Okuti Ankho Utyii-Ale?

Pononthiki mba Sesusi, omalilimu patyi ovanthu ankho vafeta?

MOKUEENDA kuomanima omanyingi ova Isilayeli ankho vaava onombongo opo vakuateseko efendelo liotyotyili. Mahi pononthiki mba Sesusi ova Sundeu ankho vafeta omalilimu omanyingi iya otyipuka otyo ankho tyivepuiya unene.

Opo vakuateseko ovilinga vilingwa mekaka liefendelo no mondyuo ya Huku, ova Sundeu aveho ovakulu, ankho vena okuaava onondracma onombali. Pononthiki mba Sesusi, onombongo ombo ankho mbuundapeswa pala okuviukisa ondyuo yokufendela Helode atungile, nokukuatesako ovilinga ankho vilingwa-mo. Ova Sundeu vamwe vapulile Petulu inkha Sesusi ufeta elilimu. Sesusi apopi okuti, katyapengele okufeta elilimu. Atee umwe apopila Petulu opi apondola okuvasa ombongo afete elilimu. — Mat. 17:24-27.

Ovanthu va Huku tupu ankho vena okufeta elilimu ekuavo litiwa onthele ya tyekwi, yovikuna viavo, ine ovipuka vena. (Lev. 27:30-32; Núm. 18:26-28) Ononkhalamutwe mbonongeleya ankho mbukuluminya ovanthu okufeta elilimu olio, alo umwe nokufeta “oluatalau no endru, no kominyu.” Sesusi kapopile okuti okufeta omalilimu oo tyapenga, mahi wapopile okuti onkhalelo ononkhalamutwe mbonongeleya vetyilinga oyo yapenga. — Mat. 23:23.

Etyi ova Sundeu vehimbika okutuminwa nova Loma, ankho tupu vena okufeta omalilimu omanyingi. Mongeleka, vana ankho vena omapia, vena okufeta omalilimu omapia avo, novikuna vateyamo, ine onombongo. Inkha omunthu wateya ono kilu 100, ankho una okufeta kova Loma ono kilu 20 ine 25. Tupu, ankho vena okufeta mokonda yokuna omuenyo. Elilimu olio ova Faliseu vapulile Sesusi ankho ulifeta. Sesusi evekumbulula okuti: “Fetei ku Sesale ovipuka vya Sesale, mahi ovipuka vya Huku, viavelei Huku.” — Mat. 22:15-22.

Tupu tyina omunthu ankho amalande ovikuna kepunda-umbo ekuavo, ankho una okufeta elilimu. Elilimu olio ankho velifetela povilalo, na pana patalamena onombaluku, no ponondimbu mbomapunda-umbo.

Etyi ovanthu ankho vatuminwa noutumini wo Loma, ankho vafeteswa unene. Omuhipululi umwe wo Loma utiwa o Tacitus wapopia okuti, mokueenda koutumini wa Tibeliu etyi Sesusi eli pano pohi, “ova Silia no va Sundaa ankho vafeta vala katutu mokonda ankho tyivepuiya.”

Otyipuka otyikuavo tyakalele omulemo, onkhalelo ankho ovatanthi vomalilimu vetyilinga. Vamwe ankho vahatokalele otyilinga otyo vetyipewa. Mongeleka, ononkhalamutwe ankho mbuavela otyilinga otyo ovanthu ovakuavo, opo vevevakeleko onombongo. Iya tyipondola na Sakeu ankho una ovatanthi vae, vavaka onombongo kovanthu. (Luka 19:1, 2) Otyo ovanthu ankho veyelele ovatanthi vomalilimu.