Okuti Ankho Utyii-ale?

Okuti Mordekai Waliko Umwe?

OMU Sundeu umwe utiwa o Mordekai, wapopiwa unene mehipululo tuvasa momukanda wa Ester. Ngwe ankho omu Sundeu uli koukonde ko Mbambilonia mahi ankho uundapa mombala yohamba yo Pelesa. Otyipuka otyo tyaenda-ko motyita tya t ano P.K.E., “pomuvo [Wohamba] Asuwelu.” (Pehepano pahe wiiwe okuti ohamba Xerxes I.) Mordekai watyikile omphango ovanthu vamwe ankho venayo yokuipaa ohamba. Pahe opo ohamba imupandule aimuhilivikila povaunyingi. Konyima etyi Hamaa aipawa, una ankho wokuyele Mordekai nova Sundeu ovakuavo, pahe Ohamba aipake Mordekai koutumini wavali motyilongo. Mokonda pahe ankho Mordekai omutumini etyivili okuhoneka omikanda vipopila ovanthu opo vahaipae vali ova Sundeu. — Ester 1:1; 2:5, 21-23; 8:1, 2; 9:16.

Momanima 1901, ovanthu vokupopia omahipululo ankho vapopia okuti ehipululo lili momukanda wa Ester lipopia Mordekai, kaliakaleleko-ale. Mahi mo 1941, ovanthu vokuheyulula apa pakalaile ovanthu kohale, vavasa otyipuka tyimwe tyilekesa okuti ehipululo livasiwa Mombimbiliya lipopia Mordekai wakaleleko umwe. Oityi vavasa?

Ovanthu vokuovolola vavasa otyipuka tyimwe tyahonekwa enyina liomulume umwe utiwa Marduka, (lihangununa okuti Mordekai). Omunthu oo, waundapele ngomutumini mo Susaa iya tyafuile ankho otyilinga tyae otyokuvalula. Omunthu umwe wokupopia omahipululo utiwa Arthur Ungnad, wapopia okuti: “Pomuvo opo otyipuka otyo ankho otyo vala tyilekesa okuti Mordekai wakaleleko umwe.”

Tundee apa Ungnad apopia otyipuka otyo, ovanthu vokuatanga unene pahe avahimbika okupitiya ovipuka ovinyingi vavasa-vasa vipopia ova Pelesa. Vimwe puvio omavai amwe vavasa momatunthu epundaumbo olio. Ovipuka ovio vipopia umwe omuvo wohamba Xerxes I. iya viahonekwa umwe melaka ankho lipopiwa pomuvo pana, tupu muna omanyina ovanthu ovanyingi vapopiwa momukanda wa Ester.a

Momavai oo, muawanua-wanua enyina Marduka, iya ankho uundapa mombala yohamba yoko Susaa pomuvo wohamba Xerxes I. Tupu momavai atyo oo, muahonekwa okuti Marduka ankho omupitiyi. Otyipuka otyo, tyelikwata umwe netyi Ombimbiliya ipopia tyayemba ku Mordekai. Ombimbiliya ipopia okuti Mordekai ankho uundapa mombala Yohamba Asuwelu (Xerxes I) iya tupu ankho upopia omalaka evali. Mordekai apeho ankho upumphama pombundi yombala yohamba yo Susaa. (Ester 2:19, 21; 3:3) Popundi opo ankho papumphama vala vana vaundapa mombala yohamba.

Ovipuka vialingaile omunthu wokuahonekwa komavai utiwa o Marduka, tupu ovio vialingaile Mordekai wapopiwa Mombimbiliya. Aveho vakakaleleko pomuvo wike tupu vaundapele otyilinga tyike mombala yohamba. Otyipuka otyo tyilekesa umwe nawa okuti, otyipuka tyina ovanthu vavasa pokuheyulula apa pakalaile ovanthu, tyelikuata umwe na Mordekai wahonekwa momukanda wa Ester.