Omapulo Ovatangi
Omokonda yatyi etyi Sesusi ehenenkhie apopilile onondaka mba Daviti mbuvasiwa mu Salmo 22:1?
Onondaka ononyingi Sesusi apopia etyi ehenenkhie mbumwe mbuvasiwa mu Mateusi 27:46 mbati: “Huku yange, Huku yange omokonda yati wandyekela andyike?” Etyi Sesusi apopia onondaka ombu, wafuisapo onondaka mba Daviti mbuvasiwa mo Salmo 22:1. (Malu. 15:34) Okusoka okuti Sesusi wapopia tupu onondaka ombo, omokonda ankho wasoya unene iya utupu ekolelo tyapenga. Sesusi ankho utyii omokonda yatyi esukisila okunkhia iya ankho wafuapo. (Mat. 16:21; 20:28) Sesusi ankho utyii okuti tyina oola yae yamehikipo Siovaa “kememuamena vali. (Jó 1:10) Sesusi ankho una okulekesa okuti omukuatyili ku Siovaa, otyo akoleleyile aloo kononkhia. — Malu. 14:35, 36.
Opo omokonda yatyi Sesusi apopila onondaka mbuvasiwa momukanda wa Salmo? Namphila tuehetyi nawa, mahi matupopi ovipuka vimwe hamwe viemulingisisa okupopia ngotyo.a
Hamwe Sesusi ankho ukahi nokusoka okuti Siovaa kememutyilika okunkhia. Sesusi ankho wesukisa okunkhia afete otyilikutila tyehesukisile okukuatesuako na Siovaa. Mokonda omunthu ankho “wesukisa okunkhia opo amakele ononkhia pala ovanthu aveho.” — Heb. 2:9.
Sesusi hamwe wapopia onondaka mbo Salmo oyo opo vanthu vahinangele o Salmo aiho. Pononthiki mba Sesusi ova Sundeu ankho vapaka momutwe ono Salmo ononyingi. Tyina veiva onondaka mbo Salmo oyo tyipondola vahinangela onondaka mbo Salmo aiho. Inkha otyo Sesusi asokele opo tyipondola hamwe uhanda okukuatesako ovalanduli vae ova Sundeu okuhinangela okuti, mo Salmo oyo muna omaulo omanyingi konthele yononkhia mbae. (Sal. 22:7, 8, 15, 16, 18, 24) Iya tupu onondaka mbahulilila mbo Salmo oyo, mbupopia okuti Siovaa oe vala una okunkhimanekwa kombanda yohi aiho. — Sal. 22:27-31.
Sesusi tyipondola wapopia onondaka mba Daviti opo alekese okuti kalingile natyike tyapenga. Etyi ehenenkhie Sesusi wakoyesilwe mokonda yotyipuka ahalingile avemupopi okuti upopia omapita Huku. (Mat. 26:65, 66) Wakoyesilwe vala tyalumbana mokati kovinthiki, kakoyesilwe ngetyi muene tyina okukoyeswa ovanthu pomuvo pana. (Mat. 26:59; Malu. 14:56-59) Etyi Sesusi apopia okuti Huku yange, Huku yange omokonda yatyi wandyekela, tyafwa ankho uhanda okupopia okuti kalingile natyike tyimuipaesisa.
Hamwe Sesusi ankho uhanda okuhinangelesa ovanthu okuti, ononkhumbi Daviti amuene ankho kambulekesa okuti kapandelwe na Siovaa. Epulo Daviti alinga ankho kalilekesa okuti ankho utupu vali ekolelo. Mokonda konyima yepulo olio, Daviti apopi okuti utualako okuyumba onthumbi mu Siovaa, iya Siovaa atualako okumuyamba. (Sal. 22:23, 24, 27) Tyelifwa notyo, Sesusi “Omona wa Daviti,” namphila atuaileko okumona ononkhumbi momuti wemone otyo katyilekesa okuti ankho kapandelwe vali na Siovaa. — Mat. 21:9.
Sesusi hamwe ankho ukahi nokupopia oluihamo ankho eivite mokonda Siovaa ankho kapondola okumuamena pomuvo pana. Siovaa ankho kahandele Omona wae amoneswe ononkhumbi ankhi. Mahi ankho tyesukisa mokonda yetyi Andau na Eva valingile motyikunino tyo Endene. Sesusi ankho kalingile natyike tyapenga mahi ankho wesukisile okumoneswa ononkhumbi aipawa opo akumbulule ovipuka aviho Satanasi ankho apopia iya tupu ankho wesukisa okunkhia opo ayovole ovanthu ovakuankhali. (Malu. 8:31; 1 Pet. 2:21-24) Mahi tyitavela vala inkha pomuvo pana Siovaa wayekelepo okuyakulila Sesusi.
Sesusi tyipondola hamwe ankho uhanda okulekesa kovalanduli vae omokonda yatyi Siovaa emuyekela ankhie monkhalelo ina.b Sesusi ankho utyii okuti ovanthu ovanyingi vapondola okulipunduka mokonda waipawa vala ngondingavivi. (1 Kol. 1:23) Inkha ovalanduli vae vanoñgonokele omokonda yatyi ankhila, ñgeno vaimbuka oityi ononkhia mbae mbulekesa. (Gal. 3:13, 14) Otyo ankho tyipondola okukuatesako ovalanduli va Sesusi okumutala Ngomuyovoli ha ngondingavivi.
Katyesukisile omokonda yatyi Sesusi apopila onondaka ombo, mahi Sesusi ankho utyii okuti una okunkhila momuti wemone opo afuisepo etyi Siovaa ahanda. Konyima yetyi apopia onondaka mbo mo Salmo, Sesusi apopia okuti: “Nalinga atyiho wanthuma!” (Suau 19:30; Luka 22:37) Namphila, ahamenenwe na Siovaa pomuvo pana, mahi Sesusi afuisipo umwe etyi tyemuetele pano pohi. Afuisipo atyiho tyapopiwa Movitumino Viapelwe Moisesi Novauli nomo no Salmo.” — Luka 24:44
a Tala opalangalafu 9 no 10 yonthele yati,“Oityi Tulilongesila Konondaka Mbahulilila Mba Sesusi?” momutala ou womulavi.
b Etyi Sesusi ali pano pohi pamwe walingile omapulo novipuka ankho vihalekesa oñgeni ankho elitehelela. Ankho ulinga ovipuka ovio opo atale oñgeni ovalanduli vae vasoka konthele yae. — Malu. 7:24-27; Suau 6:1-5; tupu tala Omutala Womulavi 15 ya Outubro yo 2010, pomafo 4-5.