Ombembwa — Oñgeni Upondola Okuivasa?

TUKAHI mouye wepuiya iya katyapepukile okuvasa ombembwa. Namphila pamwe tuna ombembwa, mahi ipondola okupwa liwa-liwa. Oityi Ombimbiliya ipopia tyipondola okutukuatesako okuvasa ombembwa yotyotyili iya itualako? Oñgeni tupondola okukuatesako vakuetu okuivasa?

OITYI TUESUKISA OKULINGA?

Opo tukale nombembwa yotyotyili, tuesukisa okulitehelela okuti tuapama. Tupu, tuesukisa okukala nomapanga omawa, iya tyakolela vali, tuna okukala noupanga omuwa na Huku. Oñgeni tupondola okutyilinga?

Ovitumino vya Jeova nonondonga mbae, apeho vituetela ouwa. Tyina tuvitavela, tulekesa okuti tuyumba onthumbi mu Jeova iya tuhanda okukala noupanga omuwa nae. (Jeremias 17:7, 8; Tiago 2:22, 23) Inkha tulinga ngotyo, Jeova mafuene vali ku onthue iya metuavela ombembwa. Isaías 32:17, yati: “Ouwa utundilila kouviuki wotyotyili, ombembwa. Iya ovinyango viouviuki wotyotyili, epamo lihapu.” Okutavela ku Jeova nomutima auho, tyituetela ombembwa.—Isaías 48:18, 19.

Tupu, Jeova wetuavela otyiawa tyipondola okutukuatesako okukala nombembwa ihapu. Otyiawa otyo, ospilitu sandu.—Atos 9:31.

OSPILITU SANDU ITUKUATESAKO OKUKALA NOMBEMBWA

Apostolu Paulu wapopia okuti ombembwa ilinga onthele “yotyinyango tyospilitu.” (Gálatas 5:22, 23) Mokonda ombembwa ituka kospilitu ya Huku, inkha tuhanda okukala nayo, tuna okuyeka ospilitu sandu ituhongolele. Oñgeni tupondola okutyilinga?

Tete, tuna okutanga apeho Ondaka ya Huku. (Salmo 1:2, 3) Tyina tusokolola ku etyi tutanga, ospilitu sandu itukuatesako okunoñgonoka oñgeni Jeova atala ovipuka. Mongeleka, tulilongesa oñgeni Jeova atualako okukala nombembwa iya omokonda yatyi ombembwa yakolela unene kwe. Tyina tuendela muetyi tulilongesa mo Mbimbiliya, ombembwa yetu mailiyawisa.—Provérbios 3:1, 2.

Vali, tuna okuita ospilitu sandu ya Huku momalikuambelo etu. (Lucas 11:13) Jeova walaa aveho vana vemuita ekuateso okuti: “Ombembwa ya Huku, ipona onondunge nomalusoke aeho, maiyungu omutima wenyi, nomalusoke enyi, menyina lya Kristu Jesus.” (Filipenses 4:6, 7) Tyina tuna oupanga wapama na Jeova iya atuyumbu onthumbi mospilitu yae, metuavela ombembwa.—Romanos 15:13.

Ombimbiliya yakuatesako ovanthu ovanyingi okupilulula omuenyo wavo, iya pahe vena ombembwa na Jeova, tupu vena ombembwa na vakuavo. Oñgeni vetyivila okulinga omapiluluko oo?

OÑGENI VAMWE VAVASA OMBEMBWA YOTYOTYILI?

Vamwe povakuatate vetu, nonomphange ankho vanumana unene iya ovakalavi. Mahi, valinga ononkhono opo vapilulule onkhalelo yavo. Pahe ovanthu vena okankhenda, vapwa-elundo iya vena ombembwa na vakuavo.a (Tala onondaka pokatoi.) (Provérbios 29:22) Tala oñgeni omukuatate David, nomphange Rachel valinga omapiluluko oo momuenyo wavo.

Etyi David ehenekale Ombangi, apeho ankho upopia omapita vakuavo iya ankho omukalavi nombunga yae. Mahi konyima, aimbuka okuti wesukisa okulinga omapiluluko. Oñgeni avasa ombembwa? David wati: “Nahimbika okuendela monondonga mbo Mbimbiliya, iya pahe atuho mombunga tuna onthilo pokati ketu.”

Rachel watekulua mombunga inumana unene. Wati: ‘Alo hono, ndyilinga ononkhono opo nahanumane unene.’ Oityi tyakuatesileko Rachel okuvasa ombembwa? Wayawisako okuti: “Okulikuambela, nokuyumba onthumbi mu Jeova.”

David na Rachel onongeleka onongwa mbovanthu vena ombembwa, mokonda vaendela monondonga mbo Mbimbiliya iya vayumba onthumbi mospilitu sandu ya Huku. Namphila tukala mouye ovanthu vanumana unene, no ngotyo tupondola okukala nombembwa. Otyo matyitukuatesako okulivila nombunga yetu, novakuatate vetu mewaneno. Jeova utupopila okuti “kalei nombembwa novanthu aveho.” (Romanos 12:18) Okuti otyo tyitavela umwe? Iya omokonda yatyi tuna okulinga ononkhono mbokukala nombembwa na vakuetu?

OVOLA OKUKALA NOMBEMBWA NA VAKUENYI

Movilinga viokuivisa, tupopia onondaka onongwa mbombembwa konthele Youhamba wa Huku. (Isaías 9:6, 7; Mateus 24:14) Ovanthu ovanyingi vetavela. Tyina vetavela, kavanumana vali mokonda yetyi tyikahi nokuenda mouye uno. Pahe vakevelela ovipuka oviwa komutwe wandyila, iya otyo tyivelunda “okuovola ombembwa.” — Salmo 34:14.

Mahi, vamwe tyina tuvepopila otyikando tyotete onondaka onongwa, kavetavela. (João 3:19) Katyesukisile oñgeni ovanthu vetutambula, Huku utuavela ospilitu yae. Otyo tyitukuatesako okutualako okukala ovana-mbembwa tyina tuivisa. Tyina tulinga ngotyo, tuendela monondonga mba Jesus mbati: “Tyina munyingila meumbo, kukunyei ombunga. Inkha ombunga ihanda, ombembwa muvehandela ikale navo. Mahi, inkha kavahandele, ombembwa yenyi ikondoke kuonwe.” (Mateus 10:11-13) Okulandula onondonga ombo, matyitukuatesako okukala ovana-mbembwa tyihatale kuetyi ovanthu vapopia ine valinga. Tupu, tuhinangela okuti nthiki imwe hamwe tupondola okukuatesako ovanthu ovo.

Tyina tupopia novatumini, tulekesa okuti tuvana-mbembwa monkhalelo tupopia navo, alo umwe tyina vailika ovilinga vietu. Mongeleka, motyilongo tyimwe tyo Afrika, ovatumini availika ovakuatate okutunga Onondyuo Mbomaliongiyo. Ovakuatate ankho vetyii okuti vena okulinga ononkhono opo vatetulule otyitateka otyo nombembwa. Ngotyo, avatumu omukuatate ankho wali omisionaliu motyilongo otyo opo ende ko Londres, mo Inglaterra, akapopie Nomutumwa-Tyilongo konthele yovilinga vyo Nombangi mba Jeova.

Omukuatate wati: “Etyi nehika moseketa yokutambula ovanthu, naimbuka okuti omukai wanthambula ankho upopia elaka nelilongesile etyi ankho ndyimisionaliu, mokonda yonkhalelo avala. Ngotyo, andyimukukunya melaka liae. Nokuahuva, amphulu okuti: ‘Oityi tyekueta muno?’ Andyimupopila okuti neya okupopia Nomutumwa-Tyilongo. Apopila Omutumwa-Tyilongo okuti pena ou uhanda okupopia nae, iya eya okumphola. Tupu, Omutumwa-Tyilongo ankhukunya melaka liae. Anthehelela nawa putyina ndyimupopila ovilinga Onombangi mba Jeova valinga.”

Etyi Omutumwa-Tyilongo atehelela nawa etyi omukuatate emupopila, anoñgonoka oñgeni onthue tuundapa iya apilulula olusoke lwae konthele yetu. Etyi palamba omuvo umwe, ovatumini vo motyilongo otyo avapilulula etokolo liavo iya avayeke Onombangi mba Jeova vatunge Onondyuo Mbomaliongiyo. Ovakuatate avahambukwa unene! Tyotyili, okukala nonthilo na vakuetu tyieta ombembwa.

OMBEMBWA IHAPU

Hono, ovanthu va Jeova vena ombembwa pokati kavo. Opo atuho tuyawise kombembwa oyo, tuesukisa okulinga ononkhono mbokukala nombembwa momuenyo wetu. Inkha tulinga ngotyo, tupondola okukala nonthumbi yokuti matuhambukiswa Jeova. Iya mouye omupe, Jeova metuavela ombembwa ihapu.—2 Pedro 3:13, 14.