Ekongoko Momalusoke
Ombimbiliya itulondola konthele yokulityilika omalusoke apenga iya itulunda okukala nomalusoke aviuka.
ONYENGO
ONONDONGA MBO MBIMBILIYA: “Una uhanumana liwa, hahe vali tyipona omulume una ononkhono.” — Provérbios 16:32.
OTYO TYIHANGUNUNA-TYI: Okulilongesa okuyunga onkhalelo tulitehelela tyitulinga nawa. Katyapengele okunumana, otyitateka oputyina onyengo itutokotesa omutwe. Omaovololo omape, alekesa okuti tyina ovanthu vanumana unene, vapopia ine valinga ovipuka iya ha konyima avelivele.
OITYI OVE UPONDOLA OKULINGA: Lilongesa okuyunga onyengo tyina nkhele uhenenumane. Ovanthu vamwe vasoka okuti okukala nonyengo onene, onkhalelo yokulekesa okuti wapama, mahi tyotyili tyilekesa okuti kuapamene. Ombimbiliya yati: “Ngepunda-umbo liapundua, lihena ovimato, omulume uhetyivili okuyunga onyengo.” (Provérbios 25:28) Onkhalelo ikahi nawa yokuyunga onyengo, okunoñgonoka ovipuka viaendapo, mahi tyina nkhele uhenenumane. “Onondunge mbomunthu mbusetesa onyengo yae.” (Provérbios 19:11) Tyakolela okutehelela etyi omunthu omukuavo ekahi nokupopia, mokonda otyo tyikuatesako okunoñgonoka nawa ovipuka iya atukala vali tyahiliya.
OKUPANDULA
ONONDONGA MBO MBIMBILIYA: “Apeho pandulei.” — Ova Kolosu 3:15.
OTYO TYIHANGUNUNA-TYI: Ovanthu vokupandula, ovo vala vena ehambu. Alo umwe vana valambelele moviponga ovinene, vapopia okuti otyo otyili. Vapopia okuti opo omunthu akale nawa, una okukala tyahiliya ahatale kuetyi avombesa, mahi atale kuetyi ena iya ngatyo apandula.
OITYI OVE UPONDOLA OKULINGA: Ononthiki ambuho honeka ovipuka ove uhanda okupandula. Katyesukisile vikale ovipuka ovinene. Tyipondola hamwe ovipuka ovitutu, ngetyi okutunda kuekumbi, netompho likahi nawa na umwe uhole unene ine hamwe omuenyo una. Okuovola omuvo wokusoka kovipuka ovio iya opandula, matyikukuatesako okukala vali nehambu.
Tupu otyipuka tyikuatesako unene, okutala kovituwa oviwa ombunga yove ine omapanga vena. Vepopila otyituwa ove uhole vali kuvo. Upondola okuvepopila-tyo ine okuvehonekela omukanda alo umwe okuvetuma omesase notelefone. Okulinga ngotyo, oupanga wenyi maupame vali iya ove okala nehambu liokulinga otyiwa. — Ovilinga 20:35.
ONONDONGA ONONKHUVO MBO MBIMBILIYA
Upondola okutangela Ombimbiliya mo Internet. Ivasiwa mo jw.org momalaka 40
ENDA NKHOLO ONONDYAYA.
“Okuhimbika okutañguna o ngatyina omunthu ayeka omeva apite. Tundapo tyina nkhele onondyaya mbehenekatuke.”— PROVÉRBIOS 17:14.
UHESUKE UNENE NETYI MATYIKAMONEKA KOMUTWE WANDYILA.
“Muhakalei notyiho nonthiki yamuhuka, mokonda onthiki yamuhuka maikala notyiho tyayo. Tyiti umwe onthiki ei ina ovitateka viayo, ei ina viayo.”— MATEUSI 6:34.
UHALINGE OVIPUKA OKUTALELA KONKHALELO ULITELELA, MAHI TETEKELA OKUSOKA NAWA.
“Okusokolola matyikuyungu iya okupunga nawa ovipuka, matyikuyakulila.”— PROVÉRBIOS 2:11.