuya Ombila Onene. Mahi avehemutavela.

Onthiki yokunyingila motyikasa aihiki-po. Etyi vanyingila oityi tyaendele-po?